१० भदौ ,पोखरा।
वैदिक सनातन हिन्दू धर्मावलम्बीले आज देशभर भगवान् श्रीकृष्णको पूजा–आराधना गरी श्रद्धा–भक्तिपूर्वक श्रीकृष्णजन्माष्टमी पर्व मनाउँदैछन् ।द्वापरयुगमा भाद्र कृष्ण अष्टमीको मध्यरात भगवान् विष्णु आठौँ अवतारका रूपमा कृष्ण भएर जन्मिएको पुराणहरूमा उल्लेख छ । यसर्थ आजको दिनलाई श्रीकृष्णजन्माष्टमी र रातलाई मोहरात्रि भन्ने गरिन्छ ।यसदिन देशभरिका कृष्णमन्दिरमा भगवान् श्रीकृष्णको पूजा, आराधना, भजनकीर्तनका साथै विशेष गरी भक्तजन व्रत बस्ने गर्दछन् ।
पृथ्वीलोकमा अन्याय, अत्याचार र दानवी प्रवृत्तिबाट मानवको रक्षा गर्नका लागि नै भगवान् विष्णुले कृष्णको रुपमा जन्म लिएको र श्रीकृष्णले सत्यको पक्षमा रहेर सत्कर्म गर्नका लागि मानवलाई प्रेरित गरेको धार्मिक मान्यता छ ।
श्रीकृष्णका माता पितालाई कंशले कृष्ण जन्मिनु अघि कालकोठरीमा राखेका थिए । सोही कालकोठरीमा श्रीकृष्ण भगवानको जन्म भएको थियो । कृष्णको बाल्यकाल बितेको मथुरामा उनले बाललीला देखाएका थिए भने महाभारत युद्धअघि अर्जुनलाई गीताज्ञान गराएका थिए । श्रीकृष्णले कंश र उनलाई सहयोग गर्ने शकट, भञ्जन, तृणवर्त, वत्सासुर, बकासुर पुतना जरासन्ध र शिशुपाल लगायतको संहार गरि शान्ति स्थापना गरेको पुराणमा उल्लेख छ ।
मानिसको कर्मअनुसार नै उसले फल प्राप्त गर्छ भन्ने श्रीकृष्णको मूल मन्त्र हो । कुरुक्षेत्रमा कौरवसँगको युद्धमा पाण्डव समूहका अर्जुनलाई उपदेश दिँदा भगवान् श्रीकृष्णले मौखिक रुपमा व्यक्त गरेका बोली नै श्रीमद्भागवतगीता पवित्र ग्रन्थ हो । यस ग्रन्थलाई गीता पनि भन्ने गरिन्छ भने यो ग्रन्थ विश्वमै सबैभन्दा बढी भाषामा अनुवाद भएको विश्वास गरिन्छ ।
आजको दिन देशका विभिन्न धार्मिक संघसंस्थाद्वारा श्रीकृष्णको झाँकीसहित शोभायात्रा तथा रथयात्रा निकाल्ने चलन छ । शोभायात्रा आज मध्यरातमा श्रीकृष्णको जन्म भएपछि भोलि मङ्गलबार निकालिन्छ । श्रीकृष्णजन्माष्टमी पर्वको अवसर मा सरकारले देशभर सार्वजनिक बिदा दिएको छ ।
