दमौली ,३० माघ।
पन्यु तताएर विद्यार्थीको गालामा डामेर यातना दिने तनहँुको भीमाद नगरपालिका– ६ स्थित प्रभात एकेडेमी बोर्डिङ स्कुलकी लेखापाल ३४ वर्षीया सुष्मा श्रेष्ठ पक्राउ परेकी छन । श्रेष्ठ विद्यालयका संस्थापक प्रिन्सिपल कृष्णदेव श्रेष्ठकी छोरी हुन ।
श्रेष्ठले हल्ला गरेको र जिस्क्याएको भन्दै ४ कक्षाका १० वर्षका ४ बालकको गालामा तातो पन्युले डामेकी थिइन् । उनले बाबु नभएको बेला विद्यालयको ‘कमान्ड सम्हाल्दै आएकी थिइन् । जिल्ला प्रहरीका कार्यालय तनहुँका प्रहरी निरीक्षक राजु अधिकारीका अनुसार माघ २९ गते साढे ११ बजेको समयमा एक जना बालकलाई खाना पकाउने तातो पन्यूले गालामा डाम्दा घाइते भएको भनि सामाजिक संजालमा प्रशारण भएको थियो । त्यसपछि घटनाबारे बुझ्ने क्रममा अन्य २ बालकसमेत पीडित भएको खुल्न आएकोले बालकहरूको अभिभावकबाट जाहेरी लिई निज लेखापाल एवम् शिक्षिका शुस्मा श्रेष्ठलाई बुधवार नियन्त्रणमा लिई बालबालिका बिरूद्धको कसुरमा तनहुँ जिल्ला अदालतबाट आजै देखि लागु हुने गरी ५ दिनको म्याद थपेर अनुसन्धान भइरहेको उनले बताए ।
