पोखरा,९ पुष।
तनहुँको आँबुखैरेनी गाउँपालिका–१ आँधीखोलामा मंगलबार बिहान इँटा बोकेको ट्रक दुर्घटना हुँदा चालक र सहचालक गरी दुई जनाको मृत्यु भएको छ । मृतकमा ट्रक चालक उदयपुरको चौदण्डीगढी नगरपालिकाका ३२ वर्षीय भेषराज पराजुली र सहचालक रौतहटको चन्द्रनिगाहापुर नगरपालिका–४ का २९ वर्षीय विजय विश्वकर्मा रहेको जिल्ला प्रहरी कार्यालय तनहुँका प्रहरी निरीक्षक मुनेन्द्र थापाले जानकारी दिए । दुवैजनाको घटनास्थलमै मृत्यु भएको प्रहरीले जनाएको छ ।
डुम्रेबाट आँबुखैरेनी जाँदै गरेको बा प्र ०१–००१ य १६५९ नम्बरको स्करपियोलाई विपरीत दिशाबाट आउँदै गरेको ए २–०३००–१ केएच २४४८ नम्बरको ट्रकले ठक्कर दिएको थियो ।ठक्कर पश्चात् स्करपियो सडकमै रहेको र ट्रक पुलकोबीच भागबाट खसेर दुर्घटनाग्रस्त भएको थियो । स्करपियोमा सवार चार जना सकुशल रहेको प्रहरीले जनाएको छ ।
