पोखरा, असार ५
पोखरा महानगरपालिका राजश्व विभागको आयोजनामा पोखरा–२७ स्थित त्रिवेणी इन्टरनेशनल कलेजमा शुक्रबार कर सचेतना कार्यक्रम सम्पन्न भएको छ।
कलेजको म्यानेजमेन्ट संकायका दोस्रो तथा तेस्रो वर्षमा अध्ययनरत करिब ५० जना विद्यार्थी तथा प्राध्यापकहरूको सहभागितामा आयोजित कार्यक्रममा पोखरा महानगरपालिका राजश्व विभागका कर अधिकृत दिपेन्द्र पण्डितले कर सम्बन्धी सचेतनामूलक प्रस्तुति दिनुभएको थियो।
कार्यक्रममा कलेज प्रमुख डिल्लिराम पौडेल प्रमुख अतिथि तथा उपप्रमुख विमल न्यौपाने विशेष अतिथिका रूपमा उपस्थित हुनुहुन्थ्यो। सम्बन्धित विषयका विद्यार्थीहरूको सहभागिता रहेकाले कार्यक्रम निकै अन्तरक्रियात्मक र उपलब्धिमूलक बनेको थियो। कार्यक्रममा सुरुदेखि नै विद्यार्थीहरूले कर प्रणाली, राजस्व प्रशासन तथा हालका कर सम्बन्धी नीतिहरूका विषयमा विभिन्न जिज्ञासा राखेका थिए।
विद्यार्थी सागर तिवारीले व्यक्तिगत आयकरको सीमा तथा सरकारले हालै घोषणा गरेका नयाँ व्यवस्थाबारे प्रश्न गर्नुभयो भने गणेश देवकोटाले सम्पत्ति करको मापदण्ड र मूल्यांकन प्रक्रियाबारे जिज्ञासा राख्नुभयो। त्यसैगरी अमृत रानाभाटले हालैको बजेटमार्फत निष्क्रिय तथा कारोबार नदेखाइएका फर्मलाई पछिल्लो एक वर्षको मात्र हिसाब चुक्ता गरे पुग्ने व्यवस्था सम्बन्धी प्रश्न गर्नुभयो।
विद्यार्थी सुशिला तिवारीले विज्ञापन करका विषयमा प्रश्न गर्दै बजारमा राखिएका होर्डिङ बोर्ड तथा सवारीसाधनमा टाँसिएका विज्ञापन सामग्रीमा पनि कर लाग्ने वा नलाग्ने, साथै कर नतिर्नेहरूलाई कसले अनुगमन तथा कारबाही गर्छ भन्ने विषयमा जिज्ञासा व्यक्त गर्नुभयो।
यस्तै, दिपिका पौडेलले घरबहाल कर घरधनीले तिर्ने कि भाडावालाले भन्ने प्रश्न राख्नुभयो भने विवेक केसीले धितो मूल्यांकनको मापदण्ड देशभर एउटै हुने वा फरक हुने तथा महानगरपालिकामा तिर्नुपर्ने कर अनलाइनमार्फत भुक्तानी गर्न सकिने वा नसकिने विषयमा प्रश्न गर्नुभयो।
कार्यक्रमको अन्त्यमा सहभागी विद्यार्थीहरूले पाठ्यपुस्तकबाट प्राप्त ज्ञानभन्दा बाहिरका व्यावहारिक विषयमा समेत जानकारी प्राप्त भएको र आफ्ना धेरै जिज्ञासाको समाधान भएको प्रतिक्रिया दिएका थिए। कार्यक्रमले विद्यार्थीहरूमा करप्रति सकारात्मक सोच तथा जिम्मेवार नागरिकको भावना विकास गर्न महत्वपूर्ण योगदान पुगेको सहभागीहरूको भनाइ रहेको थियो।
पोखरा, असार ५ – पोखरा महानगरपालिका वडा नं. २९ भण्डारढिकस्थित श्री जनप्रकाश माध्यमिक विद्यालयमा शुक्रबार कर सचेतना कार्यक्रम सम्पन्न भएको छ।
विद्यालयका संयोजक तथा प्राध्यापक मनोज पौडेलको प्रमुख उपस्थितिमा आयोजित कार्यक्रममा कक्षा ११ र १२ मा अध्ययनरत ५७ जना विद्यार्थी सहभागी भएका थिए। कार्यक्रमको सहजीकरण पोखरा महानगरपालिका राजश्व विभागका अधिकृत सूर्य पौडेलले गर्नुभएको थियो।
करिब डेढ घण्टासम्म सञ्चालन भएको कार्यक्रममा करको महत्व, स्थानीय तथा संघीय कर प्रणाली, नागरिकको करप्रतिको दायित्व तथा करबाट हुने विकास निर्माणका विषयमा जानकारी दिइएको थियो।
कार्यक्रमको अन्त्यमा आयोजित प्रश्नोत्तर सत्रमा विद्यार्थीहरूले कर तथा राजश्वसँग सम्बन्धित विभिन्न जिज्ञासा राखेका थिए। कक्षा १२ की छात्रा सविता पौडेलले लामो समयदेखि तिरो नतिरेको जग्गामा लाग्ने जरिवाना तथा हजुरबुवाको नाममा रहेको जग्गा पुस्तान्तरण प्रक्रियाबारे प्रश्न गर्नुभएको थियो। यस्तै, अभिषेक ढकालले नेपालमा कर प्रणालीको सुरुवात कहिलेदेखि भएको हो भन्ने जिज्ञासा राख्नुभयो।
कक्षा ११ का गौतम तिमिल्सिनाले फोहोर व्यवस्थापन शुल्क उठाइनुको कारणबारे प्रश्न गर्नुभएको थियो भने कक्षा १२ की पल्लवी बानियाँले तिरो निर्धारणका आधार, समयमै कर तिर्दा पाइने छुट तथा ढिलो तिर्दा लाग्ने जरिवानाबारे जानकारी माग्नुभयो।
त्यसैगरी कक्षा ११ का रोहित लामिछानेले साना व्यवसायीले आन्तरिक राजश्व कार्यालयमा दर्ता हुनुपर्ने आवश्यकता तथा महानगरपालिकामा व्यवसाय दर्ता गर्दा हुने फाइदाबारे प्रश्न राख्नुभयो। कक्षा ११ की सुलोचना सिग्देलले सम्पत्ति कर र गैरकर राजश्वबारे जिज्ञासा व्यक्त गर्नुभएको थियो। विद्यार्थीहरूले राखेका सबै प्रश्नको जवाफ अधिकृत पौडेलले दिनुभएको थियो।
कार्यक्रम सम्पन्न भएपछि विद्यालयका शिक्षकहरूले महानगरपालिकाले यस्ता सचेतनामूलक कार्यक्रम वर्षमा दुईदेखि तीन पटकसम्म सञ्चालन गर्नुपर्ने सुझाव दिएका छन्। महानगरपालिकाबाट प्रत्यक्ष रूपमा यस्ता कार्यक्रम सञ्चालन हुँदा विद्यार्थीहरूमा करसम्बन्धी ज्ञान, जिम्मेवारीबोध र नागरिक चेतना अभिवृद्धि हुने प्रतिक्रिया शिक्षकहरूले व्यक्त गरेका छन्।
पोखरा, असार ३ – पोखरा महानगरपालिका राजश्व महाशाखाको आयोजना तथा बाराही सञ्चार प्रालिको सहजीकरणमा पोखरा–१३ काजीपोखरीस्थित कालिका बहुमुखी क्याम्पसको सभाहलमा बुधबार कर सचेतना कार्यक्रम सम्पन्न भएको छ।
कार्यक्रममा क्याम्पस प्रमुख प्राध्यापक विरन्जी गौतम प्रमुख अतिथि रहनुभएको थियो। विशिष्ट अतिथिका रूपमा सहायक क्याम्पस प्रमुख युवराज गुरुङ र शालिकराम तिमिल्सिना सहभागी हुनुभएको थियो। त्यस्तै व्यवस्थापन संकाय प्रमुख सन्तोषमणि लामिछाने, प्राध्यापक विष्णुप्रसाद तिमिल्सिना तथा विद्यार्थी कल्याणकारी सहअध्यक्ष तेजेन्द्र केसी अतिथिका रूपमा उपस्थित हुनुहुन्थ्यो। आयोजक पोखरा महानगरपालिका राजश्व महाशाखाका तर्फबाट कर अधिकृत आविष्कार पौडेल सहभागी हुनुभएको थियो।
ब्याचलर प्रथम र द्वितीय तहका गरी १७० भन्दा बढी विद्यार्थीको सहभागिता रहेको कार्यक्रममा प्रमुख अतिथि गौतमले कर तिर्नु प्रत्येक नागरिकको दायित्व भएको बताउनुभयो। करसम्बन्धी ज्ञान भएका व्यक्तिहरूले समाजमा अरूलाई पनि कर तिर्न प्रोत्साहित गर्नुपर्ने उल्लेख गर्दै उहाँले नागरिकले तिरेको करबाट नै राज्यका निकाय सञ्चालन हुने बताउनुभयो।
कार्यक्रममा करसम्बन्धी सचेतना प्रदान गरिएपछि आयोजित प्रश्नोत्तर सत्रमा विद्यार्थी तथा प्राध्यापकहरूले विभिन्न जिज्ञासा राखेका थिए। विद्यार्थी कल्याणकारी सहअध्यक्ष तेजेन्द्र केसीले बहाल कर घरधनीले तिर्ने वा व्यवसायीले तिर्ने भन्ने विषयमा प्रश्न गर्नुभयो।
विद्यार्थी आरती न्यौपानेले कर तिर्ने प्रक्रिया, निजी विद्यालय दर्ता प्रक्रिया तथा उनीहरूले तिर्ने करको आधारबारे जिज्ञासा राख्नुभयो। त्यस्तै विद्यार्थी सरस्वती पौडेलले पोखराको महेन्द्रपुल आसपास क्षेत्रमा ठेलामा व्यापार गर्ने व्यवसायीहरूको दर्ता अवस्था तथा दर्ताको अनिवार्यताबारे प्रश्न गर्नुभयो।
सहायक क्याम्पस प्रमुख युवराज गुरुङले व्यक्तिगत आयकरको सीमा तथा नयाँ बजेटमा उल्लेख गरिएको शैक्षिक शुल्क विद्यार्थीले तिर्ने वा विद्यालयले व्यहोर्ने विषयमा प्रश्न राख्नुभयो। अर्का सहायक क्याम्पस प्रमुख शालिकराम तिमिल्सिनाले सरकारले तोकेको आयकर सीमा परिवारका लागि लागू हुने वा प्रत्येक व्यक्तिका लागि छुट्टाछुट्टै लागू हुने भन्ने विषयमा जिज्ञासा व्यक्त गर्नुभयो।
उठाइएका सम्पूर्ण प्रश्न तथा जिज्ञासाको जवाफ कर अधिकृत आविष्कार पौडेलले दिनुभएको थियो।
झण्डै साढे दुई घण्टा सञ्चालन भएको कार्यक्रमबाट कर तथा राजश्वसम्बन्धी धेरै जानकारी प्राप्त भएको सहभागी विद्यार्थीहरूले बताएका थिए। कार्यक्रमको अन्त्यमा सहभागीहरूलाई शैक्षिक सामग्रीस्वरूप एक–एक प्रति कापी र कलम तथा बिहानी खाजा वितरण गरिएको थियो।
पोखरा असार ३ गते।
पोखरा महानगरपालिका राजश्व महाशाखाको आयोजना तथा बाराही सञ्चार प्रालिको सहजीकरणमा कर सचेतना कार्यक्रम सम्पन्न भएको छ।
पोखरा–१ स्थित राष्ट्रिय माध्यमिक विद्यालय, टुँडिखेलमा आयोजित कार्यक्रममा विद्यालयका ७० भन्दा बढी विद्यार्थीहरूको सहभागिता रहेको थियो। कार्यक्रमका प्रमुख अतिथि विद्यालयका प्रधानाध्यापक ईश्वरी प्रसाद सापकोटा तथा विशिष्ट अतिथि सहायक प्राध्यापक शंकर तिवारी रहनुभएको थियो।
कार्यक्रमलाई सम्बोधन गर्दै प्रधानाध्यापक सापकोटाले विद्यार्थीहरूलाई विषयवस्तु ध्यानपूर्वक सुन्न र मनन गर्न आग्रह गर्नुभयो। उहाँले सच्चा नागरिकको पहिलो परिचय नै देशप्रतिको इमान्दारिता भएको उल्लेख गर्दै नागरिकले तिरेको कर पुनः जनताकै सेवा र सुविधाका लागि राज्यले खर्च गर्ने बताउनुभयो।
कार्यक्रममा पोखरा महानगरपालिका राजश्व महाशाखाका कर अधिकृत सूर्य पौडेल र आविष्कार पौडेलले करसम्बन्धी सहजीकरण गर्नुभएको थियो।
अन्तरक्रियाका क्रममा विद्यार्थीहरूले कर तथा राजश्वसँग सम्बन्धित विभिन्न जिज्ञासा राखेका थिए। विद्यार्थी आलोक मैनालीले डिजिटल प्लेटफर्मबाट हुने कारोबारमा लाग्ने करका विषयमा प्रश्न गर्नुभयो। कक्षा १२ मा अध्ययनरत रेखा पौडेलले व्यक्तिगत प्यान (Personal PAN) र व्यावसायिक प्यान (Business PAN) बीचको भिन्नताबारे जिज्ञासा राख्नुभयो।
त्यसैगरी विद्यार्थी दिलिप पाठकले पोखरामा पार्किङ शुल्क संकलन सम्बन्धी विषयमा प्रश्न उठाउनुभयो भने कक्षा १२ का रोहित केसीले कवाडी संकलन केन्द्रको संख्या, सञ्चालनका मापदण्ड तथा मापदण्डविपरीत सञ्चालन भएका केन्द्रमाथि हुने नियमनबारे प्रश्न गर्नुभयो। कक्षा ११ की मेनुका आचार्यले विदेश अध्ययनका लागि दर्ता गरिएको व्यवसाय नवीकरण नगरे के हुने भन्ने विषयमा जिज्ञासा राख्नुभएको थियो।
विद्यार्थीहरूले उठाएका सबै प्रश्न तथा जिज्ञासाको जवाफ कर अधिकृत सूर्य पौडेल र आविष्कार पौडेलले दिनुभएको थियो।
पोखरा – जुन १४ मा २०२६ (दोस्रो) हिमालयन रिम फिल्म प्रदर्शनीको नेपाल चरण पोखरामा सफलतापूर्वक सम्पन्न भएको छ। चलचित्रलाई सांस्कृतिक सेतुका रूपमा प्रयोग गर्दै आयोजित यस प्रदर्शनीले उच्चस्तरीय शैक्षिक संवाद र फिल्म प्रदर्शनमार्फत चीन र नेपालबीच जनस्तरको आदानप्रदानलाई सुदृढ बनाएको छ। यस कार्यक्रमले स्थानीय विद्यार्थी तथा चलचित्रकर्मीहरूलाई चिनियाँ वुसिया (मार्सल आर्ट) चलचित्रको समकालीन आकर्षण र डिजिटल प्रविधिको सामर्थ्यसँग परिचित गराउनुका साथै दुवै देशका कलाकारहरूबीच कलात्मक सहानुभूति र संवादको साझा मञ्च पनि निर्माण गरेको छ।
प्रदर्शनीको पहिलो चरण त्रिभुवन विश्वविद्यालयबाट सुरु भएको थियो, जहाँ द लेजेन्ड अफ द कन्डोर हिरोजः द ग्यालेन्ट्स र ब्लेड्स अफ द गार्डियनः विन्ड राइजेस इन द डेजर्ट प्रदर्शन गरिएका थिए। कार्यक्रममा सहभागी प्राध्यापक तथा विद्यार्थीहरूले चिनियाँ वुसिया चलचित्रमा देखाइएको शौर्य र नैतिकताको आधुनिक पुनर्व्याख्याले नेपाली कलामा पाइने प्रकृति र मानवबीचको आध्यात्मिक सम्बन्धसँग गहिरो सामञ्जस्य महसुस गराएको बताए। यसै क्रममा बेइजिङ नर्मल विश्वविद्यालयका प्राध्यापक झाङ यानले “चिनियाँ वुसिया सिनेमा : शताब्दीदेखि विश्वसम्म” शीर्षकमा विशेष व्याख्यान दिँदै वुसिया संस्कृतिको विश्वव्यापी यात्रा र आधुनिक सन्तुलनबारे प्रकाश पारे।
त्यसपछि प्रदर्शनी पोखरा विश्वविद्यालय पुगेको थियो, जहाँ हिमालयन रिम फिल्म प्रदर्शनीकी संस्थापक हुआङ जुनयानले उद्घाटन मन्तव्य व्यक्त गरेकी थिइन्। जुन १३ को बिहान आयोजित विशेष फोरमको अध्यक्षता एरिजोना स्टेट विश्वविद्यालयका सहप्राध्यापक मा रुइछिङले गरेका थिए। उनले चीनको एक अग्रणी एआई कम्पनीका जेनेरेटिभ एआई मार्केटिङ विशेषज्ञ रायनसँग “वुसिया चलचित्रदेखि एआई बजारसम्म” विषयमा गहन संवाद सञ्चालन गरेका थिए। उक्त छलफलमा कृत्रिम बुद्धिमत्ताले चलचित्र निर्माण, उत्पादन प्रक्रिया र बजार संरचनामा ल्याइरहेको परिवर्तनलाई औद्योगिक र प्राविधिक दुवै दृष्टिकोणबाट विश्लेषण गरिएको थियो। त्यसपछि प्राध्यापक माले “सीमाहीन शौर्य : चिनियाँ वुसिया सिनेमा र विश्व दर्शक” शीर्षकमा व्याख्यान दिँदै शौर्यको भावना कसरी विभिन्न संस्कृतिमा फैलिएको छ र किन विश्वभरका दर्शकहरूसँग जोडिन सफल भएको छ भन्ने विषयमा विस्तृत चर्चा गरे।
चलचित्र प्रदर्शनअन्तर्गत द मास्टर ले यथार्थवादी कुंगफु सौन्दर्य र जियाङ्हु संस्कृतिप्रतिको प्रतिबद्धता प्रस्तुत गरेको थियो भने आई एम ह्वाट आई एम २ ले डिजिटल दृश्य प्रभावमार्फत साधारण युवाहरूको सपना पूरा गर्ने अटल प्रयासलाई चित्रण गरेको थियो। यी दुई चलचित्रले चिनियाँ सिनेमामा नायकत्व र जीवनदर्शनलाई व्यापक रूपमा प्रस्तुत गरेका थिए। प्रदर्शनपछि द मास्टर का निर्देशक शु हाओफेङले लाइभमार्फत दर्शकहरूसँग चिनियाँ मार्सल सौन्दर्यशास्त्रबारे अन्तरक्रिया गरेका थिए भने आई एम ह्वाट आई एम २ का सहनिर्माता ली यिलिनले सिर्जना प्रक्रिया र एनिमेटेड चलचित्रको अन्तर्राष्ट्रिय अभिव्यक्तिबारे आफ्ना अनुभव साझा गरेका थिए।
शैक्षिक कार्यक्रम र चलचित्र प्रदर्शनका अतिरिक्त दिनभर सञ्चालन भएको वुसिया फेयर तथा “बु यी झेन जोङ” हस्तकला कार्यशालामा सहभागीहरूले स्थानीय कपडा शिल्पीहरूको मार्गदर्शनमा साना हात्तीका आकृति तयार गरेका थिए। सांस्कृतिक समिश्रणको प्रतीक मानिने यी हस्तकलाले विद्यार्थीहरूलाई आफ्नै हातबाट दैनिक जीवनको सौन्दर्य अनुभव गर्ने अवसर प्रदान गरेको थियो। साथै, एआईजीसी प्रविधिबाट सिर्जना गरिएको प्रदर्शनीको विषय गीत द एन्डलेस राइड पनि सार्वजनिक गरिएको थियो, जसले हिमालय क्षेत्रका युवाहरूबीच सभ्यतागत आदानप्रदान र संवादलाई समकालीन सांगीतिक स्वर दिएको छ।
यो प्रदर्शनी नेपालका परराष्ट्रमन्त्रीको चीन भ्रमणसँग पनि संयोग परेको थियो, जसले दुई देशबीच उच्चस्तरीय आदानप्रदान निरन्तर सुदृढ बन्दै गएको संकेत दिएको छ र जनस्तरको सम्बन्धलाई नयाँ गति प्रदान गरेको छ। सभ्यता र भावनालाई जोड्ने महत्वपूर्ण सांस्कृतिक मञ्चका रूपमा रहेको यस प्रदर्शनीले प्रकाश र छविलाई माध्यम तथा वुसियालाई पुलका रूपमा प्रयोग गर्दै हिमालय क्षेत्रका देशहरूबीच दीर्घकालीन सांस्कृतिक अन्तरक्रियाको नयाँ मार्ग प्रशस्त गरेको छ। यो केवल अन्तर्राष्ट्रिय चलचित्र महोत्सव मात्र नभई चीन र नेपालका युवाहरूले साझा समझदारी, सिर्जनशीलता र भविष्यको कल्पनालाई सँगै अघि बढाउने जीवन्त अभ्यासका रूपमा पनि स्थापित भएको छ।
चलचित्र प्रदर्शन, सांस्कृतिक अनुभव र सिर्जनाकर्तासँगको संवादमार्फत यस प्रदर्शनीले चिनियाँ वुसिया सिनेमाको शौर्य भावना र पूर्वीय सौन्दर्यबोधलाई विश्वविद्यालय परिसरमा अन्तरसांस्कृतिक भावनात्मक सम्बन्धमा रूपान्तरण गर्न सफल भएको छ। पर्दामा देखिएका जियाङ्हुका कथादेखि वास्तविक जीवनका युवा संवादसम्म फैलिएको यो आदानप्रदानले चीन र नेपालका चलचित्रकर्मीबीचको सम्बन्धलाई अझ प्रगाढ बनाउनुका साथै आजको परिवेशमा एशियाली मौलिक संस्कृतिको पारस्परिक अध्ययन र अभिव्यक्तिका लागि नयाँ सम्भावनाहरू पनि सिर्जना गरेको छ। कार्यक्रम सफलतापूर्वक सम्पन्न भए पनि प्रकाश, चलचित्र र परम्पराको यो संगम हिमालय क्षेत्रभरि अझै प्रतिध्वनित भइरहने विश्वास गरिएको छ।
काठमाडौं ।
प्रधानमन्त्री बालेन्द्र शाहले सीमा समस्याबारे दिएको विवादित अभिव्यक्तिविरुद्ध नेकपा माओवादीले काठमाडौंमा प्रदर्शन गरेको छ ।प्रधानमन्त्री बालेको अभिव्यक्ति राष्ट्रघाती भएको भन्दैमाओवादीका कार्यकर्ताले शनिबार काठमाडौंको माइतिघरमा विरोध प्रदर्शन गरेका हुन् ।
उनीहरूले सुस्ताका देशभक्त नेपालीहरूलाई राज्यले सम्मान दिनुपर्ने, सीमाको रक्षाका लागि सरकार गम्भीर हुनुपर्ने भन्दै नाराबाजी समेत गरेका थिए ।प्रदर्शनकारीहरूले सीमा अतिक्रमण बन्द गर, सुस्तामा भारतीयको हस्तक्षेपको प्रतिरोध गरौं, भौगोलिक अखण्डताको रक्षा गरौं लगायतका प्लेकार्ड समेत प्रदर्शन गरेका थिए ।
काठमाडौं ।
प्रहरी प्रधान कार्यालयले काभ्रेपलाञ्चोक जिल्लाको नमोबुद्ध नगरपालिका २ बुच्चाकोटमा शुक्रबार भएको बस दुर्घटनाको वास्तविक कारण पत्ता लगाउन नेपाल प्रहरी प्रदेश कार्यालय, काभ्रेका प्रहरी वरिष्ठ उपरीक्षक कमल थापाको संयोजकत्वमा छ सदस्यीय छानबिन समिति गठन गरेको हो ।
बनेपाबाट रोशी खार्पाचोकतर्फ जाँदै गरेको बा३ख ८३९८ नम्बरको बस अनियन्त्रित भई सडकबाट करिब ३०० मिटर तल खसेर दुर्घटना हुँदा बसमा सवार आठ यात्रुको घटनास्थलमा मृत्यु भएको थियो । दुर्घटनामा घाइते भएका १६ जना यात्रुको धुलिखेल अस्पतालमा उपचार भइरहेको छ ।
समितिले घटनाको वास्तविक अवस्था, कारण तथा जिम्मेवार पक्ष पहिचान गरी सत्य, तथ्य छानबिन गरी सात दिनभित्र प्रतिवेदन पेस गर्नुपर्ने प्रहरी प्रधान कार्यालयले जनाएको छ ।
रोशी गाउँपालिका ६ का ७३ वर्षीय मेघबहादुर तामाङ, सोही स्थानका ५५ वर्षीय राजु तामाङ र ७५ वर्षीय इन्द्रबहादुर तामाङ, रोशी ७ की ३४ वर्षीया फूलमाया तामाङ, सोही स्थानकी ६० वर्षीया माया तामाङ, रोशी ८ की ६० वर्षीया प्यारीमाया तामाङ, दैलेख घर भई त्रिनेत्र दल गण भकुण्डेवेँशीमा कार्यरत नेपाली सेनाका ३० वर्षीय अमलदार बमबहादुर भण्डारी र सिन्धुलीको घ्याङ्लेक गाउँपालिका ४ निवासी २२ वर्षीय सुमी तामाङको घटनास्थलमा मृत्यु भएको जिल्ला प्रहरी कार्यालयका सूचना अधिकारी, प्रहरी नायब उपरीक्षक रविन विष्टले जानकारी दिए।
उनका अनुसार दुर्घटनामा परी घाइते भएका १६ जनाको धुलिखेल अस्पतालमा उपचार भइरहेको छ । दुर्घटनाबारे अनुसन्धान तथा मृतकका आफन्तलाई सम्पर्क गरी आवश्यक कानुनी प्रक्रिया अघि बढाइएको छ ।
हुम्ला।
हुम्लाको सर्केगाड गाउँपालिकामा पर्ने थाग्णामा कर्णाली करिडोर माथिबाट खसेको ढुङ्गाले लागेर एक किशोरीको मृत्यु भएको छ ।सर्केगार्ड गाउँपालिका–४ गैरीसाँयाकी १५ वर्षीया पवित्रा साउद आज बिहान गाईगोरु चराउन जङ्गल गएकी थिइन्। बिहान करिब १०ः३० बजे करिडोरको माथिल्लो भागबाट अचानक खसेको ढुङ्गा लाग्दा उनको घटनास्थलमा नै मृत्यु भएको जिल्ला प्रहरी कार्यालयका प्रहरी नायब उपरीक्षक शङ्कर पोखरेलले बताए ।
कर्णाली करिडोर आसपासका भिरालो क्षेत्रमा बर्सेनि ढुङ्गा खस्ने जोखिम रहँदै आएको छ । यस घटनाले पुनः सडकमाथिका जोखिमयुक्त भिरहरूको व्यवस्थापन, नियमित अनुगमन तथा यात्रु र स्थानीय बासिन्दाको सुरक्षाका लागि प्रभावकारी उपाय अवलम्बन गर्नुपर्ने आवश्यकता औँल्याएको छ । स्थानीयले यस्ता दुर्घटना दोहोरिन नदिन सम्बन्धित निकायको तत्काल ध्यानाकर्षण गराएका छन् ।
पोखरा।
राष्ट्रिय स्वतन्त्र पार्टी (रास्वपा) गण्डकी प्रदेश समिति सभापतिमा कास्कीका नवीन त्रिपाठी विजयी भएका छन् ।शुक्रबारदेखि पोखरामा सुरु भयको अधिवेशनमा नयाँ नेतृत्वका लागि शुक्रबार राति भएको मतदानको सनिवार सम्पन्न मतगणनामा त्रिपाठीले २ सय ३४ मत ल्याएर विजयी भएका हुन् ।
सभापतिका प्रत्याशीहरू निर्वतमान सभापति एवं प्रतिनिधिसभाका सांसद राजन गौतमले १ सय ८२, माधव कँडेलले ११ र डा. हरि कार्कीले २ मत प्राप्त गरे । रास्वपाको विधानमा सभापति निर्वाचित हुन कुल मतदानको ५१ प्रतिशत मत पाउनुपर्ने व्यवस्था छ । त्रिपाठीले पहिलो चरणमै मत पाएर निर्वाचित भएको निर्वाचन समितिका संयोजक डा. राम गुरुङले जानकारी र्दिए । अधिवेशनमा कूल ७ सय ८० प्रतिनिधि रहे पनि ४ सय ३७ जनाले मात्र मतदानमा सहभागिता जनाएका थिए ।
रास्वपा गण्डकी प्रदेशको सदस्यका लागि ५१ जनाले उम्मेदवारी दिएका थिए । जसमध्येबाट विभिन्न कलस्टरसहित ३३ जना निर्वाचित हुन्छन् । ५१ आकांक्षीमध्ये क्षेत्रगत प्रदेश सदस्यका लागि २८ जना उम्मेदवार छन् । यी २८ जनाबाट गण्डकी प्रदेशको १८ वटा प्रतिनिधिसभा सदस्य निर्वाचन क्षेत्रका १–१ जना निर्वाचित हुन्छन् । समावेशी प्रदेश सदस्यका लागि २३ जनाको उम्मेदवारी परेको थियो । प्रदेश सदस्यका लागि ५१ आकांक्षीमध्ये १२ जना निर्विरोध निर्वाचित भएका छन् । क्षेत्रगत प्रदेश सदस्यतर्फबाट बागलुङ–१ का मीना शर्मा आचार्य, गोरखा–१ बाट मनोज गुरुङ, गोरखा–२ बाट बलबहादुर घले, लमजुङबाट विजय पराजुली, म्याग्दीबाट ताराबहादुर कार्की र तनहुँ–१ बाट सूर्यमणि पौडेल निर्विरोध निर्वाचित भएको निर्वाचन समितिले जनाएको छ ।
प्रदेश समावेशी सदस्यमा खसआर्य महिलाबाट सीताकुमारी अर्याल, कृष्णकुमारी अधिकारी (अनिशा) र राममाया बस्ताकोटी निर्विरोध निर्वाचित भएका छन् ।
मुस्लिम महिलाबाट समिउन निशा, दलित महिलाबाट गीता विश्वकर्मा र अपाङ्गता भएका खसआर्यबाट यदुनाथ सिग्देल निर्विरोध निर्वाचित भएका छन् ।
पोखरा।
पोखरा महानगरपालिका खेलकुद विकास समितिको आयोजनामा ‘दोस्रो पोखरा खेलकुद महोत्सव तथा मार्सल आर्ट फेस्टिभल २०८३’ शनिबारदेखि औपचारिक रूपमा सुरुवात भएको छ । खेलकुद गतिविधिलाई थप व्यवस्थित, समावेशी तथा प्रतिभामुखी बनाउने उद्देश्यका साथ आयोजित महोत्सवको उद्घाटन पोखरा महानगरपालिकाका प्रमुख धनराज आचार्यले गरेका हुन् ।
उद्घाटन समारोहलाई सम्बोधन गर्दै प्रमुख आचार्यले खेलकुद व्यक्तिगत स्वास्थ्य, अनुशासन र समग्र व्यक्तित्व विकासको महत्वपूर्ण आधार भएको बताए। विद्यालय तहदेखि नै खेलकुदको विकास र प्रवर्द्धन गर्न सकिए भविष्यमा राष्ट्रिय तथा अन्तर्राष्ट्रिय स्तरका खेलाडी उत्पादन गर्न सकिने उनको भनाइ थियो। महानगरपालिकाले खेल क्षेत्रको विकासका लागि योजनाबद्ध रूपमा कार्यक्रम सञ्चालन गरिरहेको उल्लेख गर्दै उनले चालु आर्थिक वर्षका बाँकी खेल गतिविधि सम्पन्न गर्ने क्रममा खेल महोत्सव आयोजना गरिएको र आगामी वर्ष पनि खेल क्षेत्रलाई विशेष प्राथमिकता दिइने प्रतिबद्धता व्यक्त गरे।
पोखरा महानगरपालिका खेलकुद विकास समितिका अध्यक्ष दीपक बहादुर गोदारले महोत्सव असार ७ गतेसम्म सञ्चालन हुने जानकारी दिए । उनका अनुसार महोत्सवमा कुल ११ वटा खेल समावेश गरिएका छन् । तीमध्ये दुई वटा राष्ट्रियस्तरका प्रतियोगिता र पाँच वटा ग्रासरुट तहका खेल कार्यक्रम रहेका छन् । साथै ह्विलचियर बास्केटबल, बौद्धिक अपाङ्गता दौड, बोसिया तथा दृष्टिविहीन क्रिकेट जस्ता समावेशी खेलहरू पनि महोत्सवमा समेटिएका छन् ।
कार्यक्रममा खेलकुद विकास समितिका सल्लाहकार तेजबहादुर गुरुङ, समितिका सदस्य पोषण बहादुर थापा लगायतले खेलकुदको विकास र समावेशी सहभागिताको महत्वबारे धारणा राखेका थिए। कार्यक्रमको सञ्चालन समितिका सदस्य सचिव सुरज अधिकारी ले गरेका थिए।
महोत्सवअन्तर्गत दृष्टिविहीन क्रिकेट प्रतियोगिता सम्पन्न भइसकेको छ। यस प्रतियोगितामा टिम ‘बी’ विजेता तथा टिम ‘ए’ उपविजेता बनेका थिए । विजेता टोलीले २० हजार रुपैयाँ नगदसहित ट्रफी र प्रमाणपत्र प्राप्त गरेको छ भने उपविजेता टोलीले १० हजार रुपैयाँ नगद, ट्रफी र प्रमाणपत्र प्राप्त गरेको छ।
यसैबीच, मार्सल आर्ट फेस्टिभल २०८३ अन्तर्गतको मुवाथाई प्रतियोगिताको समेत महानगर प्रमुख आचार्यले उद्घाटन गरेका छन्। सो अवसरमा अन्तर्राष्ट्रिय मुवाथाई प्रशिक्षक दीपक श्रेष्ठ लाई सम्मान गरिएको थियो ।
उद्घाटन समारोहमा सांस्कृतिक नृत्य प्रस्तुतिले थप आकर्षण थपेको थियो। खेलकुद महोत्सवले खेलाडी, प्रशिक्षक तथा खेलप्रेमीलाई उत्साहित बनाएको आयोजकको भनाइ छ।
