२०८३ मंसिर १ सोमबार
२०८३ मंसिर १ सोमबार

पोखरा, २५ माघ ।

पोखरा महानगरपालिका–११ मा रहेको नोबेल सेकेन्डरी स्कुलले २०औँ वार्षिक उत्सव तथा पुरस्कार वितरण कार्यक्रम सम्पन्न गरेको छ । कार्यक्रमको उद्घाटन गर्दै पोखरा महानगरपालिका वडा नम्बर ११ का वडाध्यक्ष प्रेमप्रसाद कर्मचारीले गुणस्तरीय तथा आत्मनिर्भर शिक्षा आजको समयको प्रमुख आवश्यकता भएको बताउनुभयो। उहाँले विद्यालय शिक्षासँगै सीपमूलक तथा अतिरिक्त क्रियाकलापलाई समेत प्राथमिकता दिनुपर्नेमा जोड दिँदै यस दिशामा अझ प्रभावकारी कार्यक्रम अघि बढाउन विद्यालयलाई सुझाव दिनुभयो । प्याव्सन कास्कीका अध्यक्ष सडानन्द गौतमले पछिल्लो समयमा युवा शक्ति विदेशीका कारण बिद्यार्थीहरुको सङख्या घट्दो क्रममा रहेको बताउनु भयो ।

विद्यालयका प्राचार्य रत्नमान गुरुङको अध्यक्षतामा शनिबार सम्पन्न भएको कार्यक्रममा अभिभावक रमेश परियारले वोल्नु भएको थियो भने विद्यार्थी तृप्ति रानाले स्वागत बिद्यालयका सह–प्राचार्य ललित मगरले संचालन गर्नु भएको थियो ।

उक्त अवसरमा विद्यार्थीहरूले प्रस्तुत गरेका विभिन्न सांस्कृतिक तथा मनोरञ्जनात्मक कार्यक्रमले सहभागी अभिभावक तथा अतिथिहरूलाई भरपूर मनोरञ्जन प्रदान गरेको थियो। कार्यक्रममा शैक्षिक तथा अतिरिक्त क्रियाकलापमा उत्कृष्ट प्रदर्शन गर्ने विद्यार्थीहरूलाई पुरस्कार प्रदान गरिएको थियो । विद्यालयले शैक्षिक गुणस्तर वृद्धि गर्दै समग्र व्यक्तित्व विकासमा जोड दिँदै आएको विद्यालय प्रशासनको भनाइ छ ।

पोखरा, २५ माघ ।

चार वटा उमेर समुहमा खुल्ला राष्ट्रिय मोहन मेमोरियल अन्तरविद्यालय स्तरिय ब्याडमिन्टन प्रतियोगिता आउदो फागुन महिनाको पहिलो हप्ता पोखरामा हुने भएको छ । मोहन भूगोल ब्याडमिन्टन फाउण्डेसन र फिट नेपाल स्पोट्र्सप्लेक्सको आयोजनामा पोखरा महानगरपालिका–१०, हस्पिटल चोकस्थित फिट नेपाल स्पोट्र्सप्लेक्समा फागुन १ देखि ३ गतेसम्म उक्त प्रतियोगिता सञ्चालन हुने भएको आइतबार पोखरामा आयोजित पत्रकार सम्मेलनमा जानकारी गराइएको हो ।

मोहन मेमोरियल अन्तरविद्यालय स्तरीय ब्याडमिन्टन प्रतियोगिता–२०८२ को पाँचौँ संस्करणमा यू–११, य्रू–१३, यू–१७, र यू–१९ छात्र तथा छात्रा उमेर समूहका खेलाडीहरूको प्रतिष्प्रर्धा गर्ने भएका भएको फाउण्डेसनका अध्यक्ष भूगोल गुरुङले बताउनु भयो । ब्याडमिन्टन खेलमार्फत विद्यालय तहदेखि राष्ट्रिय तथा अन्तर्राष्ट्रिय स्तरसम्मका उदयमान खेलाडीहरूको प्रतिभा पहिचान गर्ने, खेलकुद विकासलाई टेवा दिने तथा प्रतिस्पर्धात्मक वातावरण सिर्जना गर्ने उद्देश्य सहित प्रतियोगिता आयोजना गर्न लागिएको उहाँले जनाउनु भयो ।

प्रतियोगितामा देशभरका विभिन्न विद्यालयका खेलाडीहरूको सहभागिता रहने पूर्व राष्ट्रिय तथा अन्त्राष्ट्रिय खेलाडी समेत रहनु भएको अध्यक्ष गुरुङले जनाउनु भयो । प्रतियोगिता अन्तर्गत यू—११ र यू—१३ तर्फका विजेता खेलाडीहरुलाई मेडल, प्रमाणपत्र तथा गिफ्ट ह्याम्पर प्रदान गरिनेछ । त्यसैगरी यू–१७ तथा यू–१९ समूहमा प्रथम हुने खेलाडीले जनही मेडल, ट्रफी, प्रमाणपत्रसहित नगद ४० हजार रुपैयाँ, द्वितीयले २० हजार र तृतीयले १५ हजार रुपैयाँ पुरस्कार प्राप्त गर्नेछन् । साथै समग्र पदक तालिकाका आधारमा उत्कृष्ट प्रदर्शन गर्ने विद्यालयलाई ‘बेस्ट स्कूल ट्रफी’ प्रदान गरिने आयोजकले जनाएको छ ।

पत्रकार सम्मेलनमा बोल्दै जापानी प्रशिक्षक टि–यामामोतोले नेपालको ब्याडमिन्टन खेलमा राम्रो सम्भावना रहेको दाबी गर्दै फिट नेपालले ग्रासरुट तहको खेल विकासमा उल्लेखनीय योगदान दिएको बताउनुभयो । त्यसैगरी फाउण्डेसनका सल्लाहकार जयराज हमालले मोहन मेमोरियल अन्तरविद्यालय ब्याडमिन्टन प्रतियोगिताले पोखरा क्षेत्रको ब्याडमिन्टन खेलको विकासमा महत्वपूर्ण सहयोग पुगेको उल्लेख गर्नुभयो ।

फिट नेपाल र मोहन भूगोल ब्याडमिन्टन फाउण्डेसनको मुख्य नारा “रोड टु ओलम्पिक” रहेको छ । प्रतियोगिताले विद्यालयस्तरका खेलाडीलाई राष्ट्रिय तथा अन्तर्राष्ट्रिय स्तरतर्फ अघि बढ्न प्रेरणा मिल्ने संयोजक बरदान ताङवे लामाले विश्वास व्यक्त गर्नुभयो । प्रतियोगितामा यू–१५ राष्ट्रिय च्याम्पियन निभा राई, यू–१७ राष्ट्रिय च्याम्पियन दिलासा राना लगायतका चर्चित खेलाडीहरूको सहभागिता रहने उहाँले जनाउनु भयो । देशका विभिन्न भाग जस्तै काठमाण्डौं, चितवन, भैरहवा, धरान लगायतबाट खेलाडीहरु आउने भएको आयोजकले जनाएको छ ।

पत्रकार सम्मेलनमा राष्ट्रिय तथा अन्तराष्ट्रिय व्याडमिन्टन खेलाडी पुनम गुरुङ, नेपाल खेलकुद पत्रकार मञ्च गण्डकीका अध्यक्ष एममबी आस्था लगायतको सहभागिता रहेको थियो ।

पोखरा, २५ माघ ।

आगामी फागुन २१ गते हुने प्रतिनिधि सभाको निर्वाचनलाई लक्षित गर्दै राष्ट्रिय स्वतन्त्र पार्टी (रास्वपा) कास्की निर्वाचन क्षेत्र नम्बर २ का उम्मेदवार उत्तम पौडेलले ‘स्थानीयसँग संवाद यात्रा’ अभियानलाई तीव्र बनाएका छन्। सोही क्रममा आइतबार कास्की जिल्ला क्षेत्र नम्बर २ अन्तर्गत पोखरा महानगरपालिका–२१ मा उम्मेदवार पौडेलले स्थानीयसँग प्रत्यक्ष संवाद गर्दै सुझाव संकलन समेत गरेका हुन् ।

संवाद यात्राअन्तर्गत पोखरा २१का बिभिन्न ठाउँहरु पोखरेल थोक, शिवालय, निर्मल पोखरी, मैदान, ठुलिस्वारा, चिलाउने खर्क तथा थाप्ले–तिलाहारसम्म पुगेर स्थानीय बासिन्दासँग छलफल तथा अन्तरक्रिया गरिएको क्षेत्र नम्बर २को सचिवालयले जनाएको छ ।

कार्यक्रममा स्थानीयले भोग्दै आएका समस्या, विकासका आवश्यकता, सेवा प्रवाहका कमजोरी तथा भावी योजनाका विषयमा खुलेर आफ्ना सुझाव र अपेक्षा राखेका थिए। उम्मेदवार पौडेलले स्थानीयका आवाजलाई संसदमा बलियो रूपमा उठाउने प्रतिबद्धता व्यक्त गर्दै नीति निर्माणमा नागरिकको सहभागिता अनिवार्य हुने बताए।

संवाद यात्रामा निर्वाचन कमाण्डर दिपेन्द्र पोख्रेल (बहादास), गण्डकी प्रदेश सह–महामन्त्री अनिस अधिकारी, पोखरा–२१ का सभापति पवित्रमणि अधिकारीलगायत केन्द्र, प्रदेश, जिल्ला तथा क्षेत्र तहका नेता तथा कार्यकर्ताहरूको उल्लेख्य उपस्थिति रहेको थियो।

रास्वपाले आगामी दिनहरूमा पनि कास्की–२ का विभिन्न स्थानमा यस्ता संवादमूलक कार्यक्रमलाई निरन्तरता दिने जनाएको छ। संवाद यात्राले कास्की–२ मा चुनावी माहोललाई थप उत्साहपूर्ण र आशावादी बनाएको देखिएको छ।

पोखरा, २५ माघ ।

पोखरामा २५ औं संस्करणको आहा! रारा पोखरा गोल्डकप प्रतियोगिता माघ २७ देखि हुने भएको छ । सहारा क्लब पोखराको आयोजनाको यही माघ २७ देखि फागुन ९ गतेसम्म हुने प्रतियोगिताको तयारी पूरा भएको आज पत्रकार सम्मेलन गर्दै जानकारी दिएको हो ।

प्रतियोगितामा ३ विदेशी क्लबसहित १२ टिमको सहभागिता रहने क्लबका अध्यक्ष केशवबहादुर थापाले जानकारी दिए । विदेशी क्लबमा उज्वेकिस्तानको आभा फुटबल क्लब, हङकङको गार्खा फुटबल क्लब र भारतको थन्डरबोल्ट नर्थ युनाइटेड छन । पहिलो पटक प्रतियोगिताका सम्पूर्ण खेलहरु सन्ध्याकालीन समयमा फ्लड लाइटको माध्यमबाट खेलाइने भएकाले पोखरेली दर्शकहरुका लागि यो विशेष आकर्षण बन्ने विश्वास लिइएको बताए  ।

प्रतियोगिताको उपाधि विजेताले १४ लाख १ हजार रुपैयाँ प्राप्त गर्नेछ भने उपविजेता टिमले ७ लाख १ हजार रुपैयाँ पाउनेछन् । प्रतियोगिताको सर्वोत्कृष्ट खेलाडीलाई टेलजी इलेक्ट्रिक स्कुटर, ट्रफी र प्रमाणपत्र प्रदान गरिने आयोजकले बताएका छन् । अनुशासित टोलीलाई २५ हजार रुपैयाँ र ट्रफी दिइनेछ ।

व्यक्तिगत विधातर्फ उत्कृष्ट गोलकिपर, डिफेन्स, मिडफिल्ड, स्ट्राइकर, प्रशिक्षक, सर्वाधिक गोलकर्ता र उदयमान खेलाडीले जनही २५ हजार रुपैयाँ र ट्रफी प्राप्त गर्नेछन् ।

प्रत्येक खेलको ’म्यान अफ दि म्याच’ बापत १० हजार रुपैयाँ र ट्रफी प्रदान गरिनेछ । दर्शकहरुलाई समेत प्रोत्साहित गर्न प्रत्येक म्याचको भाग्यशाली दर्शकलाई ५ हजार रुपैयाँ र ‘फ्यान अफ दि म्याच’ लाई २ हजार ५ सय रुपैयाँ पुरस्कारको व्यवस्था गरिएको छ ।

दर्शकलाई टिकटको ब्यवस्था

आयोजकले प्रतियोगिता हेर्न आउने दर्शकका लागि टिकट दर समेत तय गरेको जनाएको छ । सिजनल टिकटको १ हजार २ सय रुपैयाँ तोकिएको छ भने जर्सी सहितको टिकट ३ हजार रुपैयाँ र जर्सी मात्र खरिद गर्दा २ हजार रुपैयाँ लाग्नेछ ।

साधारण प्यारापिट तर्फका खेलहरुका लागि प्रि–क्वार्टर र क्वार्टर फाइनलमा पश्चिम तर्फ २०० र अन्य तर्फ १०० रुपैयाँ शुल्क लाग्नेछ । सेमिफाइनलमा पश्चिम प्यारापिटको ३०० र अन्यको २०० रुपैयाँ तथा फाइनल खेलका लागि ५०० र ३०० रुपैयाँ टिकट दर कायम गरिएको छ ।

‘खेलकुदको विकासमा सहकार्य गरौं, पोखरालाई खेलकुद पर्यटन सहरका रूपमा स्थापित गरौं’ भन्ने नाराका साथ सञ्चालन हुने प्रतियोगिताको मुख्य प्रायोजक हिमश्री फुड्स प्रालिको उत्पादन आहा! रारा तयारी चाउचाउ छ ।

खेल तालिका सार्वजनिक

यसैबीच सहारा क्लबले खेल तालिका सार्वजनिक गरेको छ । जस अनुसार माघ २७ गते उद्घाटन खेलमा आयोजक सहारा क्लब पोखरा र हङकङको गार्खा फुटबल क्लबबीच हुनेछ ।

माघ २८ गते जाउलाखेल युवा क्लब र मछिन्द्र फुटबल क्लब बीच प्रतिस्पर्धा हुनेछ । माघ २९ गते नेपाल एपीएफ क्लब र मनाङ मस्र्याङ्दी क्लब खेल्नेछन् भने फागुन १ गते फ्रेण्ड्स क्लब र प्लानिङ ब्वाइज युनाइटेड बीच भिडन्त हुनेछ ।

यस्तै फागुन २ गतेदेखि क्वार्टर फाइनलका खेलहरु सुरु हुनेछन् । प्रतियोगिताको पहिलो सेमिफाइनल फागुन ६ गते र दोस्रो सेमिफाइनल फागुन ७ गते हुनेछ । फाइनल खेल फागुन ९ गते आयोजना हुने आयोजकले जानाएको ।

५ र ६ नम्बर गेट खुला

आयोजक सहारा क्लब पोखराले फुटवल प्रतियोगिता अवधिभर पोखरा रंगशालाको गेट नम्बर ५ र ६ खुला गरिने जनाएको छ । दर्शकको सहजताको लागि प्रतियोगिता अवधिभर ५ र ६ नम्बर गेट खुला गरिने अध्यक्ष थापाले जानकारी दिए । उनले पैदल ( हिडेरै ) हुदै जाने दर्शकले रंगशालाको मुल गेटलाई प्रयोग गर्न र सवारी साधन प्रयोगकर्ताहरुलाई पछाडिका ५ र ६ नम्नर गेटबाट प्रवेश गर्न आग्रह गरे । यसले पोखरा पृथ्वीचोक स्थित पुल निर्माणको कार्य भैरहेका कारण हुँनसक्ने सम्भावित ट्राफिक जामलाई केही हतसम्म कमि गर्न सकिने उनको भनाई थियो ।

काठमाण्डौँ, २५ माघ ।

मेडिकल व्यवसायी दुर्गा प्रसाईं हाजिरी जमानीमा रिहा भएका छन्।

जिल्ला सरकारी वकिल कार्यालय काठमाडौंको आदेशअनुसार उनलाई रिहा गरिएको केन्द्रीय साइबर ब्यूरोका एसपी दीपकराज अवस्थीले जानकारी दिए।

प्रहरीले प्रसाईंलाई शुक्रबार दक्षिणकाली नगरपालिका–चाल्नाखेल क्षेत्रबाट पक्राउ गरेको थियो। काठमाडौंबाट पर्साको वीरगञ्जतर्फ जाँदै गरेका बेला उनलाई नियन्त्रणमा लिइएको हो।

पछिल्लो समय प्रसाईं ‘पहिला हिन्दू अधिराज्य, अनि मात्रै निर्वाचन’ हुनुपर्ने भन्दै सार्वजनिक अभिव्यक्ति दिँदै आएका छन्। यही विषयमा गत १९ माघमा चितवन पुगेका उनले राजसंस्था पुनःस्थापना नभएसम्म निर्वाचन नहुने दाबी गरेका थिए।

काठमाण्डौँ, २५ माघ ।

आइसिसी टी–२० विश्वकप क्रिकेटको पहिलो खेलमा नेपाल इङ्ल्याण्डसँग ४ रनले पराजित भएको छ ।

मुम्बइको वाङ्खेडे क्रिकेट मैदानमा टस जितेर पहिला ब्याटिङ गरेको इङ्ल्याण्डले दिएको १८५ रन पछ्याएको नेपालले २० ओभरमा ६ विकेट गुमाएर १ सय ८० रन बनायो ।

राम्रो ओपनिङ दिएको नेपालका कुशल भुर्तेलले २९ रन बनाए । आसिफ सेख ७ रनमा आउट भए । दिपेन्द्रसिंह ऐरिले ४४ रन बनाउँदा कप्तान रोहित पौडेलले ३९ र आरिफसेखले १० रन बनाए । लोकेश बम ३९ र करन केसी १ रनमा अविजित रहे । जित नजिक रहेको नेपालले अन्तिम ओभरमा गुलसन झा को विकेट गुमाउँदा खेल हार्न पुग्यो ।

नपाललाई जित नजिकसम्म पुर्याउन लोकेशले २० बलमा ३९ रन बनाए । उनले ४ चौंका र २ छक्का प्रहर गरे । यसअघि पहिला ब्याटिङ गरेको इंग्ल्याण्डका ह्यारी ब्रोकले ५३ र ज्याकब ब्यानथनले ५५ रन बनाए । नेपालका दिपेन्द्रसिंह ऐरी र नन्दन यादवले समान २ विकेट लिए । शेर मल्ल र सन्दीप लामिछानेले एक एक विकेट लिए ।

पोखरा, २४ माघ ।

जानकी माध्यमिक विद्यालय पोखरा १७ महतगौडाको परिसरमा उत्सवको चहलपहल थियो । साना नानीबाबुदेखि सेतो कपाल फुलेका अभिभावकसम्म एउटै आँगनमा जम्मा भएका थिए ।

उनीहरु सबैका आँखामा एउटा साझा भावदेखिन्थ्यो, विद्यालयप्रतिको गर्व र मायासंगै गुणस्तरीय शिक्षाका लागि शिक्षक, विद्यार्थी र अभिभावकको त्रिकोणात्मक प्रयासको खाँचो छ ।

विद्यालयको ४८ औं बार्षिकोत्सवको अवसरमा विद्यालयको आँगन ध्वजापतकाले रंगीन बनेको थियो । शिक्षकले हात समातेर अक्षर चिनाएका विद्यार्थी आज मञ्चमा गीत, नृत्य र मन्तव्य प्रस्तुत गर्दै थिए उनीहरुको हाँसो र तालीको गुञ्जनले विद्यालयका संस्थापक, आमन्त्रित अतिथिसम्मलाई नयाँ जीवन दिएको अनुभूति भए जस्तो महसुस भएको थियो ।

विद्यालयका प्रमुख अक्षयकोषदाता एवम् पोखरा महानगरपालिका वडा नं. १७ का जनप्रतिनिधि शिवराम भण्डारीले कार्यक्रमको उद्घाटन गर्दै शिक्षा केवल पाठ्यपुस्तकमा मात्र सिमीत नभई जीवन बदल्ने शक्ति भएको उल्लेख गर्नुभयो । उहाँले सामुदायिक विद्यालयसंग चौतर्फी विकासमा वडास्तरबाट सक्दो सहयोग गर्ने प्रतिवद्धता पनि व्यक्त गर्नुभयो ।

कार्यक्रममा विद्यालयको विकासमा सहयोग गर्नेु हुने पोखरा १७ निवासी लिलकाजी गुरुङ, व्यवस्थापन समितिका निवर्तमान अध्यक्ष नगेन्द्र गुरुङ, विद्यालयका प्रधानाध्यापक अर्जुन कँडेल, लेखापाल अमित वानिया, ढुङ्केसाँघु सितापाईला आमा समुह, इक्रा पाउण्डेशन लगायतका विभिन्न संघसस्था तथा व्यक्तित्वहरुलाई दोसल्ला र सम्मानपत्रले सम्मान गरिएको थियो ।

सो अवसरमा स्थानीय जागरण आमा समुहले गत तिहारमा भैलो खेलेर संकलन गरेको ५१ हजार रुपैयाको अक्षयकोष स्थापना गर्नुभएको थियो । समुहले उक्त रकम बरावरको चेक विद्यालय व्यवस्थापन समितिका अध्यक्ष हरिप्रसाद बास्तोलालाई हस्तान्तरण गरिएको थियो ।

सो अवसरमा पार्दी मावि व्यवस्थापन समितिका अध्यक्ष सुवर्ण श्रेष्ठले सामुदायिक विद्यालय सञ्चालनमा आर्थिक अभाव महत्वपूर्ण चुनौतीका रुपमा रहेको बताउनुभयो, गुणस्तरीय शिक्षाका लागि सम्वन्धित निकायले आवश्यक सहयोग गर्नुपर्नेमा उहाँको जोड थियो ।

अक्षयकोषदाता एवम् सामाजिक व्यक्तित्व विरेन्द्रनारायण विजुकुच्छेले समाजका विपन्न र असहाय परिवारका विद्यार्थीको अध्ययनको थलो बनेको सामुदायिक विद्यालयले भौतिक संरचनालाई भन्दा गुणस्तरीय शिक्षामा जोड दिनुपर्ने आवश्यकता औल्याउनुभयो ।

कार्यक्रममा विद्यालय व्यवस्थापन समितिका अध्यक्ष हरिप्रसाद बास्तोलाले सामुदायिक विद्यालय केवल पठनपाठन गर्ने मात्र नभई समाजको भविष्य निर्माण गर्ने आधारशिला भएको बताउँदै शिक्षा सचेत, सक्षम र जिम्मेवार नागरिक उत्पादन गर्ने आधार भएको बताउनुभयो ।

विद्यालयको सुदृढ व्यवस्थापन समिति कुनै औपचारिक संरचना मात्र होईन, यो शैक्षिक गुणस्तर सुधार, भौतिक पूर्वाधार विकास, शिक्षक वर्गको मनोलव अभिवृद्धि तथा विद्यार्थीको सार्वाङ्कीण विकासको मार्गदर्शक निकाय भएको स्पष्ट पार्नुभयो ।

पोखरा महानगरपालिकाको आर्थिक सहयोगमा जानकी माध्यमिक विद्यालयको खेलमैदानमा रहेको पक्कि भवनमा यसै आर्थिक बर्षदेखि अटिजम कक्षा सञ्चालन गरिएको जानकारी दिंदै उहाँले भन्नुभयो, सम्भवत गण्डकी प्रदेशको सरकारी स्तरबाट खोलीएको सो पहिलो कक्षा भएको उल्लेख गर्दे अटिजम कक्षामा हाल ४० जना विद्यार्थी भर्ना भएका छन् ।

कार्यक्रममा कक्षागत र अतिरिक्त कृयाकलापमा प्रथम,द्धितीय र तृतीय हुने छात्रछात्रालाई पुरस्कार तथा मेडल वितरण गरिएको थियो । सो अवसरमा अटिजमका विद्यार्थी तथा अभिभावकलाई समेत पुरस्कृत गरियो ।

विद्यार्थीद्धारा विविध सांस्कृतिक प्रस्तुत गर्नुका साथै सांगठानिक र आर्थिक प्रतिवेदन प्रस्तुत गरिएको सो कार्यक्रममा शिक्षक अभिभावक संघका अध्यक्ष विक्रमवावु भण्डारीले स्वागत र शिक्षक तुलसी गिरीले सञ्चालन गर्नुभएको थियो ।

पोखरा, २४ माघ ।

जनज्योति माध्यमिक विद्यालय पोखरा २८ कालिकाकोे पुर्व विद्यार्थी तथा शिक्षकहरुको पहिलो पटक औपचारिक रुपमा बृहत् भेला, पुनर्मिलन तथा बनभोज कार्यक्रम सम्पन्न भएको छ ।

जनज्योति मावि भूपू विद्यार्थी मञ्चका संयोजक कीर्तिबल्लभ त्रिपाठीको अध्यक्षतामा पोखरा–२६ स्थित नमस्ते पार्टी प्यालेसमा आयोजना गरीएको सो कार्यक्रममा ठुलो संख्यामा भूपु विद्यार्थी शिक्षकहरु सहभागि भएका थिए । वि।स। २०१६ सालमा स्थापना भएको विद्यालयले २०२६ सालदेखि एसएलसी परीक्षामा समावेश हुँदै आएको थियो ।

कार्यक्रममा प्रमुख अतिथि गण्डकी विश्व विद्यालयका कुलपति प्रा।डा।ईन्द्र प्रसाद तिवारीले आफु यस विद्यालयको विद्यार्थी हौँ भन्दा गर्व लाग्ने गरेको बताउदै अबको शिक्षा प्राबिधिक शिक्षामा केन्द्रित हुनुपर्ने बताउदै विद्यालयको भौतिक, सामाजिक र शैक्षिक बिकासमा सबैको योगदान अपरिहार्य रहेको बताए ।

कार्यक्रमा विद्यालयका भुपु विद्यार्थी तथा सितलादेवी मावि पोखरा १२ प्रधानाध्यापक बाबुराम अधिकारीले विद्यालयकोे विगत र वर्तमान अवस्थाको बारेमा कार्यपत्र प्रस्तुत गरेका थिए । कार्यक्रममा मञ्चका सल्लाहकार हरि प्रसाद त्रिपाठी संस्थापक विदार्थी रामभक्त भण्डारी भुपु विद्यार्थी ऋषिराम त्रिपाठी,शुक्रराज अधिकारी लगाएतले बोलेका थिए । कार्यक्रममा जनज्योति माविमा २०१६ मा सम्मेलित पुर्व विद्यार्थीहरु तथा कार्यक्रमलाई सयोग गर्ने विभिन्न व्यक्तीत्वहरुलाई सम्मान गरिएको थियो ।

जनज्योति मावि भूपू विद्यार्थी मञ्चका संयोजक कीर्तिबल्लभ त्रिपाठीको अध्यक्षतामा भएको भूपू विद्यार्थीहरूको बृहत् भेला, पुनर्मिलन तथा बनभोज कार्यक्रमको सन्चालन सचिव गुरु प्रसाद त्रिपाठीले गरेका थिए भने धन्यवाद ज्ञापन मञ्चका सह सयोजक श्याम प्रसाद तिमल्सेना गरेका थिए ।

भूपू विद्यार्थी मञ्चका संयोजक कीर्तिबल्लभ त्रिपाठी सयोजक रहेको समितिको विशेष सक्रियतामा लामो कसरतपछि भएको भूपू विद्यार्थीहरूको बृहत् भेला, पुनर्मिलन तथा बनभोज कार्यक्रममा ठुलो संख्यामा भूपु विद्यार्थी शिक्षकहरु सहभागि भएका थिए ।

कार्यक्रममा सांस्कृतिक प्रस्तुति, आपसी परिचय, स्मरणीय क्षणको साझा र आगामी योजनाबारे समेत छलफल भएको थियो । आगामी दिनमा भूपू विद्यार्थीहरूबीच नियमित सम्पर्क, सहयोग र सहकार्य कायम गर्दै विद्यालयको शैक्षिक, भौतिक तथा सामाजिक विकासमा थप टेवा पु¥याउने दीर्घकालीन उद्देश्य समेत मञ्चले अघि सारेको छ ।

माछापुच्छ्रे हिमालको सम्मुखमा अवस्थित जनज्योति माध्यमिक विद्यालय प्राकृतिक सौन्दर्यसँगै शैक्षिक गरिमाका कारण कास्की जिल्लाकै विशिष्ट विद्यालयका रूपमा चिनिन्छ । ग्रामीण परिवेशमा स्थापना भएर पनि गुणस्तरीय शिक्षा प्रदान गर्दै आएको यस विद्यालयले समाज रूपान्तरणमा महत्वपूर्ण योगदान पु¥याएको स्थानीयको भनाइ छ । अनुशासन, मेहनत र सामाजिक मूल्यमा आधारित शिक्षाले यहाँका विद्यार्थीलाई सक्षम नागरिक बनाउन महत्वपूर्ण भूमिका खेलेको छ ।

पोखरा, २४ माघ ।

पोखरा महानगरपालिका १ टुंडिखेलमा जारी ‘नवौं विरेन स्मृति एवम् १९ औं बिटी कप सेभेन ए साइड खुल्ला फुटबल प्रतियोगितामा आज ९शनिबार० ८ खेल सकिएका छन् । बुद्धटोल युवा क्लबको आयोजनामा जारी प्रतियोगितामा पहिलो चरणका ८ खेल सकिएको क्लबका अध्यक्ष सन्तोष गुरुङले बताए । उनका अनुसार शनिबार भएको पहिलो खेलमा एन्जो ग्रुपले टुंडिखेललाई २–० गोल अन्तरले पराजित गर्यो ।

यस्तै दोस्रो खेलमा राइजिङ नेपाललाई रामघाटले ठमेल २–१ गोल अन्तरले हरायो । रामघाटको जीतमा सुदिन गुरुङले २ गोल गरे भने, राइजिङ नेपालका लागि सन्तोष मगरले सान्त्वना १ गोल फर्काए । यस्तै तेस्रो खेल लिभिक एफसीको अनुपस्थितीमा वाकओभरमार्फत तालपारी विजयी बन्यो ।

बेस्ट ब्वाइज क्लब र भिमकाली क्लबबीच भएको चौथों खेल गोलरहित भएपछि पेनाल्टीमा बेस्ट ब्वाइज क्लबले ४–३ गोल अन्तरले जीत निकाल्यो । पाँचौ खेलमा स्याङ्जा युथ क्लबले फूलबारी क्लबलाई २–० को गोल अन्तरले पराजित गर्यो । स्याङ्जाको जीतमा समिर पुरीले २ गोल गरे ।

छैटौं खेलमा एसटिबिएस एफसीलाई लभ्ली ब्वाइजले ४–२ गोल अन्तरले पराजित गर्यो । लभ्ली ब्याइजको जीतमा स्वचन थापा, सविन थापा, अन्जन थापा र रोहित नेपालीले समान १र१ गोल गरे । भने, एसटिबिएसका लागि विवेक गुरुङले २ गोल गरे ।

यस्तै आयोजक बिटी टिम बि र कल्याण बेसी लमजुङबीच भएको सातौ खेल गोलरहित भएपछि पेनाल्टी सुटआउटमा आयोजकले ३–२ गोल अनतरले पराजित गर्दै दोस्रो चरणमा प्रवेश गरेको खेल संयोजक निकेश गुरुङले जानकारी दिए । उनका अनुसार शनिबारको अन्तिम खेलमा फायर पिज्जाले भाइब्रेन्टलाई ४–१ को फराकिलो गोल अन्तरले हरायो ।

फायर पिज्जाको जीतमा मनिस ठकुरीले ह्याट्रिक र सुवास गुरुङले १ गोल गरे । भने, भाइब्रेन्टका लागि खगेन्द्र पुनले समान्त्वना १ गोल गरे । आइतबार पनि बिहान ८ बजेबाटै पहिलो चरणकै खेल हुने क्लबका सल्लाहकार विनिता गुरुङले जानकारी दिइन् । उनका अनुसार आइतबार पहिलो खेल सम्झना क्लब नयाँगल्ली र दीप युनाइटेडबीच हुनेछ ।

प्रतियोगिताको विजेतालाई २ लाख २ सय २२ रुपैयाँ र उपविजेतालाई १ लाख ११ हजार १ सय ११ रुपैयाँसहित ट्रफी मेडल र प्रमाणपत्र प्रदान गर्ने क्लबका सचिव रेशम सापकोटाले बताए । सापकोटाका अनुसार प्रतियोगितामा विधागतर्फ सर्वोकृष्ट खेलाडीलाई स्पोर्टस् साइकल प्रदान गरिनेछ । यस्तै उत्कृष्ट गोलरक्षक, डिफेण्डर र मिडफिल्डर र सर्वाधिक गोलकर्ताले जनही नगद ८र८ हजार पुरस्कार प्राप्त गर्नेछन् ।

यस्तै प्रतियोगितामा अनुशासित टिमलाई १० हजार रुपैयाँ प्रदान गरिने आयोजकले जनाएको छ ।

पोखरा, २४ माघ ।

प्रतिभा सुपर लिग क्रिकेटको उपाधिका लागि आयोजक प्रतिभा मावि र मदरल्याण्ड सेकेण्डरी भिड्ने भएका छन् । प्रतिभा मावि पोखरा–३ नदीपुरको आयोजनामा पोखरा रंगशालामा भइरहेको प्रतिोगिता अन्तर्गत शनिबार भएको सेमीफाइनल खेलमा आयोजक प्रतिभा माविले बाल मन्दिर मावि र मदरल्याण्ड सेकेण्डरीले छोरेपाटन माविलाई पराजित गर्दै फाईनल यात्रा तय गरेका हुन् । प्रतियोगिताको उपाधि भिडन्त आईतबार पूर्वाह्न १० बजे हुने आयोजक प्रतिभा माविका प्राचार्य किरण सापकोटाले जानकारी दिए ।

प्रतियोगिता अन्तर्गत शनिबार भएको पहिलो सेमीफाइनल खेलमा मदरल्याण्ड सेकेण्डरीले छोरेपाटन माविलाई २ विकेटले पराजित गर्दै फाईनल यात्रा सुरक्षित गर्यो । टस जितेर पहिले व्याटिङ गर्ने निर्णय गरेको छोरेपाटन माविले निर्धारित २० ओभरमा ८ विकेटको क्षेतीमा ९५ रनको योगफल तयार गर्यो । छोरेपाटन माविका लागि सोहन आचार्यले ३२ बलमा ३१ रन, उज्वल पौडेलले ३८ बलमा २१ र अनिष थापाले १२ बलमा १३ रनको योगदान दिए । छोरेपाटनलाई दवाबमा राख्न मदरल्याण्डका सद्रीस पौडेलले ३ ओभरमा १३ रन खर्चेर ३ विकेट, भुवनबहादुर भण्डारीले ४ ओभरमा १४ रन खर्चेर २ विकेट तथा गौरव भण्डारीले ३ ओभरमा २२ रन खर्चेर १ विकेट लिए ।

९६ रनको मध्यम लक्ष्य पछ्याउँदै जवाफी व्याटिङमा उत्रिएको मदरल्याण्डले १९.२ ओभरमा ८ विकेट गुमाएर लक्ष्य भेट्टाउँदै फाइनल यात्रा सुनिश्चित गर्यो । मदरल्याण्डका लागि विलोभ मल्लले २६ बलमा १६ रन, भुवनबहादुर भण्डारीले १४ बलमा १४ रन र अनुराज भण्डारीले १६ बलमा ११ रनको योगदान दिए । छोरेपाटनका किस्मत पौडेलले ४ ओभरमा १२ रन खर्चेर ३ विकेट, समर्पण लामिछानेले ४ ओभरमा १ मेडनसहित १४ रन खर्चेर ३ विकेट तथा अनिष थापाले ४ ओभरमा २३ रन खर्चेर २ विकेट लिए पनि जितका लागि पर्याप्त भएन ।

खेलमा बिजयी विद्यालय मदरल्याण्डका सद्रीष पौडेल प्लेयर अफ द म्याच घोषित भए ।

शनिबार नै भएको दोस्रो सेमीफाइनल खेलमा आयोजक प्रतिभा माविले बाल मन्दिर माविलाई ७१ रनको फराकिलो अन्तरले पराजित गर्दै फाइनल यात्रा सुनिश्चित गर्यो । बाल मन्दिरले टस जितेर फिल्डिङ गर्ने निर्णय लिएपछि पहिले व्याटिङ गरेको प्रतिभाले निर्धारित २० ओभरमा ६ विकेट गुमाएर १५९ रनको विशाल योगफल तयार गर्यो । विशाल योगफल तयार गर्न प्रतिभाका खेलाडीहरु सफल श्रेष्ठले ४५ बलमा ५७ रनको अर्धसतकीय पारी खेले । त्यस्तै, मिसन विकले २३ बलमा २५ रन, सौगात लामिछानेले ४ बलमा १५ रनको योगदान दिए । प्रतिभालाई दवाबमा राख्ने क्रममा बाल मन्दिरका राम ढुंगानाले ४ ओभर बलिङ गर्दै २९ रन खर्चेर २ विकेट, ४ ओभर नै बलिङ गरेका सुमन अधिकारीले १ मेडनसहित ३२ रन खर्चेर २ विकेट र अभिषेक क्षेत्रीले ४ ओभर बलिङ गर्दै २४ रन खर्चेर १ विकेट लिए ।

१६० रनको चुनौतिपूर्ण लक्ष्य पछ्याउँदै जवाफी व्याटिङमा उत्रिएको बाल मन्दिर मावि २० ओभर पूरै खेल्दै ९ विकेट गुमाएर केवल ८८ रनमा समेटिएपछि सेमीफाइनलबाटै प्रतियोगिताबाट बाहिरियो । बाल मन्दिरका लागि सुरज अधिकारीले २२ बलमा २० रन, सुमन अधिकारीले २८ बलमा १७ रन र श्रीनिवास कठायतले ३० बल सामना गर्दै १३ रन बनाउनुबाहेक अन्यले दोहोरो अंकमा रन जोड्न सकेनन् । प्रतिभा माविका बलरहरु सफल श्रेष्ठले ३ ओभर बलिङ गर्दै १६ रन खर्चेर ५ विकेट, पुरन गुरुङले १ ओभर बलिङ गर्दै ४ रन खर्चेर २ विकेट तथा निश्चल दाहालले ४ ओभर बलिङ गर्दै १२ रन खर्चेर २ विकेट लिदै बाल मन्दिरको व्याटिङ अर्डर ध्वस्त पारेका थिए ।

खेलमा प्रतिभा माविका लागि ५७ रन बनाउनुका साथै ५ विकेट लिएका सफल श्रेष्ठ प्लेयर अफ द म्याच घोषित भए ।

ताजा अपडेट

Login

कृपया ध्यान दिनुहोस्:

  • अब तपाइले कमेन्ट गर्नका लागि अनिवार्य रजिस्ट्रेसन गर्नुपर्ने छ ।
  • आफ्नो इमेल वा गुगल, फेसबुक र ट्वीटरमार्फत् पनि सजिलै लगइन गर्न सकिने छ ।
  • यदि वास्तविक नामबाट कमेन्ट गर्न चाहनुहुन्न भने डिस्प्ले नेममा सुविधाअनुसारको निकनेम र प्रोफाइल फोटो परिवर्तन गर्नुहोस् अनि ढुक्कले कमेन्ट गर्नहोस्, तपाइको वास्तविक पहिचान गोप्य राखिने छ ।
  • रजिस्ट्रेसनसँगै बन्ने प्रोफाइमा तपाइले गरेका कमेन्ट, रिप्लाई, लाइक/डिसलाइकको एकमुष्ठ बिबरण हेर्नुहोस् ।