पोखरा, २५ पुुस ।
पोखरा महानगरपालिका वडा नं. ३२ स्थित गोगन माध्यमिक विद्यालयको ५८ औँ वार्षिकोत्सव, अभिभावक दिवस तथा पुरस्कार वितरण कार्यक्रम सम्पन्न भएको छ । कार्यक्रमको पोखरा महानगरपालिकाका प्रमुख धनराज आचार्यले उद्घाटन गर्नुभयो ।
कार्यक्रममा प्रमुख आचार्यले सीमित सरकारी सहयोग र अभिभावकको साथ सहयोगमा विद्यालय व्यवस्थापन गर्दै गुणस्तरीय शिक्षा प्रदान गर्न विद्यालय निरन्तर प्रयासरत रहेको उल्लेख गर्नुभयो । उहाँले आगामी दिनमा विद्यालय अझ उत्कृष्ट बन्दै जाने विश्वास व्यक्त गर्नुभयो ।
सरकारले विद्यालय शिक्षा निःशुल्क तथा अनिवार्य भनेपनि व्यवहारिक रूपमा पूर्ण कार्यान्वयन हुन नसकेको उल्लेख गर्दै उहाँले गोगन माध्यमिक विद्यालयका लागि महानगरपालिकाबाट तीन स्थायी दरबन्दी (प्रावि दुई, मावि एक) तथा एक जना स्टाफ नर्सको व्यवस्था गरिएको जानकारी दिनुभयो । साथै विद्यालय व्यवस्थापनका लागि ४५ लाख रुपैयाँ बजेट विनियोजन गरिएको बताउनुभयो ।
विद्यार्थी जीवनमा अनुशासन सबैभन्दा महत्वपूर्ण हुने उल्लेख गर्दै उहाँले पढाइसँगै रुचि र क्षमताअनुसार शिक्षण सिकाइ प्रक्रिया अघि बढाउन शिक्षकहरूलाई आग्रह गर्नुभयो ।
पोखरामा पूर्वाधार विकासका विभिन्न ठूला परियोजनाहरू अघि बढिरहेको उल्लेख गर्दै महानगर प्रमुख आचार्यले सातमुहानेदेखि फेदीसम्मको सडक निर्माण तथा पोखरा–३२ लामेआहालमा प्रस्तावित क्षेत्रीय बसपार्क एडिबीको सहयोगमा तीन वर्षभित्र निर्माण हुने पक्का भइसकेको जानकारी दिनुभयो । ती परियोजना सम्पन्न भएपछि महानगरवासीले प्रत्यक्ष अनुभूति गर्ने गरी परिणाम देखिने उहाँको भनाइ थियो ।
पोखरा महानगरपालिका वडा नं ३२ का वडा अध्यक्ष अक्कलबहादुर कार्कीको सभापतित्व एवम् शिक्षकद्वय गीता थापा र विनोद भण्डारीले सञ्चालन गर्नुभएको कार्यक्रममा स्वागत सहायक प्रधानाध्यापक चन्द्रा थापाले गर्नुुभएको थियो ।
कार्यक्रममा विद्यालयका प्रधानाध्यापक नारायणप्रसाद वरालले वार्षिक प्रगति प्रतिवेदन, भावी कार्ययोजना तथा आय–व्यय विवरण प्रस्तुत गर्नुभयो भने त्रिभुवन शान्ति मा.विका व्यवस्थापन समितिका अध्यक्ष नगेन्द्र रेग्मी, गोगन मा.वि.भूतपूर्व विद्यार्थी मञ्चका अध्यक्ष किसान परियार, विद्यार्थीद्वय रिदीमा सापकोटा र दिप्ती थापालगायतले बोल्नुुभएको थियो ।
उक्त अवसरमा निवर्तमान व्यवस्थापन समितिका अध्यक्ष मेघराज पौडेल सहित निवर्तमान सदस्यहरू, निवर्तमान प्रधानाध्यापक मोहनराज बराल, वि.सं. २०२६ देखि २०५० सालसम्म कार्यरत भूतपूर्व प्रधानाध्यापक, विद्यालय व्यवस्थापन समितिका निवर्तमान अध्यक्ष तथा सदस्य, शिक्षक र कर्मचारीहरूलाई महानगरप्रमुख आचार्यले सम्मान गर्नुुभएको थियो । उक्त अवसरमा विद्यार्थीहरूले विज्ञान प्रदर्शनी तथा विविध सांस्कृतिक प्रस्तुति प्रस्तुत गरेका थिए ।
पोखरा, २५ पुस ।
गण्डकी प्रदेश लोकसेवा आयोगबाट सिफारीस भइ प्रदेश तथा स्थानीय तहमा कार्यरत रहेका कर्मचारीहरुको तेस्रो पटक सेवा प्रवेश तालिम शुक्रबार सम्पन्न भएको छ ्र गण्डकी प्रदेश प्रशिक्षण प्रतिषठानको आयोजना पुस २१ गते बाट संचालित सेवा प्रवेश तालीमको समापन समारोह प्रतिष्ठानका कार्यकारी निर्देशक सुरेंद्रबाबू तिवारीको अध्यक्षता एव प्रदेश लोक सेवा आयोग, गण्डकी प्रदेशकी सदस्य माननीय कल्पना लम्साल आथित्यतामा राष्ट्रीय परीक्षा बोर्डको सभाहलमा सम्पन्न भएको हो ।
समापन समारोहमा बोल्दै कार्यक्रमका प्रमुख आतिथि लम्सालले प्रदेश लोक सेवा आयोगले सौद्धान्तिक र केही व्यवहारिक ज्ञानको परिक्षण गरेर हजुरहरुलाई हजारौ प्रतस्प्रर्धीहरुबाट छनोट गरेको हुन्छ भने न्एत्ब् जस्ता तालिम प्रदायक प्रतिष्ठानले हजुरहरुको सिप, व्यवहारिक ज्ञान र क्षमतालाई विकास गरि जनता संग प्रत्यक्ष जोडिने सेवा प्रवालाई सहज बनाउने, सेवा प्रवाहमा कुशलता एव पारदर्शिता कायम गर्न यो तालीम सहयोगी बन्ने कुरा बताउनुभयो ।
प्रतिष्ठानका उपसचिव नारायण प्रसाद पौडेलले स्वागत एव कार्यक्रमको समिक्षा प्रस्तुत गर्नुभएको समापन समारोहको संचालन प्रतिष्ठानका प्रशिक्षण तथा अनुसन्धान अधिकृत इन्जिनियर मनोज पौडेलले गरेका थिए । प्रशिक्षण व्यावहारिक र अभ्यासमुलक रुपमा भएकोले दैनिक जीवनमा आईपर्ने समस्याहरुलाई सहज रुपमा समाधान गर्न यस्ता प्रशिक्षण तालिमले महत्वपुर्ण भुमिका खेल्ने सहभागीको तर्फबाट सुमन पौडेल र रविना कुलुङले आफ्ना अनुभव राखेका थिए ।
कुल ४७ जना सहायकस्तर चौथो र पाचौ तहका प्रशासनरप्राविधिक तर्फका कर्मचारी सहभागी भई पाँच दिन सम्म संचालित सेवा प्रवेश तालिम सामाजिक विकास मन्त्रालयको सामाजिक विकास महाशाखाको हल र रास्ट्रिय परीक्षा बोर्डको हलमा संचालन भएको थियो । स्थानीय तहका कर्मचारीको लागी दैनिक काममा सहजता ल्याउने गरी व्यवहारीक कक्षा संचालन गर्नुका साथै स्थानीय तहको काम कर्तव्य अधिकार ,खरीद प्रक्रीया ,बजेट निर्माण एव व्यवस्थापन ,विकास योजना ,भवन निर्माण मापदण्ड ,योजना कार्यान्वयन अनुगमन मुल्यांकन ,जिन्सी व्यवस्थापन, स्थानीय तहको राज्यस्व अधिकार र परिचालन, उपभोक्ता समितिको काम कर्तव्य र अधिकार, समाजिक सुरक्षा र पञ्जीकरण, अभिलेख व्यवस्थापन, समस्या केन्द्रित अभ्यास र प्रस्तुतीकरण जस्ता विषयवस्तुमा सहजीकरण गर्नुका साथै प्रशासनरप्राविधिक तर्फका नब प्रवेशी सहायकस्तर कर्मचारीहरु प्रशासनिक ज्ञान संगै प्राविधिक ज्ञान पनि हुनु जरुरी भएकोले प्रविधिक विषयवस्तुलाई समेत ध्यानमा राखि अभ्यासको मार्फत प्रशिक्षण गरिएको तालिमका संयोजक तथा व्यवस्थापन एवम प्रतिष्ठानका प्रशिक्षण तथा अनुसन्धान अधिकृत इन्जिनियर पौडेलले बताए ।
प्रतिष्ठानको आयोजनामा यही मंसीर १४ देखि १९ सम्म प्रशासन तर्फको दुई समुह, २१ देखि २५ गते सम्म एक समुह इन्जिनियरिङ तर्फ र पुस २१ देखि २५ सम्म प्रशासन र कृषी तर्फको दुई समुह गरि १५० जना भन्दा बढी सहायकस्तर चौथो र पाचौ तहका कर्मचारीहरु सेवा प्रवेश तालिम लिई दिक्षीत भईसकेका प्रतिष्ठानका निर्देशक लक्ष्मण तिमिल्सिनाले बताए ।
पोखरा, २५ पुस ।
ल्याण्डफिल साइट निर्माणबारे पोखरामा विवाद भएको छ । पोखरा ३३ झाँक्री खोलामा महानगरले ल्याण्डफिल साइट बनाउन निर्माण कम्पनीसँग सम्झौता गरिसकेको छ । तर, स्थानीयले त्यस ठाउँमा ल्याण्डफिल साइट बनाउन नदिने अडान लिएका छन् ।
आज स्थानीयले ३३ नम्बर वडा कार्यालयमा तालाबन्दी गरेका छन् । स्थानीयले मेयर धनराज आचार्य र वडाध्यक्ष रामचन्द्र अधिकारी सहितको उपस्थितिमा छलफलबाट सहमति जुटे मात्रै ताला खुल्ने अडान लिएका छन । केही दिनअघि उनीहरुले महानगरमा ध्यानाकर्षण पनि गराएका थिए ।
महानगरले मङ्सिर २ गते ८० करोड लागतमा प्रशोधन केन्द्र निर्माण गर्ने गरी सम्झौता गरेको थियो ।
पोखरा, २५ पुस ।
चेतना महिला सीप विकास परियोजनाले जानकी माध्यमिक विद्यालयका विद्यार्थीहरूलाई न्यानो स्वेटर वितरण गरेको छ । पोखरा १७ महतगौँडामा सञ्चालित सो विद्यालयका असहाय एवं विपन्न वर्गका २४ जना विद्यार्थीहरूलाई १३ हजार रुपैयाँ मूल्य बराबरको स्वेटर वितरण गरिएको हो ।
विद्यालय व्यवस्थापन समितिका अध्यक्ष हरिप्रसाद बास्तोलाले विद्यार्थीहरुलाई स्वेटर वितरण गर्दै समाजका विपन्न र असहाय वर्गका विद्यार्थीको अध्ययन थलो सामुदायिक विद्यालय भएको बताए । सामुदायिक विद्यालयहरूले पछिल्लो समय शैक्षिक गुणस्तर सुधारमा विशेष जोड दिँदै आएको उनको भनाइ थियो ।
विद्यालयका प्रधानाध्यापक अर्जुन कँडेलले विभिन्न संघसंस्थाको सहयोगबाट विद्यार्थीलाई आवश्यक शैक्षिक सामग्री र पोसाक उपलब्ध हुँदा उनीहरूलाई महत्वपूर्ण सहयोग पुगेको बताए । यस्ता सहयोगले विद्यार्थीको पढाइप्रति रुचि बढ्ने विश्वास उनले व्यक्त गरे ।
सो अवसरमा परियोजनाका संस्थापक तारा तिमिल्सिना र सञ्चालक पवित्रा तिमिल्सिनाले विद्यार्थीहरूलाई स्वेटर हस्तान्तरण गरेका थिए । कार्यक्रममा विद्यालयका सहायक प्रधानाध्यापक भीमप्रसाद रिजाल तथा शिक्षिकाहरु चन्दा तिमिल्सिना र सीता थापाले समेत विद्यार्थीहरूलाई स्वेटर वितरण गरे ।
पोखरा, २५ पुस ।
पोखरामा ३०४ औं पृथ्वी जयन्ती तथा राष्ट्रिय एकता दिवस मनाईने भएकाे छ । यही पुस २७ गते आइतबार विविध कार्यक्रमसहित दिवस मनाउन लागिएको हो ।
पोखरा, २५ पुस ।
स्वतन्त्र पत्रकार संघ नेपाल कास्कीको अध्यक्षमा डिल्लीराम काफ्ले चयन भएका छन् । संघको आज पोखरामा भएको सातौं अधिवेशनले काफ्लेको अध्यक्षतामा ९ सदस्यीय समिति निर्विरोध चयन गरेको हो ।
संघको उपाध्यक्षमा शिशिर उजाड, सचिवमा मदनराज जैसीं, सहसचिवमा रामकृष्ण अधिकारी र कोषाध्यक्षमा गणेशबज्र लामा चयन भए । सदस्यमा भोजराज उपाध्याय,दुर्गादेवी बास्तोला,मानबहादुर थापा र रामचन्द्र लामिछाने छन् । दुर्गा बहादुर शाह संयोजकत्वमा शिवप्रसाद गौतम र अभिमन्युविक्रम राणा सदस्य रहेको निर्वाचन मण्डलले सो समिति चयन गरेको थियो । यसअघि अधिवेशनको उद्घाटन गर्दै मानव अधिकार संरक्षण मञ्च नेपालका पुर्व अध्यक्ष नवदत्त उपाध्याय ढुगांनाले हरेक क्षेत्रमा दलिय राजनिती प्रवेश गरेकाले, राज्यका सबै निकाय कमजोर बन्न पुगेको बताए ।
उनले विषम परिस्थीतीमा स्वतन्त्र पत्रकारको खबरदारी आवश्यक रहेको बताए । बरिष्ठ अधिवक्ता तिलक पराजुलीले देशमा व्यवस्था परिवर्तन भए पनि नागरिकको अवस्था परिवर्तन हुन नसकेको स्पष्ट पारे । संघका केन्द्रीय अध्यक्ष कृष्णप्रसाद बास्तोलाले दलिय पत्रकारका कारण देशले बिभिन्न कालखण्डमा समस्या भोग्दै आएको बताए । संघ कास्कीका अध्यक्ष कृष्णबहादुर रानाभाटको अध्यक्षतामा भएको उद्घाटन कार्यक्रममा पत्रकार महासंघ कास्कीका संस्थापक अध्यक्ष उमाकान्त शर्मा, अग्रज पत्रकार नारायण कार्कीलगायतले विचार भन्दा माथि देश रहेकाले स्वतन्त्र पत्रकारिताको महत्व झनै बढेको बताए । कार्यक्रममा लेखक शिवप्रसाद गौतमले संघलाई आर्थिक सहयोग प्रदान गरे ।
अध्यक्ष रानाभाटले बार्षिक प्रतिवेदन प्रस्तुत गरेको सभामा स्वागत केन्द्रीय पार्षद सागर कार्की, धन्यवाद उपाध्यक्ष डिल्लीराम काफ्ले र संचालन सहसचिव शिशिर उजाडले गरेका थिए । नवनिर्वाचित कार्य समितिलाई निर्वाचन मण्डलका संयोजक दुर्गा शाह बाबा, सदस्य शिवप्रसाद गौतम, संघका केन्द्रीय अध्यक्ष कृष्णप्रसाद बास्तोला, संघ कास्कीका पुर्व अध्यक्ष कृष्ण थापा लगायतले स्वतन्त्र पत्रकारिताको पक्षमा सशक्त आवाज उठाउन सुझाव दिए ।
पोखरा, २५ पुस ।
आगामी फागुन २१ गते हुने प्रतिनिधिसभा सदस्य निर्वाचनका लागि कास्कीमा दुई हजार ३०३ जना निर्वाचन प्रहरी माग गरिएको छ । इच्छुक उम्मेदवारले आज २५ पुसदेखि माघ १ गतेसम्म निवेदन दिनसक्ने कास्की प्रहरीले जानकारी दिएको छ ।
निर्वाचन प्रहरीमा भर्ना हुनका लागि दरखास्त फाराम दर्ता गर्ने अन्तिम मितिसम्म १८ वर्ष पूरा भई ५४ वर्ष ननाघेको हुनुपर्नेछ । उम्मेदवार नेपाली नागरिक हुनुपर्ने, सामान्य लेखपढ गर्न जान्ने, फौजदारी अभियोगमा अदालतबाट सजाय नपाएको, कुनै राजनीतिक दलको सदस्य नरहेको, शारीरिक तथा मानसिक रूपमा स्वस्थ रहेको र आतङ्ककारी वा विध्वंसात्मक सङ्गठनसँगसम्बन्ध नरहेको हुनुपर्नेछ ।
उचाइ र तौलतर्फ पुरुषको हकमा न्यूनतम उचाइ पाँच फिट तीन इन्च, छाति ३१–३३ इन्च, तौल ५० किलो तथा महिलाको हकमा न्यूनतम उचाइ चार फिट १० इन्च, तौल ४२ किलो तोकिएको छ । महिलाको हकमा गर्भवती नभएको वा भइसकेको अवस्थामा सो अवस्था समाप्त भएको हुनुपर्ने शर्त राखिएको छ ।
पोखरा, २५ पुस
गण्डकी प्रदेशका प्रमुख डिल्लीराज भट्टले विश्व बजारमा प्रतिष्पर्धा गर्ने समयानुकुल शिक्षामा जोड दिनुपर्ने बताउनुभएको छ ।
सुदूरपश्चिम सम्पर्क समाज, पश्चिमाञ्चल क्याम्पस पोखराले आयोजना गरेको ‘पछ्याणः तेस्रो संस्करण’ कार्यक्रममा प्रमुख अतिथि भट्टले सक्षम युवा जनशक्ति तयार पार्न शैक्षिक संस्थाले गुणस्तरीय, व्यवहारिक र सीपमूलक शिक्षालाई प्राथमिकता दिनुपर्ने बताउनुभयो । उहाँले अनुसन्धान, नवप्रवर्तन र उद्यमशीलतालाई प्रोत्साहन गर्ने शैक्षिक वातावरण निर्माण गर्नुपर्नेमा पनि जोड दिनुभयो ।
‘विज्ञान तथा प्रविधि अन्तर्गतको इञ्जिनियरिङ शिक्षाको महत्व विश्वभर नै उच्च छ । क्षमतावान प्राविधिकहरुको माग संसारमा बढिरहँदा हामीले प्राविधिक शिक्षालाई विश्वबजारमा प्रतिष्पर्धा गर्ने किसिमले स्तरवृद्धि गर्न आवश्यक पनि छ ।’ उहाँले भन्नुभयो ।
दक्ष जनशक्ति विदेश पलायनको अवस्था भयावह हुँदै गएको बताउँदै उहाँले जनशक्ति पलायनको यो दुरावस्थालाई समयमै नियन्त्रण गर्न जरुरी रहेको बताउनुभयो । ‘जनशक्ति पलायनको यो अवस्थालाई नियन्त्रणका लागि गतिलो आधार भनेको प्राविधिक शिक्षाको प्रभावकारी विकास नै हो ।’ उहाँले भन्नुभयो – ‘हरेक युवाले विदेशिनुलाई गौरव मान्ने मानसिकतालाई तोड्दै समृद्ध नेपाल निर्माणमा लाग्नुपपर्छ’
हरेक युवाले आफ्नो राष्ट्र प्रतिको दायित्वलाई मनन गर्दै समृद्ध नेपाल निर्माणका लागि अहोरात्र खटिनुपर्ने उहाँले बताउनुभयो । उहाँले थप्नुभयो – ‘वास्तविक परिवर्तनका लागि समुदायका सबै तहका वर्ग र समूहको सहभागिता आवश्यक छ । यसमा सबैभन्दा सक्रिय र उर्जाशील तह भनेको युवा वर्ग हो ।’
‘युवाहरु कसैको उक्साहटमा नलागी, विरोध वा आन्दोलनमा सीमित नभई मुलुकलाई मनमा राखेर सामाजिक सेवा, ऐतहिासिक तथा सांस्कृतिक सम्पदा संरक्षण, प्रविधि प्रयोग र उद्यमशीलता जस्ता सकारात्मक गतिविधिमा सक्रिय भई समाज परिवर्तनमा योगदान दिनुपर्ने आवश्यकता छ ।’ उहाँले भन्नुभयो – ‘देश र समाजलाई संस्कार र मर्यादासहित आधुनिक युगमा डो¥याउने युवा वर्गले नै हो । तर, युवाहरू जागृत हुन बाँकी नै छ भन्ने महसुस भइरहेको छ ।’ भट्टले उच्च शिक्षा हासिल गरेका विद्यार्थीलाई आत्मनिर्भर बनाउनका लागि राज्यले उचित नीति र कार्यक्रम अवलम्वन गरी रोजगारी तथा अवसरको सिर्जना गर्न आवश्यक रहेको बताउनुभयो ।
प्रदेश प्रमुख भट्टले यस कार्यक्रमले विद्यार्थीहरुको सिर्जनशीलता, प्रतिभा तथा सांस्कृतिक चेतना अभिवृद्धि गर्न महत्वपूर्ण भूमिका खेल्ने बताउँदै नेपालका इन्जिनियरिङ विद्यार्थीहरूलाई एकताबद्ध गर्न, उनीहरूका नवीन विचारहरू कार्यान्वयनका लागि प्रोत्साहित गर्न र मुलुकको संस्कृति र पर्यटनको प्रवद्र्धन गर्न यस्ता कार्यक्रमलाई निरन्तरता दिनुपर्ने उल्लेख गर्नुभयो ।
‘पछ्याणः संस्कृतिसँग, पहिचानसँग’ मूल मन्त्रका साथ नेपालका ईञ्जिनियरिङ कलेजहरु र प्रविधि क्षेत्रमा उत्साही युवा विद्यार्थीहरुलाई सहभागी गराई झण्डै दुई सातासम्म विविध कार्यक्रम गरी सञ्चालन गरिएको आयोजकले जनाएको छ । सुदूरपश्चिमबाट अध्ययनका लागि पोखरा आएका विद्यार्थीहरु संगठित भएर सन् १९९७ मा यो समाज स्थापना गरेका हुन् ।
पोखरा, २५ पुस ।
१४ औं पोखरा महोत्सव भब्य र सभ्य बनाउन पोखरामा रहेका विभिन्न संघ संस्थाले साथ दिने भएका छन । आगामी पुषको २९ देखि माघको ११ सम्म पोखराको अमरसिंह खेल मैदानमा आयोजना हुने १४ औं संस्करणको पोखरा महोत्सवलाई पोखरामा रहेका विभिन्न संघ संस्थाले आ आफ्नो झाँकी तथा र्याली सहभागी गराएर सहयोग गर्ने प्रतिवद्धता जनाएका हुन । उनीहरुले पोखरा महोत्सवको उद्घाटन पूर्व पोखराको रंगशाला गेटदेखि आयोजना गरिने झांकी तथा र्यालीमा स्व स्फुर्त रुपमा सहभागी भई महोत्सवको सोभा बढाउने समेत निर्णय गरेका छन ।
महोत्सव आयोजक युनाईटेड क्लबले आयोजना गरेको संघ संस्था तथा झाँकी र्याली अन्तरक्रिया कार्यक्रममा सहभागी उनीहरुले पोखरा महोत्सवको आयोजना गरि युनाईटेड क्लबले विशुद्ध सामाजिक काम गर्ने भएकाले आफुहरुले हरेक महोत्सवमा झांकी र्याली सहभागी गराइरहेको र आगामी दिनमा पनि निरन्तरता दिने समेत बताए ।
सो अवसरमा वोल्दै युनाईटेड क्लबका पूर्व अध्यक्ष तथा १४ औं पोखरा महोत्सवका झाँकी र्याली ब्यवस्थापन उपसमिति संयोजक सुक बहादुर गुरुङले पोखरा महोत्सवलाई भब्य र सभ्य बनाउन पोखराका संघ संस्थाहरुको महत्वपूर्ण भुमिका रहेको बताउदै १४ औं पोखरा महोत्सवमा समेत झाँकी र्यालीबाट साथ र सहयोग हुने विश्वास ब्यक्त गरे । पोखरा महोत्सवको आम्दानी सामाजिक कामका लागि भएकाले संघ संस्थाहरुले समेत प्रत्यक्ष वा अप्रत्यक्ष रुपमा युनाईटेड क्लबले गरेको सामाजिक काममा सहभागीता रहेको समेत गुरुङले बताए ।
त्यस्तै संघ संस्था ब्यवस्थापन उपसमिति संयोजक सीमा गुरुङले पोखरा महोत्सवको उद्घाटन पूर्व आयोजना गरिने संघ संस्थाको झाँकी र्याली कार्यक्रमले पोखरा महोत्सवको सोभा बढाएको बताइन । गुरुङले अघिल्लो वर्ष ३ सय १५ संघ संस्थाले झाँकी र्यालीमा सहभागीता जनाएको वताउदै यस वर्षपनि त्यतिनै संख्यामा संघ संस्थाको सहभागीता रहने अपेक्षा रहेको बताइन ।
सो अवसरमा वोल्दै क्लबका वरिष्ठ उपाध्यक्ष गणेश तिमिल्सिनाले पोखरा महोत्सव विशुद्ध सामाजिक कामका लागि भएकाले सम्पूर्ण पोखरेलीको साथ र सहयोगलेनै पोखरा महोत्सव १४ औं संस्करण सम्म आइपुगेको बताए ।
क्लबका प्रथम उपाध्यक्ष शान्त बहादुर थापाले सञ्चालन गरेको कार्यक्रममा क्लबका निवर्तमान अध्यक्ष राजु श्रेष्ठ, संस्थापक अध्यक्ष हिमालय बख्रेल, क्लबका पदाधिकारी, सल्लाहकार, महोत्सवका विभिन्न उपसमिति संयोजक तथा सल्लाहकार र संघ संस्थाका प्रतिनिधीहरुको सहभागीता रहेको थियो ।
पोखरा, २१ पुस ।
नेपाल पर्यटन बोर्ड गण्डकी प्रदेश कार्यालय र पोखरा पंछी समाजको संयुक्त आयोजनामा पदयात्रा पथप्रदर्शकका लागि दिइएको तीन दिने चरा पहिचान तालिम आइतबार सम्पन्न भएको छ ।
पदयात्रामा जाने पर्यटकलाई चराहरू बारे जानकारी गराउन सहज होस् भन्ने उद्देश्यका साथ गण्डकी प्रदेशमा पदयात्रा क्षेत्रमा पथप्रदर्शन गरिरहेका ३६ जना पथप्रदर्शकलाई तालिम दिइएको पोखरा पंछी समाजका अध्यक्ष मनशान्त घिमिरेले जानकारी दिनुुभयो ।
तालिमका सहभागीलाई नेपाल पंछीविद् संघका अध्यक्ष हठनराम महतो, अन्नपूर्ण संरक्षण क्षेत्र आयोजना(एक्याप)का प्रमुख रविन कडरिया, काठमाडौं इन्भाइरोन्मेन्टल एजुकेशन प्रोजेक्ट(किप)का कार्यकारी सदस्य गोपि श्रेष्ठका साथै पंछीविद्हरूले चरा अवलोकनका विभिन्न पक्षबारे सैद्धान्तिक र स्थलगत रुपमा नै पुगी प्रयोगात्मक तालिम दिनुुभएको थियो ।
तालिमको समापन समारोहमा तालिमका सहभागीलाई कार्यक्रमका प्रमुख अतिथि पोखरा पर्यटन परिषद्का अध्यक्ष तारानाथ पहारी, नेपाल पर्यटन बोर्ड गण्डकी प्रदेशका प्रमुख मणिराज लामिछाने, समाजका सल्लाहकार जीवनराज सापकोटा लगायतले सहभागिताको प्रमाणपत्र प्रदान गर्नुुभयो ।
कार्यक्रममा पोखरा पर्यटन परिषद्का अध्यक्ष पहारीले पर्यटनका विभिन्न विधा मध्ये चरा पर्यटन पनि महत्वपूर्ण पक्ष भएको बताउनुुभयो । तालिमका उपलब्धिलाई व्यहारमा उतार्न उहाँले आग्रह गर्नुुभयो ।
नेपाल पर्यटन बोर्ड गण्डकी प्रदेश कार्यालयका प्रमुख मणिराज लामिछानेले कतिपय पर्यटक केवल चरा मात्रै हेर्न आउने बताउँदै त्यस्ता पर्यटकका लागि यस सम्बन्धमा विज्ञता हासिल गर्नु जरुरी रहेको बताउनुुभयो ।
नेपाल पंछीवद् समाजका अध्यक्ष हठनराम महतोले चरा पर्यटनमा काम गर्न चाहनेले त्यस सम्बन्धी विज्ञता हासिल गर्न प्रविधिको प्रयोगका साथै यसतर्फको गहिरो लगाव हुनु जरुरी भएको बताउनुुभयो ।
समाजका सल्लाहकार जीवनराज सापकोटाले पथप्रदर्शकलाई क्षमताबान बनाउनका लागि तालिम उपयोगी बनेको विश्वास व्यक्त गर्नुुभयो ।
समाजका अध्यक्ष मनशान्त घिमिरेको सभापतित्व एवम् कार्यक्रम संयोजक कृपाकुमार गुरुङले सञ्चालन गर्नुभएको प्रशिक्षकद्वय कुसुमकुमारी थापा र दीपेन्द्र चपाइँले तालिमका क्रममा प्राप्त सिकाई एवम् अनुुभव बारे जानकारी गराउनुुभयो ।
कार्यक्रमकै अवसरमा नेपाल पर्यटन बोर्डको प्रवद्र्धन, मिलेनियम ट्रेक व्यवस्थापन समितिको संयोजन एवम् पोखरा पंछी समाजको प्रकाशनमा तयार गरिएको मिलेनियम पदमार्गमा पाइने चराहरू शीर्षकको सचित्र पुस्तकको लोकार्पण समेत गरिएको थियो ।
