
पोखरा, १३ पुस ।
नेपाल परिवार नियोजन संघ कास्कीले कास्कीको मादी गाउँपालिका वडा नं १० स्थित भाचोकमा अभिमुखिकरण कार्यक्रम गरेको छ । संघले महिला सामुदायिक स्वास्थ्य स्वयंसेविका र आमा समूहको नेतृत्वका लागि परिवार नियोजन र यौन तथा प्रजनन् स्वास्थ्य विषयमा अभिमुखिकरण गरेको हो ।
ग्रामिण तथा दुर्गभ क्षेत्रलाई लक्षित गरी कार्यक्रम गरिएको सभापति नवीन सिग्देलले जानकारी दिनुभयो । भाचोक स्वास्थ्य चौकीमा आयोजित कार्यक्रममा ४० जनाको सहभागिता रहेको थियो ।
कार्यक्रममा बोल्दै भाचोक स्वास्थ्य चौकी व्यवस्थापन समितिका अध्यक्ष नर बहादुर गुरुङले आफ्नो क्षेत्रमा कार्यक्रम ल्याइदिदा खुशी गरेको बताउनुभयो । त्यस अवसरमा भाचोक स्वास्थ्य चौकीका प्रमुख दीपक तिवारीले पनि बोल्नुभएको थियो ।
कार्यक्रममा नेपाल परिवार नियोजन संघ कास्कीका वरिष्ठ शाखा प्रवन्धक नव राज तिवारी, स्टार्फ नर्स अन्जना भण्डारीले सहजिकरण गर्नुभएको थियो ।
नेपाल परिवार नियोजन संघ कास्कीका सभापति नवीन सिग्देलको अध्यक्षतामा भएको कार्यक्रम बरिष्ठ शाखा प्रवन्धक नव राज तिवारीले संचालन गर्नुभएको थियो ।
पोखरा, १३ पुस ।
कविशिरोमणि जन्मजयन्तीका त्रिदिवसीय कार्यक्रम आइतबारदेखि सुरु भएका छन् । कविशिरोमणि लेखनाथ पौड्यालको १४२ औं जन्मजयन्ती त्रिदिवसीय रुपमा विभिन्न कार्यक्रमहरु सहित सम्पन्न गर्ने लक्ष्य राखिएकोमा आइतबार लेखनाथ काव्य परिचर्चा, खुल्ला कविता प्रतियोगिता तथा विद्यालयस्तरीय स्थलगत कविता लेखन तथा वाचन प्रतियोगिता सम्पन्न भएका हुन् ।
लेखनाथ लायन्स क्लबका अघ्यक्ष लायन बोधराज लामिछानेको अध्यक्षतामा भएको कार्यक्रममा लेखनाथ साहित्य प्रतिष्ठानका अध्यक्ष पद्मराज ढकालले कार्यक्रममा स्वागत गर्दै लेखनाथका कविता सुनाए । प्रमुख आमन्त्रित व्यक्तित्व नेपाल सगीत तथा नाट्य प्रतिष्ठानका पूर्व कुलपति साहित्यकार सरुभक्तले कवि लेखनाथका काव्य परिचर्चा गरेका थिए । कार्यक्रममा लेखनाथका काव्यमा अद्वैत बेदान्त दर्शन शीर्षकमा विद्यावारिधी गरेका डाक्टर बोधराज ढकाल ,संस्कृत क्याम्पस पोखराका पूर्व क्याम्पस प्रमुख डाक्टर जगन्नाथ रेग्मी, साहित्यकार नारायण मरासिनी लगायतले लेखनाथका काव्यका चर्चा गरेका थिए।
त्रिदिवसीय कार्यक्रम अन्तर्गत पौष १४ गते कविशिरोमणि जन्मस्थल सरसफाइ, पौष १५ गते अर्चलेमा मूल समारोह हुनेछ । कार्यक्रमको लेखनाथ उद्योग बाणिज्य संघ ,लेखनाथ पत्रकार मञ्च ,लेखनाथ लायन्स आमा समूहहरू, युवा क्लब, बेगनास ताल बस संचालक समिति सह–आयोजक रहेका छन् ।
पोखरा, १३ पुस ।
कास्कीको पोखरा महानगरपालिका लेखनाथस्थित तालचोकमा पुस ३ गतेदेखि सञ्चालन हुँदै आएको २१ औं लेखनाथ महोत्सव अवधिभर १० करोड भन्दा बढी आर्थिक कारोबार भएको र ३ लाख १० हजार दर्शकले महोत्सव प्रत्यक्ष अवलोकन गरेका छन् । जसका कारण महोत्सव लक्ष्य भन्दा बढी सफलता भएको हो ।
महोत्सव सोमबार पुस १४ गते पोखरा महानगरपालिकाका प्रमुख धनराज आचार्यको प्रमुख आतिथ्यमा समापन हुँदैछ । ‘महोत्सवको पनि महोत्सव’ का रूपमा परिचित लेखनाथ महोत्सवले यस क्षेत्रको सामाजिक, सांस्कृतिक, आर्थिक तथा शैक्षिक विकासमा महत्वपूर्ण योगदान पु¥याउँदै आएको छ । यस वर्षको महोत्सवमा मनोरञ्जनसँगै साहित्य, संस्कृति, कृषि, प्रविधि र शिक्षा क्षेत्रलाई समेट्ने विविध कार्यक्रमहरू सञ्चालन गरिएका थिए ।
महोत्सव अवधिभर साहित्यिक गोष्ठी, महिला विशेष कार्यक्रम, विद्यालयस्तरीय प्रतियोगिता, सांस्कृतिक कार्यक्रम, आदिवासी जनजाति विशेष कार्यक्रम, जैविक विविधता सम्बन्धी प्रदर्शनी, कृषि तथा पशुपंक्षी प्रदर्शनी, सूचना प्रविधि तथा शैक्षिक प्रदर्शनी, हस्तकला तथा स्थानीय उत्पादनहरूको प्रदर्शनी प्रमुख आकर्षणका रूपमा रहेका थिए। यसका साथै विभिन्न जातजातिका लोपोन्मुख रीतिरिवाज, चालचलन तथा सांस्कृतिक पहिचान झल्काउने उत्कृष्ट नृत्य तथा सांस्कृतिक प्रस्तुतिले दर्शकको मन जितेको थियो ।
महोत्सवमा देशभरबाट ख्यातिप्राप्त हास्यव्यङ्ग्य कलाकारहरूको दैनिक प्रस्तुति, राष्ट्रिय लोकदोहोरी गीत कार्यक्रम, लाइभ म्युजिक कन्सर्ट, बाल उद्यान तथा खाना महोत्सवले दर्शकको उल्लेखनीय सहभागिता र उत्साह बढाएको थियो। विशेषगरी स्थानीय परिकार तथा कृषि उत्पादनको प्रवद्र्धनले स्थानीय व्यवसायी र कृषकहरूलाई प्रत्यक्ष लाभ पुगेको आयोजक समितिले जनाएको छ ।
२१ औं सस्करणको लेखनाथ महोत्सवले यस क्षेत्रको पहिचानलाई राष्ट्रियस्तरमा चिनाउन सफल भएको र यस्ता महोत्सवले सामाजिक एकता, सांस्कृतिक संरक्षण र आर्थिक विकासमा टेवा पु¥याउने ,स्थानीय तहको तर्फबाट आगामी दिनमा पनि यस्ता सिर्जनात्मक तथा विकासमुखी कार्यक्रमलाई निरन्तर सहयोग हुने महोत्सवकी मूल संयोजक अध्यक्ष जानुका पराजुली अधिकारीले बताईन् ।
आयोजकका अनुसार महोत्सवले स्थानीय कला, संस्कृति र उत्पादनको प्रचार–प्रसार गर्नुका साथै पर्यटन प्रवद्र्धन, रोजगारी सिर्जना तथा आर्थिक चलायमानता बढाउन महत्वपूर्ण भूमिका खेलेको छ । महोत्सव अवधिभर लाखौ दर्शकले अवलोकन गरेको र अपेक्षाभन्दा उत्साहजनक सहभागिता देखिएको महोत्सवका संयोजक धु्रवबाबु भटट्राईको दावी रहेको छ ।
कार्यक्रममा विभिन्न संघसंस्था, कलाकार, स्वयंसेवक, प्रायोजक तथा सहयोगीलाई सम्मानसमेत गरिने आयोजक समितिले जनाएको छ । सफल आयोजनाका लागि स्थानीयबासी, सुरक्षाकर्मी, सञ्चारकर्मी तथा सबै सहयोगीप्रति आयोजकले आभार व्यक्त गरेका छन् । एघौरौ दिनमा २२ हजार दर्शकले महोत्सव प्रत्यक्ष अवलोकन गरेको र आर्थिक कारोबार करिव ९० लाख रुपैयाको आर्थिक कारोवार रहेको संयोजक धुवबाबु भटट्राईले जानकारी दिए । महोत्सव अवधिभर १० करोड भन्दा बढी आर्थिक कारोबार भएको र दर्शक ३ लाख १० हजारले महोत्सव प्रत्यक्ष अवलोकन गरेका छन् ।
पोखरा, १३ पुस ।
पर्यटकीय सहर पोखरामा आज पुस १३देखि २७औँ पोखरा सडक महोत्सव सुरु भएको छ । अंग्रेजी नयाँ वर्षको स्वागतार्थ आयोजित महोत्सव पाँच दिनसम्म सञ्चालन हुनेछ । रेष्टुरेन्ट एण्ड बार एशोसिएसन नेपाल (रेवान) पोखराले वर्षेनी आयोजना गर्दै आएको पोखरा सडक महोत्सवका लागि लेकसाइड दुलही जस्तै सजाइएको छ ।
ऊर्जा, जलस्रोत तथा सिँचाइ, भौतिक पूर्वाधार तथा यातायात र सहरी विकासमन्त्री कुलमान घिसिङले उद्घाटन समारोहमा बोल्दै पोखरा नेपालको प्रमुख पर्यटकीय गन्तव्य भएको बताए । यस्ता महोत्सवले पर्यटनसँगै स्थानीय उत्पादन र संस्कृतिको प्रचारप्रसारमा महत्त्वपूर्ण भूमिका खेल्ने उनले बताए । पर्यटन प्रवर्द्धनका निम्ति पूर्वाधार, ऊर्जा र सेवाको निरन्तर सुधार आवश्यक रहेको उनले औँल्याए ।
कार्यक्रमलाई सम्बोधन गर्दै गण्डकीका पर्यटनमन्त्री, पोखरा महानगरपालिकाका प्रमुख धनराज आचार्यलगायतले पोखराबाट अन्र्तराष्ट्रिय उडान संचानल हुन नसकेको प्रति सरकारको ध्यानाकर्षण गराउँदै पहल गर्न आग्रह गरेका थिए । रेवान पोखराका निवर्तमान अध्यक्ष नरेश भट्टराईले महोत्सवको सुरक्षाका लागि आयोजक चनाखो रहेको बताउँदै यसका लागि सबै तहका सुरक्षाकर्मीहरुसंग समन्वय गरिएको बताए ।
‘सडकमै खाऔँ, सडकमै नाचौँ, सडकमै रमाऊँ’ भन्ने मूल नारासहित लेकसाइडको करिब तीन किलोमिटर सडकखण्डमा सञ्चालित महोत्सवमा स्वदेशी तथा विदेशी खानाका परिकार, सांस्कृतिक प्रस्तुति, लाइभ संगीत, खेलकुद तथा मनोरञ्जनात्मक कार्यक्रम समावेश छन् । साथै, अंग्रेजी नयाँ वर्षका अवसरमा आयोजना गरिने विभिन्न विशेष कार्यक्रम महोत्सवका आकर्षणका रूपमा रहेको रेवानका अध्यक्ष विश्वराज पौडेलले बताए । पछिल्ला संस्करणले आन्तरिक तथा बाह्य पर्यटक आकर्षित गर्दै पोखराबाट अंग्रेजी नयाँ वर्षको उत्सव मनाउने परम्परा स्थापना गरेको उनको भनाई छ ।
महोत्सव अवधिभर आन्तरिक तथा विदेशी पर्यटकको उल्लेख्य उपस्थिति रहने अपेक्षा गरिएको छ । यसले होटेल, रेस्टुरेन्ट, यातायात तथा पर्यटनसँग सम्बन्धित अरू व्यवसायमा सकारात्मक प्रभाव पार्ने आयोजकको विश्वास छ । महोत्सवमा नेपाली तथा विदेशी परिकारका खानाका स्टल, स्थानीय सांस्कृतिक प्रस्तुति, लाइभ संगीत कार्यक्रम, बोट रेस, डोरी तान्ने प्रतियोगिता, वेटर रेस तथा फोटो/भिडियो प्रदर्शनीलगायत विविध कार्यक्रम समावेश गरिएको रेवान पोखराका उपाध्यक्ष एवं महोत्सव संयोजक बसन्त गौतमले बताए । महोत्सवले पोखराको सांस्कृतिक विविधता, पर्यटन सम्भावना र स्थानीय अर्थतन्त्रलाई थप सुदृढ बनाउने विश्वास लिइएको छ ।
महोत्सवको मुख्य प्रायोजकमा गोर्खा व्रुअरी प्रालि र सह प्रायोजकमा यति डिष्ट्रिलरी, बोटलर्स नेपाल (तराई) र दि नेपाल डिष्टिलरी प्रालि रहेका छन् । प्रवद्र्धकमा नेपाल पर्यटन वोर्ड, पोखरा महानगरपालिका, गण्डकी प्रदेश सरकार, पोखरा भ्रमण वर्ष २०२५ र पोखरा पर्यटन परिषद् रहेका छन् । त्यस्तै सिद्धार्थ बैंक लिमिटेड बैंकिङ पार्टनरमा रहेको छ । म पानी, गृहलक्ष्मी ग्याँस, अन्नपूर्ण केवल कार, रेड बुल सहयोगी संस्थामा रहेको छ ।
रेवान पोखराका महासचिव बीरेन्द्र शेरचनले कार्यक्रम सञ्चालन गरेका थिए । महोत्सवमा यस वर्ष न्यू ईयर ईभको दिन पुस १६ गते एक्स नेपथ्य, उज्जन शाक्य, डिमर्चा, लेकाली, देउराली व्याण्डको लाईभ प्रस्तुती रहने सांगीतिक उत्सव कार्यक्रम संयोजन गरिरहेको अल टेक नेपालका सञ्चालक शेरबहादुर गुरुङले जानकारी दिए ।
पोखरा, १३ पुस ।
सञ्चार तथा सूचना प्रविधि मन्त्री जगदीश खरेलले मुलुक पूर्ण रूपमा निर्वाचनको दिशामा अघि बढिसकेको बताएका छन् । आज पोखरामा सञ्चार तथा सूचना प्रविधि मन्त्रालयकाे आयाेजनामा आमसञ्चारलाई व्यावसायिक बनाउन यस क्षेत्रमा विकसित नविनतम अवधारणा सम्बन्धि अन्तरक्रिया तथा छलफल कार्यक्रममा बोल्दै उनले यस्तो बताएका हुन ।
उनले प्रमुख राजनीतिक दलहरूबिच निर्वाचनमा जाने विषयमा उच्चस्तरीय सहमति भइसकेको दाबी गरे । उनले नयाँ अनि सुनौलो बिहानीसङै मुलुक निर्वाचनमय भएको बताउदै अब कोही पनि पछि हट्ने अवस्था नरहेको बताए ।
सरकारको प्रवक्ता समेत रहेका मन्त्री खरेलले राजनीतिक दलहरू समानुपातिक बन्द सूची तयार गर्न र गठबन्धन निर्माणमा जुटिसकेको बताए । फागुन २१ गतेपछि मुलुकको राजनीतिमा नयाँ आयाम र मानक स्थापित हुने दाबी गर्दै उनले निर्वाचनमार्फत आउने नयाँ नेतृत्वले देशलाई विकास, समृद्धि र सुशासनको बाटोमा लैजाने विश्वास व्यक्त गरे ।
फरक विषयमा उनले सञ्चार क्षेत्रको रूपान्तरण अपरिहार्य भएको बताए । उनले युट्युब, अनलाइन न्युज पोर्टल र डिजिटल मिडियाहरू नै अबको देशको नयाँ मूलधारको मिडिया भएको बताएका छन् । नेपालमा आवश्यक्ता भन्दा बढी सञ्चारमाध्यम खुलेको र सञ्चालनमा असहज अवस्था बनेको पनि उनले सुनाए ।
पोखरा, ११ पुस ।
रेस्टुरेन्ट एन्ड बार एसोसिएसन नेपाल ९रेबान० पोखराले आयोजना गर्ने २७ औं संस्करणको ‘पोखरा सडक महोत्सव’ को सबै तयारी पूरा भएको छ । पुस १३ देखि १७ गतेसम्म चल्ने महोत्सवको तयारी पूरा भएको शुक्रबार पोखरामा पत्रकार सम्मेलनको आयोजना गरि जनाकारी दिएको हो ।
पोखराको पर्यटन प्रवद्र्धन, स्थानीय स्तरमा उत्पादित सामग्रीको बजार विस्तार, लेकसाइडको ब्राण्डिङ तथा आर्थिक गतिविधि बढाउने उद्देश्यले महोत्सव निरन्तर आयोजना गर्दै आएको रेवान पोखराका अध्यक्ष विश्वराज पौडेलले बताउनु भयो । उहाँका अनुसार कला, संस्कृति र खानाका माध्यमबाट पोखराको पहिचान मजबुत बनाउन महोत्सव प्रभावकारी माध्यमका रूपमा स्थापित भइसकेको छ । महोत्सवमा विभिन्न जातजातिका लोपोन्मुख भेषभूषा तथा सांस्कृतिक झाँकी प्रदर्शन, मौलिक सांस्कृतिक कार्यक्रम, राष्ट्रिय तथा अन्तर्राष्ट्रिय खानाका परिकार, लाइभ कन्सर्ट, डुंगा दौड प्रतियोगिता, वेटर रेस, डोरी तान्ने प्रतियोगिता, मःम तथा ससेज खाने प्रतियोगितालगायत विविध कार्यक्रम समावेश हुने महोत्सव संयोजक तथा रेवान पोखराका उपाध्यक्ष वसन्त गौतमले जानकारी दिनुभयो । उहाँका अनुसार महोत्सव अवधिभर पर्यटनको विकास, अवसर र चुनौतिबारे अन्तर्क्रिया कार्यक्रम पनि सञ्चालन गरिनेछ ।
यसवर्षपनि युवा पुस्ताबीच लोकप्रीय रहेका चर्चित कलाकारहरुले सडक महोत्सवलाई सोभायमान बनाउनेछन । जसअन्र्तगत नेपथ्य एक्स रियुनियन स्पेशलमा गायक रविन श्रेष्ठ “आँगनैभरी”, “छेक्यो छेक्यो” र गौतम गुरुङ (जोमसोमै बजारमा”, “गण्डकीको तीरैमा”, लेकाली व्याण्डबाट भाइ गुरुङ (पहिलो नजर, कहाँबाट सुरु), नविन गुरुङ (यो मुटुमा, सपनीमा), देउराली व्याण्डका शान्तराज बज्राचार्य (ढूंगे साँघुको मेलैमा, लुकी चोरी), डिमार्च भास्करध्वज श्रेष्ठ (झ्याम झ्याम, तारा खस्यौली, कैलाशमा), केहर लिम्वु (झ्यालैमा, कता छौ मेरो फूल), स्वप्न स्वरुप(कसरी भनु तिमिलाई, जे छौ तिमि, उज्जन शाक्य (वेवी वेवी रे) कार्टन क्रु आश्मा विश्वकर्मा (वि गर्ल स्काई÷सरोज अधिकारी, टुकी र्यापर (कस्तो छ तिमिलाई, सम्झना), सन्तोष बस्याल (रेशम फिरिरी, ढाटयो मायाले) लगायत प्रस्तुति रहनेछन ।
त्यस्तै चर्चित लोक दोहोरी गायक पुरुषोत्तम न्यौपाने (झील झील सितारा, ढुंगे धारामा, देउरालीमा धजा), जीवन दाहाल (पोखरामा घाम, जाम त भने), चोलेन्द्र पौडेल पानी मुनी मुनी लगायत सांस्कृतिक प्रस्तुतीको आन्नद लिन सकिनेछ ।
महोत्सवमा सह आयोजकको रुपमा प्रोटोन इमास सेभेन, राईड पार्टनरको रुपमा टिभिएस रोहिन, रेष्ट्रुरेन्ट पार्टनर सिटि स्क्वायर, एजुकेशन पार्टनर जी एण्ड के ईन्टरनेशनल एजुकेशन कन्सलटेन्ट, साउण्ड पार्टनर एस.के साउण्ड, प्रचार प्रसार संयोजक परिचय, हस्पिटल पार्टनर चरक अस्पताल तथा ईभेन्ट पार्टनर अल टेक नेपाल रहेका छन ।
पर्यटकीय सहरको सौन्दर्यता, पोखरा र आसपासका कला संस्कृति, फरकफरक खानाका स्वाद तथा नयाँ, पुराना चर्चित कलाकारहरुको साँस्कृतिक कार्यक्रम सहित पौष १३ देखि १७ सम्म पोखरा सहर गुल्जार हुने हुँदा उक्त अवसरको फाईदा उठाउन आन्तरिक तथा बाह्य पर्यटकलाई आयोजकले आग्रह गरेको छ ।
मुख्य इभेन्ट भोलि
पोखरा, ११ पुुस ।
साक यान्त मुवाथाईको आयोजनामा पोखरामा अन्तराष्ट्रिय स्तरको ‘द कन्टेन्डर फाइट सिरिज ३’ सुरु भएको छ । शुक्रबादेखी सुरु भएको प्रतियोगिताको पहिलो दिन प्रिमेडिकल, सम्झौता हस्ताक्षर, प्राविधिक जानकारी तथा फेसअफको कार्यक्रम भएको थियो ।
मुवाथाई सँगै एमएमए (मिक्स मार्सल आट्र्स) समेत आयोजना हुने छ । प्रतियोगिताको मुख्य इभेन्ट भोलि हुँदैछ । पहिलो र दोस्रो संस्करणको सफलतापछि तेस्रो संस्करणमा केज फाइट जोडिएको छ । प्रतियोगितामा ३ राष्ट्रका ४८ फाइटरको सहभागिता रहेको छ । भारतका ८ शहरबाट ११ फाइटर, श्रीलंकाबाट १ र बाकी फाइटर नेपाली रहेका छन् ।
शनिबार २३ फाइट हुनेछन् । जसमा मुख्य इभेन्ट गण्डकी प्रदेशकी खेलाडी सुस्मिता थापा मगर र भारतकी सरिता राठोर बिच हुनेछ । मुख्य इभेन्टको विजेताले ८० हजार रुपैयाँ प्राप्त गर्नेछन् । यस्तै उपविजेताले ४० हजार रुपैयाँ प्राप्त गर्नेछ । त्यो बाहेक नकआउट गराएमा थप ३० हजार रुपैयाँ बोनस खेलाडीले प्राप्त गर्नेछ । यस्तै अन्य फाइटमा नकआउट गरेमा १० हजार रुपैयाँ वोनस खेलाडीले पाउनेछ ।
आफु फाइटलाई लिएर निकै खुसी रहेको सुस्मिताले बताएकी छन् । उनले यस अघि भारतमा समेत पुगेर फाइट खेलेको अनुभव भएकाले भोलिको मुख्य इभेन्ट निकै प्रतिस्पर्धात्मक हुने बताइन् । उनको प्रतिद्धन्द्धी सरिता राठोरले आफु पोखरामा फाइट खेल्न पाउँदा निकै खुसी भएको सुनाउँदै सुस्मिताको फाइट आफुले देखेको कारण टक्कर दिने बताइन ।
यस्तै प्रतियोगिताका संयोजक खगेन्द्र क्षेत्रीले पर्यटकीय राजधानी पोखरामा मार्सलआर्टका समर्थक र पर्यटकलाई थप आकर्षकको रुपमा केज फाइट हुने जानकारी दिए ।
मुआथाईमा नयाँपन दिनका लागि तेस्रो संस्करण केजमा गराएको उनले बताए । ‘फाइट नाइट आफैमा रोमाञ्चक खेल हो । पोखरा पर्यटकीय राजधानी भएकाले हामीले पर्यटन प्रबद्र्धनका लागि नै केज फाइट गर्न लागेका छौं’ उनले भने, ‘सम्भवत यो गण्डकी प्रदेशकै पहिलो केज फाइट हो । हामीले यसमा प्रवेश निशुल्क गरेका छौं ।’ पोखरामा मुआथाई, एमएमए चिनाउनका लागि निशुल्क गरिएको उनले सुनाए । प्रतियोगिता भोलि १ बजेबाट बाराहिघाटस्थित खुल्ला चौरमा हुनेछ ।
पोखरा, ११ पुस ।
लेखनाथमा जारी २१औँ संस्करणको लेखनाथ महोत्सव दर्शक सहभागिता, आर्थिक कारोबार र सांस्कृतिक प्रस्तुतिका हिसाबले सफलतातर्फ उन्मुख हुँदै गएको छ। स्थानीय उत्पादनको प्रवद्र्धन, लोकसंस्कृतिको संरक्षण र आर्थिक चलायमानता महोत्सवका प्रमुख उपलब्धिका रूपमा देखिएका छन्।
२०६१ सालमा ‘सुन्तला महोत्सव’का रूपमा सुरु भएको लेखनाथ महोत्सव आज कृषि, उद्योग, संस्कृति र साहित्यको साझा मञ्चका रूपमा स्थापित भएको छ। स्थानीय उत्पादनको बजारीकरण, साना तथा मझौला व्यवसायको प्रवद्र्धन र सांस्कृतिक पहिचान जोगाउन लेखनाथ महोत्सव प्रभावकारी माध्यम बन्दै गएको सरोकारवालाहरूको भनाइ छ ।





