पोखरा, २२ चैत ।

मधेशी आयोगले सातौं वार्षिक प्रतिवेदन गण्डकी प्रदेश प्रमुखसमक्ष पेस गरेको छ । प्रदेश प्रमुखको कार्यालयमा आइतबार आयोजित कार्यक्रममा आयोगकी सदस्य आभासेतु सिंहले वार्षिक प्रतिवेदन प्रदेश प्रमुख भट्टलाई प्रदान गरिन् ।

नेपालको संविधानको धारा २९४ को उपधारा ९३० अनुसार पेश भएको प्रतिवेदनमा आर्थिक वर्ष २०८१र८२ मा सम्पन्न गरेका गतिविधि, पहल र उपलब्धि समेटिएको छ । प्रतिवेदनमा मधेशी समुदायको अधिकार संरक्षण, सामाजिक न्यायको प्रवर्द्धन, समावेशी विकास तथा नीतिनिर्माणका क्षेत्रमा आयोगले गरेका कामकारबाहीलाई विस्तृत रूपमा समेटिएको सदस्य सिंहले जनाइन् ।

कार्यक्रममा प्रदेश प्रमुख भट्टले मधेशी समुदायको हकहित सुनिश्चित गर्न आयोगको भूमिका महत्वपूर्ण रहेको बताए । आयोगले सरकारी सेवामा मधेसीहरूको प्रतिनिधित्व वृद्धि गर्न आवश्यक प्रशिक्षण कार्यक्रम गरेकामा खुशी व्यक्त गरे ।

भट्टले मधेसको समस्या मधेसको मात्र नभएर सबैको साझा समस्या भएकाले देश, सरकार, समाजले एकजुट भएर समाधान गर्नुपर्ने बताए । प्रदेश प्रमुखको कार्यालयले सिफारिस कार्यान्वयनका लागि प्रतिवेदनलाई प्रदेशसभामा पठाइने पनि जानकारी दिए ।

सबैभन्दा बढी जनसंख्या रहेको मधेशमा धेरै समुदाय रहेको उल्लेख गर्दै उनले मधेशमा रहेका दलित समुदायको पक्षमा काम गर्न पनि आग्रह गरे ।

आयोगकी सदस्य सिंहले मधेशी समुदायको हकहितका लागि नीति, नियम बनाउन आग्रह गर्दै मधेशी समुदायको पक्षमा काम गर्न प्रादेशिक रुपमा बजेटको विनियोजन गर्न पनि अनुरोध गरिन् ।

पोखरा, २२ चैत ।

यही चैत २९ गतेदेखि आगामी वैशाख १ गतेसम्म फेवा किनारमा आयोजना हुने २१ औं फेवा नव बर्ष महोत्सव २०८३ लाई सफल पार्न विभिन्न संघसंस्थाले सघाउने प्रतिबद्धता जनाएका छन् ।

महोत्सवको आयोजक संस्था होटल संघ पोखरा नेपालले पोखरास्थित विभिन्न पर्यटन सम्बद्ध संस्थाका अध्यक्ष र पदाधिकारीसँग हालै गरेको छलफलमा उनीहरुले फेवा महोत्सव समग्र पोखरेलीको महोत्सवको रुपमा आफूहरुले बुझेको बताएका थिए ।

महोत्सवबारे जानकारी दिंदै होटल संघ पोखरा नेपालका अध्यक्ष एवं महोत्सवका संयोजक लक्ष्मण सुवेदीले पोखराको सहिदचोकदेखि खहरेचोकसम्म आयोजना हुने महोत्सवमा यसपटक पंचै बाजा प्रतियोगिता विशेष रहने अवगत गराए । यस अन्तर्गत खहरेबाट अम्बोटसम्म दुलही लिन जानेदेखि खहरेमा रत्यौली खेल्ने जस्ता रमाइला गतिविधि समावेश हुने जानकारी उनले गराए । पर्यटक दौड, दोहोरीका कार्यक्रम र सांगीतिक कन्सर्ट पनि महोत्सवमा समेटिने उनले सुनाए ।

आयोजक संघको सल्लाहकार परिषद्का संयोजक एवं होटल संघ नेपालका केन्द्रिय सदस्य भरतराज पराजुलीले नेपाली कला र संस्कृतिको संरक्षण गर्दै पोखरामा पर्यटक आकर्षित गर्ने र उनीहरुको बसाई अबधि लम्ब्याउँदै मनोरञ्जन प्रदान गर्ने उद्धेश्य महोत्सवले लिएको बताए ।

कार्यक्रममा पोखरा महानगरपालिका व्यवसाय प्रबद्र्धन केन्द्रका प्रमुख नवराज अधिकारीले फेवा महोत्सव महोत्सव मात्र नभई नयाँ बर्षमा आयोजना गरिने कारण यो पर्व पनि भएको बताए । सरकारले गर्नुपर्ने महोत्सव निजी क्षेत्रबाट आयोजना गरिनु सराहनीय कदम भएको भन्दै उनले संघको प्रशंसा गरे ।

कार्यक्रमका अवसरमा महोत्सवलाई एकआपसमा हातेमालो गरी मिलेर सफल पारिनुपर्ने, महोत्सवका अवसरमा पोखराको कला, संस्कृति र सहासिक गतिविधि प्रदर्शन गर्न सकिने, महोत्सव आगन्तुक पर्यटकलाई हिंडडुलमा दुःख नहुने गरी संचालन गरिनुपर्ने, होटलको दररेट महंगो हुन नहुने, महोत्सवको डिजिटल प्रबद्र्धनमा जोड दिनुपर्ने र महोत्सवले जेन–जी युवालाई समेत आकर्षण गर्न सक्नुपर्ने विषय सुझावको रुपमा राखिएको थियो । सुरक्षा, ट्राफिक र पार्किङ व्यवस्थापनका विषयमा समेत महोत्सवमा सुझाव राखिएको थियो ।

सो अवसरमा पोखरा पर्यटन परिषद्, पोखरा उद्योग वाणिज्य संघ, टान, नाट्टा, रेवान, नेपाल हवाई खेलकूद संस्था, पोखेली ट्याक्सी सेवा प्रालि, ना, पोखरा च्याम्बर अफ कमर्स, गाउँ पर्यटन प्रबद्र्धन मञ्च, ओटेफ, टेवान, गुरुङ पर्यटन व्यवसायी संघ, फेवा डुंगा व्यवसायी संगठन, मुद्रा सटही व्यवसायी संगठन र वडा नम्बर ६ का तर्फबाट सुझाव राखिएको थियो । कार्यक्रमको संचालन संघका सचिव पार्वता पाण्डेले गरेकी थिइन् ।

 

पोखरा, २२ चैत ।

पोखरास्थित गुप्तेश्वर महादेव बहुमुखी क्याम्पसको एमबिएस तेस्रो सेमेस्टरका विद्यार्थीहरूको सक्रियतामा आइतबार एक विशेष समारोहबीच बिदाइ तथा स्वागत कार्यक्रम सम्पन्न भएको छ । क्याम्पसको आफ्नै सभाहलमा आयोजित उक्त कार्यक्रममा एमबिएस चौथो सेमेस्टरका विद्यार्थीहरूलाई बिदाइ गरिएको छ भने नवआगन्तुक प्रथम सेमेस्टरका विद्यार्थीहरूलाई भव्य स्वागत गरिएको छ ।

कार्यक्रमलाई सम्बोधन गर्नुहुँदै क्याम्पस सञ्चालक समितिका अध्यक्ष श्रीराम सुवेदीले उच्च शिक्षाको क्षेत्रमा गुप्तेश्वर महादेव क्याम्पसले आफ्नो छुट्टै पहिचान बनाएको बताउनुभयो । उहाँले भन्नुभयो, “हाम्रो लक्ष्य केवल किताबी ज्ञान दिने मात्र नभई बजारमा प्रतिस्पर्धा गर्न सक्ने कुशल व्यवस्थापक र नैतिकवान नागरिक उत्पादन गर्नु हो ।” उहाँले बिदाइ भएर जाने विद्यार्थीहरूलाई कार्यक्षेत्रमा सफलताको शुभकामना दिँदै नयाँ विद्यार्थीहरूलाई क्याम्पसको गरिमा कायम राख्न आग्रह गर्नुभयो ।

समारोहमा क्याम्पस प्रमुख धर्मराज बरालले एमबिएस तहको अध्ययन अनुसन्धानमा आधारित हुनुपर्नेमा जोड दिनुभयो । उहाँले विद्यार्थीहरूलाई सिर्जनशील हुन र क्याम्पसले उपलब्ध गराएका स्रोतसाधनको अधिकतम प्रयोग गर्न सुझाव दिनुभयो । त्यसैगरी, प्राध्यापक संघका अध्यक्ष लेखनाथ बरालले शैक्षिक गुणस्तर सुधारमा प्राध्यापक र विद्यार्थीको समन्वय आवश्यक रहेको औंल्याउनुभयो ।

आइक्युएसी प्रमुख एवं एमबिएस कोअर्डिनेटर राजकुमार सुवेदीले क्याम्पसले गुणस्तर सुनिश्चितताका लागि चालेका कदमहरूबारे प्रकाश पार्नुभएको थियो । त्यस्तै सृजनशील विद्यार्थी मञ्चकी सचिव स्मृति थापाले विद्यार्थीहरू बीचको भ्रातृत्व र रचनात्मक कार्यले नै क्याम्पसको वातावरण जीवन्त रहने धारणा राख्नुभयो ।

बिदाइ भई जान लागेका चौथो सेमेस्टरका विद्यार्थी सफल देवकोटाले आफ्नो दुई वर्षे शैक्षिक यात्राको अनुभव सुनाउँदै क्याम्पसले प्रदान गरेको ज्ञान र मार्गदर्शन जीवनभरका लागि प्रेरणाको स्रोत बन्ने बताउनुभयो । नवआगन्तुक प्रथम सेमेस्टरका विद्यार्थीहरूले क्याम्पसको स्वागतले आफूहरूलाई थप उत्साहित बनाएको र शैक्षिक लक्ष्य प्राप्तिका लागि प्रतिबद्ध रहने बताएका थिए ।

बिदाई हुने विद्यार्थीहरूलाई सम्मान स्वरुप मायाको चिनो प्रदान गरिएको सो कार्यक्रममा विभिन्न विभागका विभागीय प्रमुख, प्राध्यापक तथा कर्मचारीहरूको उपस्थिति रहेको थियो ।

पोखरा, २२ चैत्त ।

नेपाल खेलकुद पत्रकार मञ्च गण्डकीले आयोजना गर्ने ‘पोखरा स्पोर्टस अवार्ड’लाई भव्य, सभ्य र थप प्रभावकारी बनाउने उद्देश्यसहित कास्की जिल्ला तथा गण्डकी प्रदेशका विभिन्न खेल संघसंग छलफल गरेको छ । आगामी बैशाख १८ गते पोखरामा हुने दशौं संस्करणको पोखरा स्पोर्टस अवार्डलाई खेलाडीमैत्री, पारदर्शी र समावेशी बनाउने लक्ष्यसहित सुझाव संकलन गर्न मञ्चका कार्यवाहक अध्यक्ष राजाराम पौडेलको अध्यक्षतामा छलफल तथा अन्तरक्रिया आयोजना गरिएको होे । पौडेलले खेल क्षेत्रको वास्तविक अवस्था बुझ्दै अवार्डलाई अझ व्यवस्थित बनाइने स्पष्ट पारे ।

छलफलमा सहभागी संघका प्रतिनिधिहरूले अवार्डको स्तर उकास्न विगतका कमजोरी सुधार्दै अगाडि बढ्नुपर्नेमा जोड दिएका छन् । उनीहरुले यस पटक कार्यविधि निर्माण गरेकोमा खुसी व्यक्त गर्दै त्यसलाई अझ सुधार गर्दै जान र अवार्डका सम्पन्न गर्नका लागि संघको तर्फबाट सक्दो सहयोग गर्ने बताए ।

गण्डकी प्रदेश आर्चरी संघका उपाध्यक्ष योगेन्द्र शेरचनले सबै खेल र खेलाडीलाई समेट्दै उनीहरूको प्रतिभा प्रस्तुत गर्ने वातावरण बनाउन सके अवार्ड अझ आकर्षक बन्ने बताए । टेबल टेनिस संघ गण्डकीका अध्यक्ष दिलिप जोशीले एउटै खेल र खेलाडी दोहोरिने प्रवृत्तिले नयाँ प्रतिभा ओझेलमा पर्ने भएकाले मूल्यांकन प्रक्रियामा सुधार आवश्यक रहेको धारणा राखे ।

फेन्सिङ संघ कास्कीका अध्यक्ष विजय शाहीले राष्ट्रिय स्तरमा नपुगेका तथा नयाँ खेललाई पनि अवार्डमा समेट्नुपर्नेमा जोड दिए । यसले खेल क्षेत्रको दायरा फराकिलो बनाउने उनको भनाइ थियो । जुडो संघ कास्कीका अध्यक्ष पदम बहादुर छन्त्यालले खेलाडीले राम्रो प्रदर्शन गरे पनि पर्याप्त प्रवद्र्धन नपाएको गुनासो गर्दै मञ्चले अवार्डमार्फत खेलाडीलाई प्रोत्साहन गरेकोमा धन्यवाद व्यक्त गरे ।

कबड्डी संघ गण्डकीका अध्यक्ष हरि जिसीले प्रदेशमै सीमित खेललाई पनि प्राथमिकता दिनुपर्ने र ‘पिपल्स च्वाइस’ अवार्ड छनोट निष्पक्ष हुनुपर्ने बताए । एथलेटिक्स संघ कास्कीका सचिव सिद्धान्त अधिकारीले खेलअनुसार फरक मापदण्ड आवश्यक पर्ने भएकाले कार्यविधिमा लचिलोपन आवश्यक रहेको बताए ।

सेपाकताक्रो गण्डकीका अध्यक्ष श्याम बहादुर श्रेष्ठले राष्ट्रिय तथा अन्तर्राष्ट्रिय उपलब्धि हासिल गरेका खेललाई जनस्तरसम्म पु¥याउन अवार्ड महत्वपूर्ण माध्यम बन्ने बताए । ह्यान्डबल संघ कास्कीका अध्यक्ष चित्रबहादुर थापाले एकल र समूहगत खेललाई एउटै आधारमा मूल्यांकन गर्न नहुने उल्लेख गर्दै स्तरअनुसार छुट्टै मापदण्ड आवश्यक रहेको बताए ।

आर्चरी संघ कास्कीका वसन्त गौचनले जिल्ला स्तरमै सीमित खेललाई पनि अवार्डमा समेट्नुपर्नेमा जोड दिए । साथै, खो–खो संघका विशाल कुँवर, हक्कीका हित गुरुङ र पौडी संघ गण्डकीका अध्यक्ष आनन्द कुँवरले पनि समावेशीता, पारदर्शिता र खेलाडी प्रोत्साहनका विषयमा सुझाव दिएका थिए । पोखरा स्पोर्टस अवार्ड कार्यविधी निर्माण समितिका सदस्य राजन पौडेलले नेपाल खेलकुद पत्रकार मञ्च गण्डकीले निर्माण गरेको कार्यविधिको बारेमा जानकारी गराएका थिए ।

छलफलबाट प्राप्त सुझावका आधारमा ‘पोखरा स्पोर्टस अवार्ड’लाई अझ समावेशी, प्रतिस्पर्धात्मक र प्रेरणादायी बनाउने तयारी अघि बढाइएको मञ्चका महासचिव परशुराम शर्माले बताए । आगामी बैशाख १८ गते आयोजना हुने पोखरा स्पोर्टस अवार्डमा वर्ष खेलाडी पुरुष, वर्ष खेलाडी महिला, वर्ष उदीयमान खेलाडी, वर्ष उत्कृष्ट प्रशिक्षक, वर्ष उत्कृष्ट खेल पत्रकार, वर्ष उत्कृष्ट खेल संघसंस्था र पिपल्स च्वाइस अवार्ड गरी आठ विद्यामा अवार्ड प्रदान गरिदैछ । उक्त अवार्ड खेलाडी सम्मानमा गण्डकीकै ठूलो इभेन्ट हो ।

अवार्डका लागि गण्डकी प्रदेश सरकार, प्रदेश खेलकुद परिषद् गण्डकीसहित कास्कीका पोखरा महानगरसहित पाँचै वटा पालिकाको विशेष सहयोग रहनेछ । अवार्ड सफल पार्न विभिन्न संघसंस्थाले सहयोग गर्ने क्रम जारी छ ।

पोखरा २२ चैत्र ।

लायन्स इन्टरनेसनल डिष्ट्रिक्ट ३२५ जे नेपालको चौथो डिष्ट्रिक्ट कन्भेन्सन सम्पन्न भएको छ । पोखरा इभेन्ट सेन्टरमा भएको भव्य कन्भेन्सनबाट आगामी लायन वर्षका २०२६र२७ लागि डिष्ट्रिक्ट गभर्नरमा प्रजापती बास्तोला, फस्ट भाईस डिष्ट्रिक्ट गभर्नरमा कुश प्रसाद मल्ली र सेकेन्ड भाईस डिष्ट्रिक्ट गभर्नरमा कृष्ण प्रसाद शर्मा निर्वाचित भएका छन् ।

कन्भेन्सनमा उपस्थित प्रमुख अतिथि इन्टरनेसनल डाइरेक्टर पंकज मेहता र विशेष अतिथिका रुपमा उपस्थित पाष्ट इन्टरनेसनल डाइरेक्टर सञ्जय खेतानले नेपालमा लायन्स क्लबले गरेको कार्यको प्रशंसा गर्दै मेम्बरसिप ग्रोथमा अझ ध्यान दिन आग्रह गरे ।

लायन्स क्लब अफ पोखरा अन्नपूर्णले व्यवस्थापन गरेको उक्त कार्यक्रम ऐतिहासिक र स्मरणीय बनेको कार्यक्रमका अध्यक्ष तथा हालका डिष्ट्रिक्ट गभर्नर मिलन बाबु मल्लले जानकारी दिए ।

डिष्ट्रिक्ट गभर्नर इलेक्ट बास्तोलाले क्याबिनेट सचिवमा जीवन गोर्खाली, क्याबिनेट कोषाध्यक्षमा पुरुषोत्तम प्रसाद पराजुलीलाई मनोनित गरेका छन् । त्यसैगरी चिफ एडभाईजरमा राजु श्रेष्ठ र चिफ गभर्नर एडमा रामराजा थापालाई मनोनित गरेका छन् । साथै उनले कार्यक्रममा बोल्दै आफ्नो कार्यकालमा सामाजिक सेवा, नेतृत्व विकास र संस्थागत सुदृढीकरणलाई प्राथमिकतामा राख्दै अघि बढ्ने प्रतिबद्धता व्यक्त गरेका छन् ।

कार्यक्रममा मल्टिपल काउन्सिल चियरपसर्न तथा आईपिडिजी मिलन थापा, मल्टिपल फस्ट पर्सन, मल्टिपल काउन्सिल मेम्बर तथा पिडिजी ध्रुब बहादुर थापा, मल्टिपल कोअर्डिनेटर तथा पिडिजी योगेन्द्र प्रधान, मल्टिपल डिष्ट्रिक्ट चियरपर्सन तथा पिडिजी हरि प्रसाद मरहट्टा, पाष्ट मल्टिपल काउन्सिल चियरपर्सन प्रेम बहादुर श्रेष्ठ, पिडिजी ध्रुव श्रेष्ठ लगायत अन्य डिष्ट्रिक्टबाट उपस्थित अतिथिसहित १ हजार भन्दा बढी लायन्स र लियो सदस्यहरुको उपस्थिती थियो ।

क्याबिनेट सेक्रेटरी पुरुषोत्तम बस्नेतले सञ्चालन गरेको उक्त कन्भेन्सन कार्यक्रममा उत्कृष्ट कार्य गर्ने लायन्स लिडरहरुलाई सम्मान गरिएको थियो । कन्भेनर सुर्य प्रसाद बरालले उपस्थित सबैलाई धन्यवाद ज्ञापन गरेका थिए ।

त्यसैगरी उक्त दिन सम्पन्न लियो डिष्ट्रिक्ट काउन्सिल ३२५ जे नेपालको कन्भेन्सनबाट आगामी वर्षका लागि लियो डिष्ट्रिक्ट प्रेसिडेन्टमा आशिष थापा र लियो भाईस डिष्ट्रिक्ट प्रेसिडेन्टमा माधव तिमल्सिना निर्वाचित भएका छन् । इलेक्ट लियो प्रेसिडेन्ट थापाले लियो डिष्ट्रिक्ट सचिवमा सहनसिल बराल र कोषाध्यक्षमाबिनिता बोगटीलाई मनोनित गरेका छन् ।

 

पोखरा, २० चैत ।

बालबालिकामा देखिने मस्तिष्क र स्नायु कोषहरुको स्वाभाविक विकासक्रममा हुने असमान अवस्थाको रुप अटिजम भएको यहाँ आयोजित एक कार्यक्रमका बक्ताले जोड दिएका छन् ।

१९ औ अन्तराष्ट्रिय अटिजम सचेतना दिवसको अवसरमा पोखरा महानगरपालिका वडा नं १७ महतगौडामा सञ्चालित जानकी माध्यमिक विद्यालय अटिजम श्रोत केन्द्रमा आयोजित अन्तरकृया कार्यक्रममा बोल्ने वक्ताहरुले पछिल्लो समय भुसको आगो जस्तो पैmलिएको अटिजमका विषयमा सिंगो समाज सचेत हुनु पर्ने आवश्यकता औल्याएका हुन ।

पोखरा महानगरपालिका वडा नं. १७ का वडाध्यक्ष राधिका शाही योगीले कार्यक्रमको उद्घाटन गर्दै पछिल्लो समय घरघरको समस्याका रुपमा देखिएको अटिजमको केही हतसम्म भएपनि समाधानका लागि महानगरले पहिलो पटक श्रोत कक्षा सञ्चालन गरेको जानकारी दिनुभयो ।

जानकी माविको खेलमैदानमा राष्ट्रपति शैक्षिक सुधार कार्यक्रम अन्तर्गत निर्माण अधुरो रहेको भवनलाई सम्पन्न गरि सञ्चालनमा आएको सो अटिजम श्रोत केन्द्रमा हाल ४० जना विद्यार्थी, आठ जना सहजकर्ता र आया, एक जना थेरापिष्ट अध्ययन अध्यापन गर्दै आएका छन् ।

कार्यकक्रममा पोखरा १७ वडा कार्यालयले श्रोत केन्द्रका लागि आवश्यक ५० हजार रुपैया मुल्य वरावरका आवश्यक सामाग्री विद्यालय व्यवस्थापन समितिलाई हस्तान्तरण गरिएको थियो । दिवसका अवसरमा अटिजमका विद्यार्थी, विद्यालय व्यवस्थापन समिति, अभिभावक, स्थानीय आमा समुह, टोल विकास संस्थाहरुको सहभागितामा प्रभातफेरी कार्यक्रमको आयोजना गरिएको थियो ।

विद्यालय व्यवस्थापन समितिका अध्यक्ष हरिप्रसाद बास्तोलाको अध्यक्षतामा भएको कार्यक्रममा प्रा.डा नम्रता केसी, पूर्व विविस अध्यक्ष नगेन्द्र गुरुङ, प्रधानाध्यापक अर्जुन कँडेल, अटिजम श्रोत केन्द्र इन्चार्ज कमल आचार्य लगायतले अटिजमको वर्तमान अवस्था र यसमा तीनै तहका सरकारले खेल्नु पर्ने भूमिकाका वारेमा चर्चा गर्नुभएको थियो ।

 

गण्डकीमा विज्ञान पढ्ने विद्यार्थी कम
पोखरा, २० चैत्त ।

नेपालको उच्च शिक्षा क्षेत्रमा गहिरो क्षेत्रीय र विषयगत असमानता रहेको तथ्यांक सार्वजनिक भएको छ । पोखरास्थित समाज विज्ञान केन्द्रले शुक्रबार आयोजना गरेको मासिक ‘कचहरी’ कार्यक्रममा संघीय संरचनापछि पनि शैक्षिक पहुँचमा उल्लेख्य सुधार हुन नसकेको सरोकारवालाले बताए ।

अनुसन्धानकर्ता डा. ढाकाराम भण्डारीले प्रस्तुत गरेको कार्यपत्र अनुसार मुलुकभरका विश्वविद्यालयको वितरण असन्तुलित छ । गण्डकी, राजर्षि जनक, मदन भण्डारी विज्ञान तथा प्रविधि, नेपाल विश्वविद्यालय, नेपाल खुला, मनमोहन प्राविधिक, मधेस कृषि, मधेस र लुम्बिनी प्राविधिक जस्ता संस्था स्थापना भए पनि तिनको पहुँच सबैतिर पुग्न सकेको छैन । विश्वविद्यालय अनुदान आयोगको इएमआईएस प्रतिवेदन अनुसार देशभर ५ लाख ७९ हजार ४ सय २८ विद्यार्थी अध्ययनरत छन् । गण्डकी प्रदेशमा रहेका ४७ हजार ८ सय ४७ विद्यार्थीमध्ये १० हजार ५ सय ७१ जना मात्रै विज्ञान संकायमा छन् ।

कार्यक्रममा सहप्राध्यापक डा. कपिल अधिकारीले विश्वविद्यालयमा कर्मचारीतन्त्र हाबी भएको र अनुसन्धान फितलो रहेको बताए । ‘प्राज्ञिक नेतृत्व राजनीतिक नेता जस्तो हुनु हुँदैन’, उनले भने । प्राडा भरतराज पहाडीले भुइँतहको यथार्थ (ग्राउन्ड रियालिटी) लाई अनुसन्धानको विषय बनाउन सुझाव दिए । पोखरा विश्वविद्यालयका उपप्राध्यापक सुवास मल्लले व्यवस्थापनमा आकर्षण धेरै भएको र ‘ड्रप आउट’ मुख्य समस्या रहेको सुनाए । गण्डकी विश्वविद्यालयका उपप्राध्यापक सुरेश ढकालले विद्यार्थी एआई र युट्युबको भरमा परेको र उनीहरुको ध्यान विदेशतिरै बढी रहेको बताए ।

स्कुल अफ बिजनेसकी निर्देशक डा. दीपमाला श्रेष्ठले विश्वविद्यालय शैक्षिक गुणस्तर भन्दा सम्बन्धन बाँड्नमा बढी केन्द्रित भएको टिप्पणी गरिन् । कार्यक्रममा भीम न्यौपाने, सफल सुवेदी र शिक्षक संगठनका दामोदर तिमिल्सिनाले पनि आफ्नो धारणा राखेका थिए । शिक्षा क्षेत्रमा दलीयकरण बढेकोमा डा. ढाकाराम भण्डारीले चिन्ता व्यक्त गरे । विद्यार्थी सन्देश शर्माले सञ्चालन गरेको कार्यक्रम अनुसन्धानकर्ता सन्तोष कोइरालाले समापन गरे ।

पोखरा २० चैत ।

लायन्स अन्तराष्ट्रिय डिस्ट्रिक्ट ३२५ जे नेपालको चौथो कन्भेन्सनको तयारी पुरा भएको छ । चैत्र २१ गते शनिबार पोखरामा सम्पन्न हुने चौथो डिस्ट्रिक्ट कन्भेन्सनको सम्पूर्ण तयारी पूरा भएको भएको कन्भेनर सूर्य बरालले जानकारी दिएका छन् । कन्भेन्सन पोखरा इभेन्ट सेन्टरमा आयोजना हुँदैछ।

कन्भेन्सनलाई सफल बनाउन आवश्यक सम्पूर्ण व्यवस्थापन, कार्यक्रम तालिका, अतिथि व्यवस्थापन तथा सहभागी समन्वयको काम सम्पन्न भइसकेको आयोजकले जनाएको छ। देशभरबाट लायन्स सदस्य, प्रतिनिधि तथा पदाधिकारीहरूको उल्लेखनीय सहभागिता रहने अपेक्षा गरिएको छ।

पूर्व उपगर्भनर ध्रुव श्रेष्ठले कन्भेन्सनलाई लायन्स अभियानको सुदृढीकरण गर्ने महत्वपूर्ण अवसरका रूपमा व्याख्या गर्छन्। उनी भन्छन्, “डिस्ट्रिक्ट कन्भेन्सनले लायन्स सदस्यहरूबीचमा अनुभव आदान–प्रदान, सहकार्यको विस्तार र भावी कार्यदिशा तय गर्न महत्वपूर्ण भूमिका खेल्छ। यसले सङ्गठनलाई अझ सशक्त र प्रभावकारी बनाउने विश्वास लिएका छौं।”

कन्भेन्सनका कन्भेनर सूर्य बराल ले कार्यक्रमलाई व्यवस्थित, प्रभावकारी र उपलब्धिमूलक बनाउन विभिन्न उपसमितिहरू सक्रिय रूपमा खटिएका जनाएका छन् । सहभागीहरूलाई सहज वातावरणमा कार्यक्रम सम्पन्न गराउने लक्ष्य रहेको उनको भनाइ छ ।

त्यसैगरी, गभर्नर मिलनबाबु मल्लले कन्भेन्सनले लायन्स अभियानलाई नयाँ उचाइमा पुर्‍याउने विश्वास व्यक्त गरे । उनले भने, “यो कन्भेन्सन केवल औपचारिक कार्यक्रम मात्र नभई सेवा, नेतृत्व र प्रतिबद्धताको साझा मञ्च हो। यहाँबाट लिइने निर्णयहरूले आगामी वर्षका लागि हाम्रो कार्यदिशा तय गर्नेछन्।”

कन्भेन्सनमा सामाजिक सेवा, नेतृत्व विकास, अनुभव आदान–प्रदान तथा सङ्गठनात्मक सुदृढीकरणसँग सम्बन्धित विविध कार्यक्रमहरू सञ्चालन हुने जनाइएको छ। साथै, विभिन्न सेवा परियोजनाहरूको प्रस्तुति, सम्मान कार्यक्रम तथा भावी योजना निर्माणसम्बन्धी छलफलसमेत हुनेछन्।

आयोजकका अनुसार कन्भेन्सनले लायन्स सदस्यहरूबीचमा एकता, सहकार्य र प्रतिबद्धतालाई थप मजबुत बनाउँदै समाजसेवाका गतिविधिलाई अझ प्रभावकारी बनाउने अपेक्षा गरिएको छ। औपचारिक कार्यक्रम अघि प्रभातफेरी आयोजना गरिने जनाइएको छ ।

पोखरा, २० चैत्त ।

नेपाल खेलकुद पत्रकार मञ्च गण्डकीको आयोजनामा हुने दशौं पोखरा स्पोर्टस अवार्डका लागि आईएमई खल्तीले सहकार्य गर्ने भएको छ। विशेषगरी अवार्डअन्तर्गत पर्ने ‘पिपुल्स च्वाइस अवार्ड’ का लागि आईएमई खल्तीले अनलाइन भोटिङ व्यवस्थापनमा सहकार्य गर्नेछ।

शुक्रबार आयोजित कार्यक्रममा मञ्चका कार्यवाहक अध्यक्ष राजाराम पौडेल र आईएमई खल्ती लिमिटेडका गण्डकी प्रदेश इन्चार्ज एण्डिज बस्नेतबीच सहकार्यसम्बन्धी सम्झौतापत्रमा हस्ताक्षर गरिएको हो।

सम्झौता कार्यक्रममा बोल्दै आईएमई खल्तीका गण्डकी प्रदेश इन्चार्ज बस्नेतले पोखरामा विगत पाँच वर्षदेखि सेवा विस्तार गर्दै आएको खल्तीले गण्डकीकै प्रतिष्ठित कार्यक्रम पोखरा स्पोर्टस अवार्डसँग सहकार्य गर्न पाउँदा खुशी लागेको बताए। उनले औपचारिक सम्झौताअघि नै अवार्डको प्रवद्र्धन सुरु गरिसकेको उल्लेख गर्दै पोखरा तथा आसपासका दुई दर्जनभन्दा बढी कार्यक्रमहरूमा सफलतापूर्वक सहकार्य गरिसकेको जानकारी दिए। साथै, पोखरा स्पोर्टस अवार्डको गरिमा अझ उचो बनाउने गरी काम गर्ने प्रतिबद्धता जनाए।

त्यस्तै, मञ्चका कार्यवाहक अध्यक्ष राजाराम पौडेलले आठ विधामा आयोजना हुने दशौं संस्करणमा पुनः समावेश गरिएको ‘पिपुल्स च्वाइस अवार्ड’ का लागि आईएमई खल्तीसँग सहकार्य गर्न पाउँदा खुशी लागेको बताए। विगतका केही संस्करणमा स्थगित रहेको उक्त विधा यसपटक पुनः सञ्चालनमा आउन लागेको उनले जानकारी दिए। पाँच उत्कृष्ट खेलाडीबीच हुने प्रतिस्पर्धामा अनलाइन भोटिङमार्फत विजेता छनोट गरिनेछ।

पोखरा स्पोर्टस अवार्ड २०७२ सालदेखि निरन्तर आयोजना हुँदै आएको छ। दशौं संस्करणअन्तर्गत ‘पिपुल्स च्वाइस अवार्ड’ विजेताले टीभीएस एनटर्क स्कुटर पुरस्कारस्वरूप प्राप्त गर्नेछन्। उक्त पुरस्कारको प्रायोजन पोखरास्थित गुरुङ गहना घर प्रालिले गरेको मञ्चका महासचिव परशुराम शर्माले जानकारी दिए।

दशौं पोखरा स्पोर्टस अवार्ड आगामी वैशाख १८ गते पोखरामा आयोजना हुने कार्यक्रम रहेको छ।

पोखरा, २० चैत ।

नेपाल खेलकुद पत्रकार मञ्च गण्डकीले आयोजना गर्ने १० औं संस्करणको पोखरा स्पोर्टस् अवार्डलाई गुरुङ गहना घर प्रालिले साथ दिएको छ ।

उक्त कम्पनीले पोखरा स्पोर्टस् अवार्डको महत्वपूर्ण विधा पिपल्स च्वाइस अवार्डमा प्रदान गरिने टिभिएस एनट्रक स्कुटर प्रायोजन गर्ने भएको हो । सो सम्बन्धमा बिहीबार पोखराको न्यूरोडस्थित कम्पनी परिसरमा आयोजित समारोहमा मञ्चका तर्फबाट अध्यक्ष एमबि आस्था र गुरुङ गहना घर प्रालिका तर्फबाट संचालक सीमा गुरुङबीच सहमतिपत्रमा हस्ताक्षर भयो ।

सो अवसरमा संचालक गुरुङले खेलाडी भनेका देशकै गहना भएकाले आफूले सहयोग गर्न चाहेको बताइन् । हालै मात्र नेपाली फुटबल साम्बाले उपचार सहयोगार्थ गरेको याचनाले आफू संवेदनशील बनेको उल्लेख गर्दै खेलाडीको सम्मानमा हुन लागेको पोखरा स्पोर्टस् अवार्डमा जोडिएको बताइन् । आफू विदेश नगई स्वदेशमै केही गर्न चाहेकाले व्यवसायमा हात हालेको जानकारी दिइन् । मानिसले चाहेमा स्वदेशमै पनि प्रगति गर्न सकिने उनको भनाइ थियो ।

सहयोगप्रति मञ्चका अध्यक्ष एमबि आस्थाले आभार व्यक्त गर्दै आगामी दिनमा पनि यस्तै सहयोगको अपेक्षा गरे । सो अवसरमा मञ्चका महासचिव परशुराम शर्माले संचालन र धन्यवाद ज्ञापन उपाध्यक्ष राजाराम पौडेलले गरे ।

आगामी वैशाख १८ गते हुने उक्त अवार्डमा विभिन्न आठ विधामा अवार्ड प्रदान गरिने मूल आयोजक समिति अध्यक्ष समेत रहेका मञ्च अध्यक्ष एमबि आस्थाले जानकारी दिए । गण्डकी प्रदेश सरकार, प्रदेश खेलकुद परिषद् गण्डकीसहित कास्कीका पोखरा महानगरसहित पाँचै वटा पालिकाको विशेष सहयोग रहनेछ । अवार्ड सफल पार्न विभिन्न संघसंस्थाले सहयोग गर्ने क्रम जारी छ ।