पोखरा, ०४ मंसिर ।

जीवन वीमा कम्पनी नेपाल लाइफ इन्स्योरेन्सले पोखराको विरौटामा उपशाखा संचालनमा ल्याएको छ । । कम्पनीका प्रमुख कार्यकारी अधिकृत प्रवीणरमण पराजुली र नेपाल वीमा प्राधिकरण गण्डकी प्रदेश प्रमुख शम्भुप्रसाद मिश्रले उशाखाको विहिवार एक कार्यक्रमबा विच उद्याटन गरे ।

यस्तै कम्पनीलेले विहिवार नै तनहुँको दुलेगौडामा पनि उपशाखा संचालनमा ल्याएको छ । उक्त उपशाखाको पनि कम्पनीका प्रमुख कार्यकारी अधिकृत पराजुलीले उद्याटन गरेका हुन् । कम्पनीको पोखराको न्युरोडमा सुविधा सम्पन्न प्रादेशिक भवन रहेको छ ।

कम्पनीको सेवा विस्तार गर्ने उदेश्यसहित उपशाखा विस्तार गरिएको कम्पनीका प्रमुख कार्यकारी अधिकृत प्रवीणरमण पराजुली बताए । ग्रासरुटमा कम्पनीलाई विस्तार गर्ने नीति अन्तरगत उपशाखा विस्तार गरिएको पराजुलीले स्पष्ट पारे । गण्डकी प्रदेशमा कम्पनीको उपस्थिति के छ, अहिले भइरहेको बजार भन्दा पनि नयाँ बजारको खोजी गर्न उनले मातहतका कर्मचारी, प्रतिनिधिलाई निर्देशन दिए ।
कार्यक्रममा बोल्दै नेपाल वीमा प्राधिकरणका गण्डकी प्रमुख शम्भुप्रसा मिश्रले वीमितलाई सेवा सुविधा दिन आग्रह गरे । प्राधिकरणमा अभिकर्ताको विषयमा प्रश्न उठेकाले मिश्रले विमा अभिकर्ता छनोट गर्दा ध्यादिन कम्पनीलाई सुझाव दिए ।

नेपाल इन्स्योरेन्स प्रोफेसनल्स सोसाईटी (निप्स) गण्डकी च्याप्टरका अध्यक्ष बद्री पौडेलले विक्री पछिको सेवालाई ध्यान दिन सक्नुपर्ने बताए । नेपाल लाईले नेपालमा वीमाको क्षेत्रमा पारेको छाप आगामी दिनमा अझ सफल हुनेमा पौडेलले विश्वास व्यक्त गरे ।

नेपाल लाइफ इन्स्योरेन्स प्रदेश कार्यालय गण्डकीका प्रमुख शहदेव अधिकारीले वीमा बजारको सम्भावनालाई अध्यन गरेर विरौटामा उपशाखा संचालनमा ल्याइएको बताए । उनले उपशाखा विस्तारसगै कम्पनीको बजार क्षेत्र पनि विस्तार हुने र अझ धेरै नागरिकलाई वीमामा जोड्न सकिने विश्वास व्यक्त गरे ।

कार्यक्रममा कम्पनीका आर्थिक विभाग प्रमुख प्रेमप्रसाद रेग्मीले सफलताको शुभकामना व्यक्त गरे । नेपाल लाइफ इन्स्योरेन्स अभिकर्तासंघका केन्द्रीय सदस्य दामोदर सापकोटाले कास्कीमा शाखा स्थापना हुनु सकारात्मक भएको बताए ।

गुणस्तरीय शिक्षामा अग्रणी प्रतिभा खेलकुद तथा रचनात्मक गतिविधिमा अग्रपंक्तिमा
पोखरा, ०३ मंसिर ।

पोखराको नदिपुरमा रहेको प्रतिभा माध्यमिक विद्यालयको वार्षिक कार्यक्रम अनुसार स्पोर्टस् फेस्ट २०८२ को औपचारिक शुभारम्भ बुधबार गरिएको छ । दुई साता चल्ने स्पोर्टस् फेस्टमा हरियो, रातो, पहेंलो र निलो गरी सदनात्मक रुपमा विद्यार्थीले प्रतिष्पर्धामा भाग लिनेछन् । विद्यालयका पूर्वप्राथमिकदेखि कक्षा १० सम्मका विद्यार्थीहरुले विभिन्न खेलहरुमा प्रतिष्पर्धा गर्नेछन् ।

स्पोर्टस् मीटको प्याब्सन कास्कीका अध्यक्ष षडानन्द गौतमले उद्घाटन गरे । उनले खेलकुदले विद्यार्थीलाई सामूहिक भावनाको विकास, प्रतिस्पर्धात्मक क्षमताको विकास, अनुशासन पालना गर्न सघाउने बताए । अध्यक्ष गौतमले प्रतिभा माविले शिक्षासँगै खेलकुद तथा अतिरिक्त क्रियाकलापमा गरेको प्रगतिको प्रशंसासमेत व्यक्त गरे ।

विद्यालय सञ्चालक समितिका अध्यक्ष नारायण पौडेलले गुणस्तरीय शिक्षामा मुलुककै अग्रणी विद्यालयमा स्थापित प्रतिभाले खेलकुद तथा रचनात्मक गतिविधिमा पनि आफूलाई अग्रपंक्तिमा उभ्याएको बताए । ‘खेलकुदले अनुशासन पक्षलाई बलियो बनाउँछ । खेलकुद स्वस्थ जीवन बनाउने आधार हो,’ पौडेलले भने, ‘खेलकुदबाटै जीवनलाई अघि बढाउने अवसर पनि छ । त्यसैले खेलकुदलाई विद्यालय तहमै प्राथमिकता दिने गरिएको छ ।’ विद्यार्थीभित्र लुकेको खुबी देखाउने एउटा अवसर यस्ता खेलकुद कार्यक्रम रहेको उनले बताए ।

विद्यालयका प्राचार्य किरण सापकोटाले गुणस्तरीय शिक्षामा प्रतिभा मुलुककै अग्रणी विद्यालयमा स्थापित भइसकेको बताउँदै यहाँको खेलकुदमा पनि विद्यालयको स्थान अगाडि रहेको बताए । ‘प्रतिभाले खेलकुद तथा रचनात्मक गतिविधिमा पनि अग्रपंक्तिमा उभ्याएको छ । मानव स्वास्थ्यका लागि महत्वपूर्ण खेलकुद क्षेत्रलाई पनि विद्यालयले उत्तिकै प्राथमिकता दिएको छ ।’ – सापकोटाले भने ।

विद्यालयका अतिरिक्त क्रियाकलाप प्रमुख प्रकाश अधिकारीले सञ्चालन गरेको कार्यक्रममा सहप्राचार्य प्रदीप खनालले हाउस क्याप्टेनहरूलाई सपथ खुवाएका थिए ।

स्पोर्टस् मिटमा व्यक्तिगत स्पर्धातर्फ कक्षागत रुपमा दौडलगायतका प्रतिष्पर्धा तथा सामूहिक स्पर्धातर्फ अन्तरसदनात्मक रुपमा बास्केटबल, भलिबल, फुटबल, रिले दौडलगायतका प्रतिस्ष्पर्धा हुने विद्यालयले जनाएको छ ।

विद्यार्थी तथा खेलाडीहरुको मनोबल उच्च बनाउनका साथै बालबालिकाका प्रतिभालाई प्रस्फुटन गर्न विद्यालयले आर्थिक सहयोग समेत गर्दै आएको छ । सन्दिप लामिछाने, अरुणा शाही, ज्ञानेन्द्र मल्ल जस्ता खेलप्रतिभालाई विद्यालयले ठूलो समारोहबीच जनही एक लाखले सम्मान गरिसकेको छ । मानवीय विपद, सामाजिक सेवामासमेत विद्यालय अग्रपंक्तिमा छ । प्रतिभा गुणस्तर मापन आइएसओ प्राप्त विद्यालय पनि हो ।

पोखरा, ०३ मंसिर ।

पछिल्लो समय एन्टिबायोटिक औषधीको दुरुपयोग बढ्दै गएको भन्दै बिभिन्न सरोकारवालाहरुले छलफल चलाएका छन । सर्वसाधारणदेखि स्वास्थ्यकर्मीसम्म एन्टिबायोटिकको सजिलै पहुँच, प्रेस्क्रिप्सनबिनै औषधी वितरण, पशुपालन र कृषिमा समेत यसको बढ्दो प्रयोगकका कारण समस्या उत्पन्न हुदै गएको छलफलमा सहभागीहरुले बताएका छन ।

पशु सेवा विभागको आयोजना, पशुपन्क्षी रोग अन्वेषण प्रयोगशाला पोखराको संयोजन र खाद्य तथा कृषि संगठन एफ ए नेपालको सहयोगमा आयोजित ‘मानवीय व्यवहारसँग जोडिएको जैविक प्रतिरोध’ विषयक संवादमा सहभागीहरुले एन्टिबायोटिकको अनियन्त्रित प्रयोगका कारण गम्भीर स्वास्थ्य संकटतर्फ धकेलिँदै गएको बताएका हुन ।

पशु क्वारेन्टाइन कार्यालय पोखराका प्रमुख डा किरण पाण्डेका अनुसार नेपालमा एन्टिबायोटिक दुरुपयोगको अवस्था भयावह बन्दै गएको बताए । पाण्डेका अनुसार डब्लुएचओले सार्वजनिक गरेको सूचीमा नेपाल जोखिममा परेका सय भन्दा धेरै मुलुकमध्ये ५२ औं स्थानमा रहेको छ । विश्व स्वास्थ्य संगठनले गरेको पछिल्लो अध्ययन अनुसार सन् २०५० सम्म एन्टिमाइक्रोबियल रेजिस्टन्स एमएमआर का कारण प्रत्येक दुई सेकण्डमा १ जनाको मृत्यु हुने देखाएको छ ।

सो अवसरमा वोल्दै गण्डकी प्रदेश सामाजिक विकास मन्त्रालयका डा. रमेश केसीले एन्टिबायोटिक दुरुपयोग नेपालका लागि गम्भीर संकट बन्दै गएको बताए । एन्टिबायोटिक दुरुपयोगका कारण १५ प्रतिशत बिरामीमा औषधीले काम नै नगरेको देखिएको र यसको नियन्त्रण नगरेको खण्डमा स्वास्थ्य खर्च बढ्ने र अकालमा मृत्यु हुनेको दर बढ्ने डा. केसीको भनाइ रहेको थियो ।

फर्मेसीबाट बिना नियन्त्रण बिक्री, स्थानीय सरकारले पाउने अधिकारमा औषधि व्यवस्था विभागको उदासीनता र जनचेतनाको कमी यस समस्याको मूल कारण बनेको बताउदै केसीले एन्टिबायोटिक नियमन स्थानीय तहमै सशक्त बनाउनुपर्ने बताए । पशु स्वास्थ्य विज्ञ डा. ग्रीष्म न्यौपानेले पशु उपचारमा गलत रूपमा एन्टिबायोटिक प्रयोग हुनुले मानव स्वास्थ्यसम्म असर परेको बताउदै आवश्यक नपर्ने अवस्थामा समेत पशुमा एन्टिबायोटिक प्रयोग भइरहेको बताइ । किसानमा पर्याप्त जानकारी नहुँदा पशुमा खोपको दुरुपयोग भइरहेकाले यसबारेमा सचेतना फैल्याउन आवश्इक रहेको उनको भनाइ रहेको थियो ।

मानवशास्त्री अर्जुन पोखरेलले नेपालको कृषि, स्वास्थ्य र जनजीवनमा एन्टिबायोटिकको दुष्प्रभाव गहिरिँदै गएको बताउदै माटो, मल, रासायनिक विषादी र मानवनिर्मित प्रवृत्तिले वातावरणमै एन्टिबायोटिक अवशेष फैलिने गरेको बताए । विद्यालय स्तरको पाठ्यक्रममा एन्टिबायोटिक शिक्षा अनिवार्य गर्नुपर्ने उनको भनाइ रहेको थियो ।

उपभोक्ता मन्च कास्कीको तर्फबाट अधिवक्ता मीना रानाभाटले एन्टिबायोटिक प्रतिरोधले उपभोक्ता अधिकारमै धक्का पु¥याइरहेको बताइन् । उपभोक्तालाई कृषि, पशुपालन र मानव स्वास्थ्यका जोखिमबारे सहज पहँचमै सूचना दिइनुपर्ने र स्थानिय तह सम्म सूचना प्रवाह नगरेसम्म समस्या बढ्ने उनको भनाइ थियो । प्रेस काउन्सिल नेपालका सदस्य पत्रकार केशव शरण लामिछानेले एन्टिबायोटिकबारे गलत धारणा, झुट्टा प्रचार र भ्रमपूर्ण सूचना चिर्न मिडियाको जिम्मेवारी बढेको बताए । संवादको सहजीकरण पत्रकार सञ्जयकुमार मल्लले गरेका थिए ।

पोखरा, ०३ मंसिर ।

पोखराका युवा पत्रकार धनबहादुर गुरुङ ‘सुमन’ मेजर लक्ष्मीप्रसाद÷हुमकुमारी गुरुङ एमबिओ बिइएम टुजिआर युवा पत्रकारिता पुरस्कारबाट सम्मानित भएका छन् ।

आदिवासी जनजाति पत्रकार महासंघ (फोनिज) कास्कीले बुधबार पोखरामा आयोजना गरेको कार्यक्रममा फोनिजका संघीय सचिव एमबी आस्थामगरले उनलाई नगद र समानपत्रसहित सम्मान अर्पण गरेका हुन् । पुरस्कार दाता मेजर लक्ष्मीप्रसाद र हुमकुमारी गुरुङको ५२ औँ वैवाहिक वार्षिकोत्सवको अवसरमा पुरस्कार प्रदान गरिएको हो ।

पुरस्कार अर्पणपछि गुरुङले पत्रकारिता क्षेत्रमा लाग्नका लागि प्रेरणा मिलेको बताए । आगामी दिनमा दृढताका साथ अघि बढ्न प्रेरित गर्ने उनको भनाइ थियो । ‘पत्रकारिता केवल पेशा होइन, यो समाजको धड्कन सुन्ने कला हो । कहिले कठोर, कहिले कोमल, कहिले विवादास्पद तर सधैं नै सत्यतर्फ उन्मुख यस बाटोमा थुप्रै अवरोध, थुप्रै चुनौती आउँछन्,’ उनले भने, ‘तर आज यो सम्मानले मलाई भन्छ अझ दृढताका साथ अघि बढ्न प्रेरित गरेको छ ।’

फोनिजका संघिय सचिव एमबी आस्थाले पुरस्कारले पत्रकारिता क्षेत्र धारासायी बन्दै गइरहेको अवस्थामा पुरस्कारले हौसला प्रदान गर्ने बताए । ‘पत्रकारिताको बाटो कता जाने हो भन्नेमा अन्योलता छाइरहेको पछिल्लो अवस्थामा समाजका केही प्रतिष्ठित व्याक्तिहरु पत्रकारको हौसलामा हातेमालो गर्न आइदिनुहुँदा खुसी लाग्छ,’ उनले भने, ‘आज मेयर लक्ष्मीप्रसाद गुरुङले आफ्नो वैवाहिक वर्षगाँठको अवसरमा स्थापना गरिदिनुभएको अक्षयकोषले थप बल दिएको छ ।’ जेनजी आन्दोलनपछि पत्रकारहरुको कमल र क्यामेरा अझ शसक्त रुपमा चलाउने पर्ने अवस्था आएका उनले सुनाए ।

पुरस्कारको अक्षयकोषदाता मेजर लक्ष्मीप्रसाद गुरुङले धेरै अक्षयकोष स्थापना गरिसकेको अवस्थामा पछिल्लो समय पत्रकारहरुसँग पनि जोडिन पाउँदा खुसी लागेको बताए । आगामी दिनमा अक्षयकोष वृद्धि गर्दै पुरस्कार राशी बढाउने उनको प्रतिवद्धता थियो ।

कार्यक्रममा प्रेस काउन्सिल नेपालका सदस्य केशवशरण लामिछाने, फोनिजका संघिय सल्लाहकार शान्ति गुरुङलगायतले पुरस्कारदाता मेजर गुरुङ र सम्मानित व्याक्ति पत्रकार गुरुङको सत्कर्मको प्रशंसा गर्दै शुभकामना दिएका थिए । फोनिज गण्डकी र कास्कीका सल्लाहकार हुमबहादुर गुरुङले सम्मानित व्याक्ति परिचय गराएका थिए ।

सम्मानित गुरुङले २०६८ सालमा रेडियो सराङकोटबाट कार्यक्रम प्रस्तोता र हिमचुली एफएमबाट प्राविधिकका रूपमा सञ्चार क्षेत्रमा प्रवेश गरेका थिए । त्यसपछि उनी एफएम रेडियो हुँदै अनलाइन तथा पत्रपत्रिकामा सक्रिय रहेर पत्रकारिता गर्दै आएका छन् । हाल उनी समाधान दैनिक, एबिसी टिभी र राष्ट्रिय समाचार समिति (रासस) सँग आबद्ध छन् ।

पत्रकारिताका विधागत संघसंस्थामा पनि गुरुङले नेतृत्वदायी भूमिका निर्वाह गरिरहेका छन् । उनी नेपाल पत्रकार महासंघ कास्कीमा सह–सचिव, नेपाल आदिवासी जनजाति पत्रकार महासंघ (फोनिज) गण्डकीमा उपाध्यक्ष, नेपाल प्रेस युनियन कास्कीमा सचिव र नेपाल फोटो पत्रकार संघ कास्कीमा सचिव पदमा कार्यरत छन् । यसअघि उनी युवा तथा खेलकुद मन्त्रालयबाट खेलकुद पत्रकारिता प्रोत्साहन पुरस्कार २०७९ बाट पनि सम्मानित भइसकेका छन् ।

पोखरा, ३ मंसिर ।

नेपाल खानेपानी संस्थान प्रधान कार्यालयले संस्थानका विभिन्न शाखाका कर्मचारीलाई २ दिने पानी मापन मिटर व्यवस्थापन तथा परीक्षण तालिम प्रदान गरेको छ ।

तालिम शाखा प्रमुख ई.बुद्धरत्न महर्जनको अध्यक्षतामा भएको कार्यक्रममा २२ प्रशिक्षार्थीलाई जलेश्वर शाखाका निमित्त प्रमुख सुरेन्द्रकुमार साह, नेपाल खानेपानी संस्थान विन्ध्यवासिनी इकाई कार्यालयका प्रमुख लक्ष्मण पाण्डे र पोखरा शाखाका सिमिरि विमल तिल्सिनाले प्रशिक्षण दिएका थिए । जाईकाका प्रतिनिधि मियो सानले समेत प्रशिक्षण दिँदै प्राविधिकरुमा कर्मचारीलाई दक्ष बनाउन सकेमात्र उपलब्धी हुनेमा जोड दिएका थिए ।

तालिम समापन समारोहमा प्रशिक्षक सुरेन्द्रकुमार साहले तालिममा सिकेको सीपलाई सदुपयोग गर्न आग्रह गरेका थिए । सहभागिको तर्फबाट हेम्जा शाखाका कर्मचारी प्रधुम्न बस्नेतले तालिम फलदायि भएको बताएका थिए ।

पोखरा शाखाका प्रशासन प्रमुख विष्णुप्रसाद रेग्मीले सञ्चालन गरेको सभामा सहभागिलाई प्रमाणपत्र प्रदान गर्दै तालिम शाखा प्रमुख बुद्धरत्न महर्जनले खानेपानी संस्थानले क्रमैसँग विभिन्न तहमा कार्यरत कर्मचारीलाई तालिम प्रदान गरिरहेको बताए । महर्जनले उपभोक्तालाई बुझाउन सहज र सरल जनशक्ति निर्माणको लागि तालिम प्रभावकारी हुने उल्लेख गरे ।

पोखरा शाखा कार्यालयको सभाहलमा सम्पन्न तालिमले कर्मचारीलाई टेक्निकल र सुपरीवेक्षणमा सहज पुग्ने बताएका महर्जनले आगामी दिनमा सिकेको सीपलाई व्यवहारमा उतार्न आग्रह गरेका थिए । तालिममा नेपाल खानेपानी संस्थान पोखरा शाखाका लेखा प्रमुख पुष्पराज जोशी, बजेट शाखाका प्रमुख दिपेश्वर मण्डल र प्रधान कार्यालयका कर्मचारी निशा प्रधानाङ्ग लगायतले तालिममा सहजीकरण गरेको पोखरा शाखाका कर्मचारी वसन्तराज भण्डारीले जानकारी दिए । 

पोखरा, ०१ मंसिर ।

पोखरा जेसीजको ४६ औं शाखा अधिवेशन तथा ५१ औं वार्षिक साधारणसभा शनिबार सम्पन्न भएको छ। उक्त अधिवेशनले वर्ष २०२६ का लागी नयाँ नेतृत्व चयन गरेको छ । जसअन्तर्गत अध्यक्षमा जेसी सुमन पहारी ५० मतका साथ निर्वाचित भएका छन्।

उनले अध्यक्ष पदका अर्का उम्मेदवार अन्नत प्रधानाङ्गलाई २६ मतान्तरले पराजित गर्न सफल भएका हुन् । ७८ मतदातासूची रहेको उक्त निर्वाचनमा जम्मा ७४ मत मात्र खसेको थियो । मतपेटिकामा खसेको कुल मतमध्ये प्रधानाङ्गलाई जम्मा २४ मत मात्र प्राप्त भएको थियो। त्यस्तै अध्यक्ष पदका अर्का प्रत्यासी श्रीकृष्ण सुनार मतदानमा सहभागी नहुँदै बाहिरिएपछि मुख्य प्रतिस्पर्धा पहारी र प्रधानाङ्गबीचमै सीमित भएको थियो।

यस्तै नयाँ कार्यकारिणी उपाध्यक्षमा जेसी रबिन्द्र गोदार र उपाध्यक्षहरुमा जेसी सरोज पौडेल, सुजल गोदार, सन्दीप श्रीस तथा मुकेश अर्याल चयन भएका छन् । महासचिवमा जेसिज सन्जय पौडेल, कोषाध्यक्ष जेसिज राजकुमार बोहोरा, सचिव जेसिज मिना कुमारी थापा र कानुनी सल्लाहकार जेसिज श्रीकृष्ण सुनार निर्वाचित भएका छन्।

त्यस्तै निर्देशक पदमा जेसि बिनय सुवेदी, डम्बर खडायत, सन्तोष सुनार, बिबेक सापकोटा लगायत विजयी भएका छन्। अधिवेशन सफलतापूर्वक सम्पन्न भएको पोखरा जेसीजका पूर्व अध्यक्ष निर्वाचन आयुक्त गणेश गिरीले जानकारी गराए ।

नयाँ नेतृत्वले २०२६ का लागी संस्थालाई थप सक्रिय, प्रभावकारी र समुदायमुखी बनाउने पहारीले प्रतिबद्धता व्यक्त समेत गरेका छन् ।

पोखरा, ०१ मंसिर ।

मुल्डे भ्यू–पार्क पछिल्लोसमयमा हिमाल हेर्ने सबैभन्दा ‘उत्कृष्ट दृश्य बिन्दु’ भएको छ । कास्की जिल्लाको अन्नपूर्ण गाउँपालिका वडा नम्बर ११ मा पर्ने मूल्डे भ्यू–पार्क पर्यटकका लागि हिमाल हेर्ने उत्कृष्ट गन्तब्य बन्दै आइरहेको छ । मूल्डे भ्यू–पार्क तथा पर्यटन व्यवस्थापन समितिले यो स्थानका लागि आवश्यक पर्यटकीय संरचना निर्माण गरेपछि यो स्थान आकर्षक गन्तब्यस्थल बनिरहेको छ । स्थानीय राजमान गुरूङको नेतृत्वमा ९ सदस्यीय समिति गठन भएपछि अहिले समितिमार्फत दोवाटोदेखि करिब आधा घण्टाको पैदल दूरीमा रहेको मूल्डे भ्यू–पार्कलाइ पर्यटनमैत्री बनाइएको हो ।

घान्द्रुकदेखि अलिकति पारीतिरको चुइले गाउँमा जन्मिएका राजमान गुरूङ सानो छँदा बुबाहरूसँग दोबाटोहुँदै मुल्डे पुगेका थिए । मुल्डेबाट देखिने दृश्यले उनलाइ लोभ्याएको थियो । ‘दोबाटो–मुल्डेतिर गोठ ल्याउँदै गर्दा मुल्डेबाट देखिने दृश्यबाट रोमाञ्चित मैले मुल्डे भ्यु पदमार्ग सञ्चालन गर्ने मनस्थिति बनाउँदै २०५८ सालमा दोबाटोमा होटल खोल्न अन्नपूर्ण संरक्षण क्षेत्र (एक्याप)सँग अनुमति मागेको थिए,’ उनले भने ।

मुल्डे पदमार्ग निर्माण एवं प्रवद्र्धन गर्न उनले दोबाटोमा २०५८ सालमै छाप्रो बनाएर व्यवसाय सुरू गरे । तर विभिन्न कारण सोचेजस्तो नभएपछि रोजगारीका लागि विदेश गएर ५ वर्षपछि फर्केका उनी फेरि मुल्डे आएर आफ्नो पुरानो छाप्रो मर्मत गर्दै मुल्डेमा पर्यटक भित्र्याउने अभियानमा कस्सिए । अहिले दोबाटोमा उनले माउन्ट लक्की होटल सञ्चालन गर्दै आएका छन् । राजमानकै पहलमा पदमार्गका अन्य ठाउँमा पनि होटल खुलेका छन् ।

‘विभिन्न ठाउँको अध्ययनपछि मूल्डेलाई भ्यूपार्ककारूपमा विकास गर्न सकिन्छ भनेर मेरै नेतृत्वमा अहिले समिति गठन भइ पार्कलाइ व्यवस्थित बनाउने कामले सफलता पाइरहेको छ,’ उनले भने, ‘यहाँ भ्यू–टावर, पिङ, ढुङ्गाको सिढी, शौचालय र टावर वरपर रेलिङ अनि ढुङ्गा विछ्याएर चिटिक्क पारिएको छ ।’

यस क्षेत्रकै ३ हजार ६३७ मीटरको उचाइमा रहेको मुल्डे भ्यू–पार्कबाट गुर्जा, धौलागिरी, जिर्वाङ, टुकुचेपिक, धम्पुसपिक, निलगिरीसाउथ र नर्थ, अन्नपूर्ण– १, अन्नपूर्ण साउथ, हिउँचुली, अन्नपूर्ण– ३, गन्धर्वचुली, माछापुच्छ्रे, अन्नपूर्ण दोस्रो, मार्दी, लमजुङ, मिालचुली, बौद्ध, गणेश, मनास्लुलगायतका हिमालहरू आँखै अगाडि देख्न सकिन्छ ।

पहाडी यात्राका कारण थाकेको ज्यानलाइ चिसो मौसम तथा छिन–छिनमा लुकामारी खेल्ने मौसमसँगै यहाँबाट देखिने मनोरम दृष्यले सम्पूर्ण थकाइ मेटाइदिन्छ । जो कोहीले हिमाल नजिकैबाट नियाल्ने सपना देखेका छन् भने उनीहरूका लागि मूल्डे भ्यू–पार्कको यात्रा जीवनकै अविस्मरणीय अनुभव बन्न सक्छ ।

मूल्डे भ्यू–पार्क तथा पर्यटन व्यवस्थापन समितिका निमित्त कोषाध्यक्ष मीना गुरूङले एकैपटक दर्जनौ हिमालहरू हेर्ने सबैभन्दा उपयुक्त स्थानकारूपमा यतिबेला मूल्डे भ्यू–पार्क भएको जानकारी दिइन् । ‘यसले जति चर्चा पाउनुपर्ने हो त्यो भने पाइरहेको छैन्,’ उनले भनिन्, ‘अन्तर्राष्ट्रिय बजारमा मूल्डे भ्यू–पार्कलाई ब्रान्डिङ गर्दै डिजिटल प्लेटफर्म, वृत्तचित्र, मिडिया टुर, ट्राभल ब्लगर र प्रदर्शनीमार्फत प्रचार–प्रसार गर्न सके यो धेरै पर्यटकका लागि आकर्षित गन्तव्य बन्ने निश्चित छ ।’

अन्नपूर्ण साउथको काखमै रहेको हिडन भ्याली

मूल्डे भ्यू–पार्कबाट देखिएका हिमश्रृङ्खला र मनोरम दृष्यले पर्यटकको धित मार्न नसकेको अवस्थामा नजिकैको हिडन भ्याली प्ग्न सकिन्छ । समुन्द्री सतहबाट करिब ४ हजार २ सयको उचाइमा रहेको यो सुन्दर फाँट मनमोहक अनि रमणीय छ । दोबाटोबाट करिब ८ मिलोमिटरको दूरीमा रहेको यो स्थानमा पर्ने पदमार्गमा देखिने अनुपम दृश्यहरूले हिँड्दै गर्दा लाग्ने थकानलाइ बिर्साइदिन्छ । समितिका सहसचिव रामकाजी गुरूङले भिरालो पदमार्गको साँघुरो स्थानमा रेलिङको व्यवस्था गरिएको जानकारी दिए ।

‘करिब ४ घण्टाको यात्रापछि पुगिने हिडनभ्यालीको फराकिलो फाँटमा चरिरहेका चौरीको वथान, भेडाको बथान र घोडाको चरणले फरक अनुभूति दिलाउँछ,’ उनले भने ‘यहाँ रहेको हिडनलेक अर्थात त्रिवेणी तालमा अवस्थित गुरूङ समुदायको आस्थाको धरोहर मानिने त्रिवेणीदेवी मन्दिरमा हरेक जनैपूर्णिमाका दिन मेला लाग्ने गर्दछ ।’ यो स्थानमा पुग्दा प्रकृतिसँग रमाउनेहरूको खुसीको सीमानै नाघ्छ । अनि उनीहरूको मानसपटलमा के धर्तीमा यस्तो ठाउँ साँच्चै छ भन्ने पर्नसक्छ । हिडनभ्यालीको यात्रा केवल हिमाल हेर्ने माध्यम मात्र होइन यो प्रकृति र आत्मशान्तिको अनौठो संगम पनि बन्नसक्छ । यहाँबाट छोमरोङ पुग्न सकिन्छ ।

यसरी पुग्न सकिन्छ मूल्डे भ्यू–पार्क
तपाइ यो भिडियो हेरेपछि मनोरम पर्यटकीय स्थल मूल्डे भ्यू–पार्क पुग्ने योजना बनाइसक्नुभएको छ भने सर्वप्रथम काठमाडौँबाट मुग्लीनहुँदै पोखरासम्मको करिब २०० किलोमिटर दूरीको यात्रा आरम्भ गर्नुपर्ने हुन्छ । पोखराको बागलुङ बसपार्कबाट घान्द्रुकका लागि जीपहरू पाउन सकिन्छ । यहाँबाट करिब ५८ किलोमीटरको जीप यात्रा पार गरेपछि पुग्न सकिन्छ– सुन्दर पर्यटकीय गाउँ घान्द्रुक । घान्द्रुकमा बास बस्नका लागि करिब एक सयको हाराहारीमा स्तरीय होटल तथा लजहरू रहेका छन् । यसैगरी घान्द्रुकबाट मूल्डे भ्यू–पार्कका लागि यात्रा गर्दा पदमार्गमा पर्ने कोर्मोडाँडामा ५ वटा होटल छन् भने मेलाँचेमा १, चुइलेमा ६, सिप्रुङमा १ अनि टाडापानीमा १० वटा होटल तथा लजहरू छन् ।

तपाइ घान्द्रुकबाट सिधै टाडापानीको पैदलमार्ग पनि जान सक्नुहुन्छ । यो बाटो हिँड्दै गर्दा भैँसेखर्कमा २ वटा लजहरू छन् । टाडापानीबाट अघि बढ्दै गर्दा मेसारमा पुगेपछि ३ वटा होटल छन् भने इसारूमा पनि ३ वटा नै होटल रहेका छन् । त्यसपछि पुग्ने गन्तब्य दोबाटोमा ३ वटा होटल छन् । दोबाटोमा आराम गरेपछि करिब आधा घण्टाको यात्रापछि तपाइ मूल्डे भ्यू–पार्क पुग्न सक्नुहुन्छ । अनि यहीँबाट तपाइ खोप्रो, त्रिवेणी ताल (हिडन लेक), घोरेपानी–पुनहिल, अन्नपूर्ण आधार शिविर, उत्तर र दक्षिणलगायत पदयात्रा गर्न पनि सक्नुहुन्छ । मुल्डेबाट मनोरम दृष्यावलोकन गरेर धीत मरेको छैन भने अनि तपाइ पुग्ने गन्तब्य पौडे अर्थात हिडन भ्याली हुनेछ । जहाँ बास बस्नका लागि ३ वटा होटल रहेका छन् । यहाँको बसाइले तपाइलाइ स्वर्गीय आनन्द दिलाउनेमा कुनै द्विविधा छैन् । रमणीय र स्वर्गीय आनन्दले भरिपूर्ण यो ठाउँको यात्रा तपाइका लागि पक्कैपनि अविस्मरणीय रहने छ ।

पोखरा, ०१ मंसिर ।

राष्ट्रिय संगीतकमहाइकर्स क्लब नेपालले आयोजनामा कार्तिक २८ गते संगीत र पर्यटन सम्बन्धी गोष्ठी तथा २९ गते हाइकिङ कार्यक्रम–६४ सफलतापूर्वक सम्पन्न भएको छ ।

कार्यक्रमका प्रमुख अतिथि, राष्ट्रिय संगीतकर्मी संघ नेपालका केन्द्रिय सदस्य प्रमिस सिवाकोटीले कार्यक्रमको उद्घाटन गर्दै संगीत, संस्कृति र पर्यटन एक–अर्काका पूरक छन् भन्दै यस्तै कार्यक्रमहरूले स्थानीय कला, संस्कृति र गन्तव्यको प्रचार–प्रसारमा टेवा पुग्ने विश्वास व्यक्त गरेका थिए । उनले ताङतिङ जस्तो पर्यटन क्षेत्रले संगीतको माध्यमबाट अझै धेरै सम्भावना बोकेको बताउँदै संघीय संरचनामा स्थानीय तहले पनि सांस्कृतिक पर्यटनमा विशेष ध्यान दिनुपर्ने सुझाव दिएका थिए ।

कार्यक्रमको मुख्य आकर्षण संगीत–पर्यटन गोष्ठी रहेको थियो, जसमा प्रा. डा. कुसुमाकर न्यौपानेले “सांस्कृतिक पर्यटनको विकासमा संगीतको भूमिका” विषयक गोष्ठी पत्र प्रस्तुति गरेका थिए । उनले संगीत परम्परा, लोक संस्कृतिको संरक्षण र पर्यटन प्रवद्र्धनबीचको सम्बन्ध विस्तृत विश्लेषण गर्दै, यस्ता कार्यक्रमहरूले युवा पुस्तामा मौलिकता र पहिचानप्रतिको चासो बढाउने उल्लेख गरे ।

सो अवसरमा मादी गाउँपालिका वडा नं. २ की कार्यबहाक अध्यक्ष तथा ताङतिङ सामुदायिक होमस्टेकी संयोजक पुर्णशोभा गुरुङ (पुनम), हिमालय माविका प्रधानाध्यापक ओम प्रकाश गुरुङले वोलेका थिए ।

मादीगाउँपालिका २ स्थित वडा कार्यालय भवनको सभाहलमा सम्पन्न कार्यक्रममा राष्ट्रिय संगीतकर्मी संघ गण्डकी प्रदेश समितिका पदाधिकारी तथा सदस्यहरु, हाइकर्स क्लब नेपालका पदाधिकारी तथा सदस्यहरु लगायत होमस्टे सञ्चालकहरुको सहभागिता रहेको थियो । मिडिया पार्टनरका रूपमा आदर्श समाज दैनिक, दरबार न्यूज डटकम, नौलो खबर डटकम र कास्की खबर डटकम रहेका थिए ।

संघका गण्डकी प्रदेश अध्यक्ष रामचन्द्र ढकाल र क्लबका अध्यक्ष कृष्ण रानाभाटको संयुक्त अध्यक्षतामा भएको कार्यक्रमको संचालन संघका द्वितिय उपाध्यक्ष सागर कार्कीले गरेका थिए ।

दोस्रो दिन आयोजित हाइकिङ कार्यक्रम अन्तर्गत सहभागीहरूले ताङतिङ गाउँमा रहेको सेल्फी डाँडा, झरना, गुम्बाहरु लगाएत नजिकका रमणीय पदमार्ग हुँदै प्राकृतिक सौन्दर्यको अवलोकनमा केन्द्रित रहेको हाइकर्स क्लब नेपालका अध्यक्ष कृष्ण रानाभाटले वताए ।

हरेक महिनाको अन्तिम शनिबार विगत ७ वर्ष देखि निरन्तर आयोजना हुदै आएको हाइकिङ कार्यक्रममा पर्यटकीय गाउँहरुको प्रबद्र्धन गर्न सहभागी स्वयम्ले आफ्नो खर्च व्यहोर्दै आएका छन् । यस अगाडि मादी गाउँपालिको याङ्जाकोट, सिक्लेस, थाक लगाएतका गाउँहरुमा हाइकर्स क्लब पुगिसकेको छ ।

पोखरा, ०१ मंसिर ।

पोखरा महानगरपालिका वडा नं. ९ को सहयोगमा वडास्तरिय दलित संजाल पोखरा ९ को आयोजनामा आइतबार ४० जनालाई कुखुराको चल्ला, दाना र औंषधि वितरण गरिएको छ ।

कार्यक्रममा वडा अध्यक्ष दिपेन्द्र मर्सानीले काम गर्दा रिजल्ट देखिने गरी गर्नु पर्ने भन्दै अनावश्यक तालिमहरुमा खर्च गर्न भन्दा कुखुराका चल्ला वितरण कार्यक्रमले न्युन आय भएका दलित तथा विपन्न वर्गलाई राहत पुगेको वताए ।

सो अवसरमा वडा सदस्यहरु गीता चर्माकार, नन्दराम गिरी र लक्ष्मी पहारी, वडा सचिव कुलराज पौड्याल, टोलविकास संस्था समन्वय समिति पोखरा ९ का अध्यक्ष उत्तम जोशी, वडा कृषि संजालकी अध्यक्ष विमला रानाभाट, सेतीगंगा टोलविकास संस्थाका अध्यक्ष रोशन मानन्धर, कृष्ण टोलविकास संस्थाकी अध्यक्ष रुपा केसी, लगाएतले पोखरा ९ वडाले स्थानियलाई स्वरोजगार बन्न प्रेरित गरेको वताए ।

गत वर्ष पनि संजालले कुखुराको चल्ला वितरण गरेकोमा उक्त कुखुरा पालेर बिक्री गरी चौथो पटकका चल्ला पाल्न सफल बुद्धिमाया परियारलाई वडा अध्यक्षले नगद पुरस्कार सहित प्रदान गरेका थिए ।

गतवर्ष ५० घर परिवारलाई १० वडा चल्लाको दरले वितरण गरिएकोमा यस वर्ष ४० जनालाई १२ वटाका दरले वितरण गरिएको दलित संजालकी अध्यक्ष सपना विकले वताए ।

दलित संजालकी अध्यक्ष सपना विकको अध्यक्षतामा भएको कार्यक्रममा स्वागत उपाध्यक्ष रोकवीर सुनारले र संचालन विमला परियारले गरेकी थिईन ।