पोखरा, २३ कात्तिक ।

गुन्जन नेपालको अध्यक्षमा सवनम शर्मा  निर्विरोध निर्वाचित भएकी छन । सस्थाको ९औ साधारण सभा एवं  चौथो अधिवेशनले शर्माको अध्यक्षतामा नयाँ  कार्यसमिति सर्वसम्मत चयन गरेको हो ।

सस्थाको उपाध्यक्षमा प्रमिला तझ्या, सचिबमा लक्ष्मीराज सिलवाल र कोषाध्यक्षमा नाजवुन निशा खान निर्वाचित भएका छन ।

यसैगरी सदस्यहरुमा माया गुरुङ मनाङी, स्वेच्छा हमाल र सुमित्रा गायक चयन भए भने सल्लाहकारमा  निवर्तमान अध्यक्ष अधिवक्ता जुना कुमारी गुरुङ छन ।

यसअघि साधारण सभा तथा अधिवेशनको उद्घघाटन गर्दै मानव अधिकार आयोग नेपाल क्षेत्रीय कार्यालय पोखराका प्रमुख नितु गर्तौलाले नाम जस्तै मानव अधिकारका सवालमा गुन्जिरहन सकोस भन्दै शुभकामना दिइन । उनले महिलाका अधिकारका सवालमा पुरुष सरह समानता हुनु पर्नेमा जोड दिइन ।

सस्थाका अध्यक्ष अधिवक्ता गुरुङले समाज परिवर्तन गर्न आफैबाट केही गर्नु पर्छ भन्ने धेयकासाथ विभिन्न  संघसस्थामा आवद्द ब्यक्तिहरु मिलेर स्थापना गरिएको सस्थाले मानव अधिकार र महिला अधिकारका लागि काम गर्दै आएको बताइन ।

कार्यक्रममा तमु धि नेपालका प्रथम महिला उपाध्यक्ष गिमाया गुरुङ , शान्तिका लागि नागरिक सन्जाल  अध्यक्ष विना सिलवाल , नेपाल रेडक्रस कास्की कार्यालय प्रमुख बबिता सुवेदी काफ्ले,  गैसस महासङ गण्डकी अध्यक्ष इन्दिरा पौडेल,  अपाङ्ग महासङ गण्डकी अध्यक्ष हेम बहादुर गुरुङ, फेडो गण्डकी अध्यक्ष  सुमित्रा गायक , साथी नेपालका अध्यक्ष दिलिप ध्वज , मुस्लिम समुदायको तर्फबाट नाजवुन निशा खान, उच्च वार एसोसिएसन महिला समितिको  अध्यक्ष अधिवक्ता इश्वरी पौडेललगायतले बोलेका थिए ।

२०६३ सालमा स्थापना भएको सस्थाले  महिला अधिकार , दलित, अपाङ्गता, आदिवासी, जनजाति , मुस्लिम , सिमान्तकृत समुदायलगायतको आवाज  उठाउने र मानव अधिकारका सवालमा काम गर्दै आएको छ ।

पोखरा, कार्तिक-२३

पोखरा महानगरपालिका वडा नं -१५ ले ५० प्रतिशत अनुदानमा किसानलाई कृषि सामग्री वितरण गरेको छ। वडाको नीति तथा कार्यक्रम अन्तर्गत वडामा स्थायी रूपमा बसोबास गर्ने कृषकहरूलाई लक्षित गर्दै बिउ बिजन तथा प्राङ्गारिक मल वितरण गरेको हो। 

वडाध्यक्ष तोरण बानियाँले स्थानीय किसानको हितलाई ध्यानमा राख्दै सहुलियतमा बिउ बिजन तथा मल वितरण गरिएको बताए। उनले आफू निर्वाचित भएर आए देखिनै सहुलियत रूपमा बिउ बिजन वितरण कार्यलाई निरन्तरता दिइएको भन्दै यस वर्ष पनि चार हजार किलो आलुको बिउ, विभिन्न प्रजातिका तरकारीका बेर्ना र प्राङ्गारिक मल वितरण गरिने बताए। 

यस्तै, कार्यपालिका सदस्य मन्दिरा परियारले वडाले सहुलियतमा दिएको बिउ बिजन लिन वडावासी किसानको उत्साहपूर्ण सहभागिता रहेको बताइन्। उनले विशेष गरी आलुको बिउ लिन आउने कृषकको सङ्ख्या उल्लेख्य रहेको जानकारी दिँदै यस्ता कार्यक्रमले वडा र किसानलाई जोड्ने बताइन्।

उनका अनुसार सहुलियतको बिउ बिजन वितरण कार्यक्रम आइतबार र सोमबार कार्यालय समयमा वडा कार्यालय परिसरबाट सञ्चालन हुनेछ। 

सहुलियतको बिउ बिजन तथा मल लिन आउने किसानले वडा नं १५ मा भएको जग्गाको लालपुर्जा र नागरिकताको सक्कल वा फोटोकपी पेस गर्नुपर्ने छ। यस्तै, कृषि व्यवसायको हकमा व्यवसाय दर्ताको प्रमाणपत्र तथा अव्यवस्थित बसोबासीको हकमा निस्सा र नागरिकताको सक्कल वा फोटोकपी पेस गर्नुपर्नेछ। 

पोखरा, २१ कात्तिक ।

पोखराको भैरबटोलमा नव निर्मित भैरव मन्दिरमा यही कार्तिक २६ गते (भैरवाष्टमीको दिन) दिउँसो २ बजेबाट दर्शन/पूजन शुभारम्भ हुने भएको छ ।

मन्दिरमा श्री कालभैरवको प्रस्तर प्रतिमा स्थापना गरी तान्त्रिक विधिबाट प्राण प्रतिष्ठा सम्पन्न गरिनेछ । सोही अवसरमा भैरवाष्टमीको दिन भक्तजन, दाता तथा समुदायका सबैलाई दर्शन सहितको पूजनमा सहभागी हुन श्री भैरब साँस्कृतिक संरक्षण समितिले आह्वान गरेको छ ।दर्शनार्थीहरूका लागि मन्दिर कार्तिक २७ गतेदेखि प्रत्येक दिन विहान ६ बजेदेखि मध्यान्ह १२ बजेसम्म खुला रहनेछ । 

भैरव साँस्कृतिक संरक्षण समितिले काठमाण्डौ उपत्यकाको प्राचीन नेवारी सभ्यता र संस्कृतिको पोखरामा संरक्षणका क्रममा मन्दिर निर्माणको पहल गरेको अध्यक्ष तीर्थमान प्रधानाङ्गले जानकारी दिनु भयो । समितिका अनुसार पोखरामा नेवार समुदायको आगमनसँगै उपत्यकाको सांस्कृतिक परम्परा जस्तै गण नृत्य (बाह्र भैरव नृत्य), भजन तथा नेवारी अनुष्ठान—लाई निरन्तरता दिँदै आएको छ ।समितिको २०७३ फागुन ७ गते सम्पन्न ४० औं साधारण सभाले भैरव नृत्यका प्रमुख पात्र कालभैरवको पूजा–आराधना गर्नका लागि मन्दिर निर्माणको निर्णय गरेको सचिब तीर्थ श्रेष्ठले बताउनु भयो।

 सोही निर्णयअनुसार २०७६ जेठ ३ गते पोखरा महानगरपालिकाका तत्कालीन प्रमुख मानबहादुर जिसीले मन्दिरको शिलान्यास गर्नु भएको थियो ।कुल अनुमानित लागत रु. २ करोड ६ लाख ९१ हजार ८९५ रहेको मन्दिर निर्माणमा अहिलेसम्म रु. १ करोड ७० लाख ८८ हजार ६१५ खर्च भइसकेको समितिले जनाएको छ ।

मन्दिर निर्माणका लागि विभिन्न दाताहरूबाट नगद तथा जिन्सी सहयोग प्राप्त भएको समितिले जनाएको छ।

पोखरा, २१ कात्तिक ।

पर्यटकीय स्थलको लामो भ्रमण गर्दै आएको ‘डुलुवा’ टोली शुक्रबार कास्कीबाट हुम्ला प्रस्थान गरेको छ । टोली पर्वत, बाग्लुङ, रुकुमकोट, लिमी, लाप्चा ला पास पुगेर फर्किने छ ।

२१ सदस्यीय टोली मंसिर १ गते पोखरा आइपुग्ने योजना छ । उनीहरुलाई पोखरा भ्रमण वर्ष २०२५ का संयोजक गोपी बहादुर भट्टराइले टोलीलाई पोखरामा आयोजित समारोहमा सुखद् यात्राको कामनासहित बिदाइ गरे । उनीहरुले डुलुवाका संयोजक योगेश भट्टराईलाई पोखरा भ्रमण वर्षका व्यान हस्तान्तरण गरे । उनीहरुलाई रेवान पोखराका पुर्व अध्यक्ष नरेश भट्टराई, खेलकुद पत्रकार मञ्च गण्डकीका अध्यक्ष एमवी आस्था मगर लगाएतले विदाई गरे ।

पोखरा भ्रमण वर्ष २०२५ को व्यानर हस्तान्तरण गर्दै पोखरा भ्रमण वर्षका संयोजक भट्टराईले नेपालमा प्राकृतिक रुपले नै साहासिक यात्राको थलो भएको बताउदै यो यात्राले पोखरा र गण्डकी प्रदेशको पर्यटन प्रर्वद्धनमा सहयोग पुग्ने बताए । उनले पोखराले भ्रमण वर्ष मनाई रहदाँ विभिन्न कार्यक्रमको आयोजना गरेको बताउदै पोखरामा पर्यटक भित्राउन नेपाल र नेपाल बाहिर समेत प्रर्वद्धनका कार्यक्रमहरु गर्नु पर्ने बताए ।

अभियानले नेपालको प्राकृतिक र सांस्कृतिक सुन्दरता रहेका रमणीय ठाउँको उजागर गर्ने उद्देश्य रहेको डुलुवाका संयोजक योगेश भट्टराईले बताए । हुम्ला नेपालका अन्तिम उपत्यका रहेको यसको यात्रा निकै रोमान्चकारी हुने उनले बताए । जसमा कैलाश पर्वत र लिमी उपत्यका सम्म पुग्ने प’रातन बाटोलाई पुर्नजीवित गर्ने उनको भनाई छ ।

‘डुलुवा’ पोखराका पर्यटनकर्मी युवाहरुको समूह हो । सन् २००८ देखि प्याराग्लाइडिङ तथा पर्यटन व्यवसायमा आबद्ध युवाहरु मिलेर नेपाल घुम्न सुरु गरेका थिए । सोही समूहलाई सन् २०२० मा आएर ‘डुलुवा’का रुपमा नामाकरण गरिएको थियो । स्थापनाको १५ वर्षमा डुलुवाले नेपालका ७० जिल्ला भ्रमण गरेको छ । भने भारतको लद्दाखसम्म र कास्कीदेखी कन्याकुमारी सम्म सफलतापूर्वक यात्रा गरि सहेका छन् ।

हुम्ला अन्तिम उपत्यका अभियान नामाकरण गरि यात्रामा निस्किेका उनीहरु रुकुमकोट, राकम, सर्खेघाट, सिमकोट, लिमी उपत्यका र ५ हजार मिटर उचाइको लाप्चा ला पास परेर सिमकोट फर्किने छन् । त्यसै गरी सर्खैघाट कोहलपुर बुटवल हुदै ११ दिनमा पोखरा फर्किने छन् ।

यात्राका क्रममा ‘डुलुवा’ समूहले बनाएको ‘वि विल राइज फाउण्डेशन’ र नेपाल टेलिभजनद्वारा आयोजित भिडियो प्रतियोगिताको उपाधि डुलुवा समूहको ‘दि नर्देन वाल’ले जितेको थियो । प्रतियोगिताको ‘मोस्ट एनरजेटिक भिडियो मेकर’ अवार्ड पनि ‘डुलुवा’ कै ‘मेरो गाउँ तक्सेरा’ ले जितेको थियो ।

 

पोखरा,२१ कात्तिक ।

नेपाल परिवार नियोजन संघ कास्की शाखाले शुक्रबार पोखरा महानगरपालिका वडा नं २ स्थित विन्ध्यवासिनी माविमा यौन तथा प्रजनन् स्वास्थ्य सचेतना अभियान संचालन गरेको छ ।

संघले किशोर किशोरी तथा युवालाई लक्षित गरी विद्यालय र कलेजमा अभियान संचालन गर्ने योजना अनुसार कार्यक्रम जारी राखेको सभापति नवीन सिग्देलले जानकारी दिनुभयो ।

कार्यक्रम पोखरा महानगरपालिका वडा नं २ का वडा अध्यक्ष दिवसमान प्रधानाङ्गले उद्घाटन गर्नुभएको थियो । कार्यक्रममा बोल्दै वडा अध्यक्ष प्रधानाङ्गले सम्वदेनशील उमेर समूह छनोट गरी कार्यक्रम संचालन गरिनु प्रशंसनीय भएको बताउनुभयो ।

वडा सदस्य गोमा सुवेदीले स्थानीय सरकारले यस्ता कार्यक्रमलाई प्राथमिकता दिनुपर्ने उल्लेख गर्नुभयो ।

विन्ध्यवासिनी माविका प्रधानध्यापक बसन्त पाण्डेले यो अभियानमा शिक्षा र स्वास्थ्य दुवै विषय जोडिएका निकै उपयोगी भएको बताउनुभयो ।

कार्यक्रममा नेपाल परिवार नियोजन संघ कास्कीका कोषाध्यक्ष विष्णु प्रसाद दाहाल, बरिष्ठ शाखा प्रवन्धक नब राज तिवारी र कर्मचारी सुरज चौधरीले सहजिकरण गर्नुभएको थियो ।

नेपाल परिवार नियोजन संघ कास्कीका सभापति नवीन सिग्देललको अध्यक्षतामा भएको कार्यक्रम बरिष्ठ शाखा प्रवन्धक नब राज तिवारीले संचालन गर्नुभएको थियो ।

 

पोखरा, २० कात्र्तिक ।

पर्यटकीय शहर पोखरामा केन्द्रीय कार्यालय रहेको टाईम्स एजुकेशनल कन्सल्ट्यान्सीले अव लुम्बिनी प्रदेशको बुटवलबाट पनि सेवा दिने भएको छ ।

अष्ट्रेलिया, वेलायत, अमेरिका, फ्रान्सलगायत देशका प्रख्यात विश्वविद्यालयहरुमा अध्ययनका लागि नेपाली विद्यार्थीलाई सहजीकरण गरिरहेको टाईम्सले यसअघि काठमाडौंबाटसमेत सेवा सञ्चालन गरिसकेको छ । दोस्रो शाखाको रुपमा बुटवलको ट्राफिक चोकबाट छिट्टै सेवा सञ्चालन गरिने सञ्चालक प्रेम सुवेदीले बताए ।

बुटवल तथा यस आसपासमा रहेका अध्ययनका लागि विदेश जान चाहने विद्यार्थीको सहजीकरणका लागि शाखा बिस्तार गरिएको सुवेदीको भनाई छ । शाखामा अन्यत्र जस्तै विदेश अध्ययनका लागि आवस्यक पर्ने आइएलटीस, पीटीई तथा फ्रेन्च भाषाका कक्षाहरु पनि संचालन हुने छन् । बुटवल शाखा उद्घाटन अवसरमा पहिलो हप्तामा भर्ना हुने विद्यार्थीलाई आइएलटीस, पीटिई तथा फ्रेन्च भाषाका सवै कक्षाहरु निशुल्क हुने सुवेदीले जनाए ।

बुटवल शाखाका व्यवस्थापक विशाल वरालका अनुसार विभिन्न देशहरुमा अध्यनका लागि जान चाहने विद्यार्थीलाई शैक्षिक परामर्श र सहजीकरण गरिनेछ । विद्यार्थीको चाहना र आवश्यकता अनुसार परामर्श प्रदान गरिने तथा बुटवल तथा आसपासका विद्यार्थीको सहजताका लागि कन्सल्ट्यान्सी सञ्चालन गर्न लागिएको उनको भनाई छ । विदेश अध्ययन गरेर आर्जन गरेको ज्ञान, सीप र शिक्षालाई देश विकासमा लगाउनका लागि विद्यार्थीलाई अध्ययन पश्चात नेपाल फर्कन अभियान पनि संंचालन गरिरहेको सञ्चालक सुवेदीले बताए । बुटवलमा आगामी हप्तादेखि सेवा सुरु हुनेछ ।

व्यवस्थापक वरालका अनुसार अधिकांश नेपाली विद्यार्थी लहैलहै र धेरै कुरा नबुझी विदेश जाँदा दुःख पाउने गरेकोले त्यो अवस्था नहोस् भन्ने उद्देश्य टाईम्सले राखेको छ । सबै प्रक्रिया बुझ्नु पर्ने र त्यसका लागि अभिभावकले पनि पूर्ण जानकारी लिन आवश्यक रहेको उनको भनाई छ ।

काठमाण्डौँ, २० कात्र्तिक ।

नव नियुक्त यूवा तथा खेलकुद मन्त्री बब्लु गुप्तासंग नेपाल अटोमोबाइल्स एसोसिएसनका प्रतिनिधिहरूले बिहिवार मन्त्रालयमा भेट गरी बधाइ सहितको सुझावपत्र पेश गरेका छन् ।

संघका मार्शल एण्ड ट्रेनिंग कमिसनका सचिव आशिष रौनियार र ई–स्पोर्टस कमिसनका सचिव तथा स्पोर्टस एण्ड इभेन्ट अफिसर अंकित भण्डारी सहितको टिमले संघको तर्फबाट बधाइ दिँदै नेपालमा मोटरस्पोट्र्स र साहसिक खेलकुदको विकासका लागि ठोस नीति, कार्यक्रम र संरचनागत सुधारका सुझावहरू समेटिएको पत्र बुझाएका थिए ।

सो अवसरमा संघका प्रतिनिधिहरूले युवा तथा खेलकुद मन्त्रालयले साँच्चै ‘युवा सोच र साहसिक दृष्टि’ भएको मन्त्री पाएकोमा खुशी व्यक्त गर्दै नेपालका साहसिक तथा पर्यटकीय खेलकुद क्षेत्रले ठूलो अपेक्षा गरेको बताए ।

उनीहरूले नेपाली खेलकुदलाई साँच्चिकै व्यवस्थित, व्यवसायिक र आशालाग्दो बनाउने मन्त्रालयको अभियानमा नेपाल अटोमोबाईल्स एसोसिएसनको सधैं साथ सहयोग र समर्थन प्रतिवद्धता व्यक्त गरे ।

संघको तर्फबाट सुझाब पत्र बुझ्दै मन्त्री गुप्ताले सुझाव अत्यन्त व्यवस्थित, व्यावसायिक र दूरदर्शी रहेको बताउँदै, “मन्त्रालयले यति गहिरो र व्यावहारिक सुझाव पहिलो पटक पाएको हो,” भन्दै संघ, खेलाडी र अफिसियलहरूको सुझावहरूलाई आत्मसाथ गर्ने बताउनुभयो ।

संघको तर्फबाट साच्चै युवा खेलाडी तथा अफिसियल मार्फत प्राप्त सुझावले युबा वर्गमा हौसला पुग्ने बताउनुभयो ।

 

 

पोखरा, २० कात्तिक ।

पोखराको नयाँबजारमा रहेको पोखरा बचत तथा ऋण सहकारी संस्थाको रकम हिनामिना गरेकाे आरोपमा बुधबार अध्यक्षसहित ७ जना पक्राउ परेका छन् । सहकारीको ८८ करोड ७० लाख रुपैयाँ रकम हिनामिना गरेकाे आराेपमा उनीहरुलाई कास्की प्रहरीले पक्राउ गरेकाे हाे ।

सहकारीका अध्यक्ष सुरेन्द्रबहादुर गोदार, व्यवस्थापक भीष्मप्रसाद गुरुङ, उपाध्यक्ष शम्भुराज बास्तोला, सचिव दिलबहादुर केसी खत्री, ऋण संयोजकसमेत रहेका कोषाध्यक्ष हिरामणि दाहाल, सञ्चालक समितिका पूर्वसचिव ईन्द्रप्रसाद द्वा र सञ्चालक समिति सदस्य दोर्जे तामाङ पक्राउ परेकाे प्रहरीले बताएकाे छ ।

प्रहरीले जरुरी पक्राउ पुर्जीका आधारमा उनीहरूलाई पक्राउ गरी अनुसन्धान थालेको हो । उनीलाई जिल्ला अदालत कास्कीबाट म्याद थप गरेर अनुसन्धान थालिएको छ ।

काठमाण्डौँ, १९ कात्र्तिक ।

आईसीसी पुरुष क्रिकेट विश्वकप लिग–२ अन्तर्गत युनाइटेड अरब इमिरेट्स (यूएई) मा भएको त्रिदेशीय श्रृंखलामा नेपाल जितविहीन बनेको छ। बुधबार दुबईको यूएईमा सम्पन्न अन्तिम खेलमा घरेलु टिम यूएईसँगको चार विकेटको हारसँगै नेपालको यात्रा जितविहीन हुँदै टुंगिएको हो।

नेपालले प्रस्तुत गरेको २४० रनको लक्ष्य यूएईले ४९.१ ओभरमा ६ विकेट गुमाएर पूरा गर्‍यो। यूएईको जितमा मुहम्मद सहदादले सर्वाधिक ९६ रन बनाए। उनले १२३ बलमा ६ चौका र तीन छक्का प्रहार गरे।

यस्तै, मुहम्मद वसिमले ७३ बलमा चार चौका र तीन छक्कासहित ७६ रन थपे। यी दुईले ६८-३ को स्थितीबाट १४७ रनको साझेदारी गर्दै यूएईलाई जितनजिक पूर्याएका थिए। सोहेब खानले २९, कप्तान आलिसान सराफुले १८ र हर्षिक कौसिकले १३ रन बनाए।

नेपालका करण केसीले तीन विकेट लिए। नन्दन यादव, ललित राजवंशी र सन्दीप लामिछानेको नाममा समान एक विकेट रह्यो। त्यसअघि टस हारेर ब्याटिङमा आएको नेपालले निर्धारित ५० ओभरमा नौ विकेट गुमाएर २३९ रनको योगफल खडा गरेको थियो।

यूएईविरुद्ध नेपालका भीम सार्कीले सर्वाधिक ४८ रन बनाए। ६८ बल खेलेका उनले सात चौका प्रहार गरे। मध्यक्रमका ब्याटर कुशल मल्लले ५१ बलमा एक चौका र तीन छक्कासहित ४६ रन बनाए।

ओपनर आसिफ सेखले ४८ बलमा चार चौकासहित ३४ रन बनाए। दीपेन्द्रसिंह ऐरीले ३७ रन थप्दा आरिफ सेखको नाममा ३० रन रह्यो। १०औँ नम्बरमा ब्याटिङका निम्ति आएका सन्दीप लामिछानले अविजित १५ रन जोडे। कुशल मल्ल र सन्दीप लामिछानले नवौँ विकेटका निम्ति ४२ रनको साझेदारी गरेका थिए।

यो श्रृंखलाको यसअघिका तीन खेलमा नेपालले अमेरिकासँग १०६, दोस्रो खेलमा यूएईविरुद्ध पाँच र तेस्रो खेलमा पुनः अमेरिकासँग चार विकेटको हार बेहोरेको थियो।

काठमाण्डौँ, १९ कात्र्तिक ।

सुडानको सेना नियन्त्रित शहर अल-ओबेद नजिकै एक अन्त्येष्टि जुलुसमा ड्रोन आक्रमण हुँदा कम्तीमा ४० जनाको मृत्यु भएको अधिकारी तथा कार्यकर्ताहरूले बताएका छन्।

यो आक्रमण अल-लुवैब गाउँमा भएको थियो, जहाँ मानिसहरू शोक समारोहको लागि पालमा भेला भएका थिए।

अधिकारीहरूले आक्रमणको लागि अर्धसैनिक र्‍यापिड सपोर्ट फोर्स (आरएसएसफ) लाई दोष दिएका छन्, यद्यपि आरएसएफले अहिलेसम्म कुनै टिप्पणी गरेको छैन।

राजधानी खार्तुम र डार्फर क्षेत्रलाई जोड्ने प्रमुख सहर अल-ओबेदमा अस्पताल पुग्नुअघि नै धेरैको मृत्यु भयो।

महत्वपूर्ण तेल भण्डार भएको कोर्डोफान क्षेत्रमा लडाईं बढेको छ। आरएसएफले बारा शहर कब्जा गरेपछि, गत हप्ता लगभग २०,००० मानिसहरू एल-ओबेदमा भागे।