२०८३ मंसिर १ सोमबार
२०८३ मंसिर १ सोमबार

पोखरा, २७ कात्र्तिक ।

तेस्रो संस्करणको इन्डुरो अन्तर्राष्ट्रिय माउन्टेन बाइक प्रतियोगिता सुरु भएको छ । तीन दिनसम्म सञ्चालन हुने यो प्रतियोगिता पोखरा महानगरपालिका वडा नम्बर १३ को आर्बा–बिजय डाँडामा भएको हो । 
 
प्रतियोगिताको उत्घाटन पोखरा महानगरपालिकाका मेयर धनराज आचार्यले गरे । उत्घटान सत्रमा बोल्दै मेयर आचार्यले पोखरा पर्यटनको राजधानी भनिएपनि अन्तर्राष्ट्रिय स्तरका खेल गतिविधि र इभेन्टहरु भइरहने भएकाले पोखरा साहसिक खेलको केन्द्रका रूपमा स्थापित हुँदै गएको बताए । साथै विश्वका विभिन्न देशका बाइकर्सले पोखराको पहाडी सौन्दर्य र चुनौतीपूर्ण ट्रयाकमा प्रतिस्पर्धा गर्न बढी नै रुचाउने गरेको उनले बताए । ‘ड्रागन बोट रेस, क्रस कन्ट्रीलगायत धेरै अन्तर्राष्ट्रिय प्रतियोगिता पोखरामा हुँदै आएकोले पनि खेलकुद सँगै पर्यटन प्रबर्द्धनमा ठूलो टेवा पुगेको छ ।’ मेयर आचार्यले भने ।
 
प्रतियोगितामा जर्मनी, सिंगापुर, अष्ट्रेलिया, युके, श्रीलङ्का, ओमन, अमेरिका र नेपाल गरी ८ देशका ४५ खेलाडी सहभागी छन् । १३ बढी देशका १ सय खेलाडी सहभागी हुने अपेक्षा आयोजक कम्पनी डन टिल डस्कले गरेपनि गत भदौ २३ र २४ गते नेपालमा भएको जेन्जी आन्दोलनले नकारात्मक असर पारेको प्रतियोगिताका रेस डाइरेक्टर सुनिलचन्द्र शर्माको भनाइ छ । ‘सहभागी सोचे भन्दा कम भएपनि जति आउनुभएको छ, उहाँहरू पोखराको यो मौसम र भौगोलिक बनावटले निकै खुसी हुनुहुन्छ । त्यसमाथि स्थानीय नागरिक र स्थानीय निकायले देखाएको समन्वयकारी भूमिका निकै प्रसंसनीय छ ।’ -डाइरेक्टर शर्माले भने ।
 
उद्घाटन सत्रको अध्यक्षता गरेका पोखरा वडा १३ का वडाध्यक्ष किरण बरालले ‘पोखरा इन्डूरो रेस’ पोखराकै ब्रान्डका रूपमा स्थापित भइसकेको बताए ।
 
प्रतियोगितामा पुरुषतर्फ जुनियर (१२–१८ वर्ष), महिला खुला (१८ वर्ष माथिका), इलिट (२९ वर्ष माथिका), मास्टर्स ‘क’ (३०–३९ वर्ष), मास्टर्स ‘ख’ (४०–४९ वर्ष) र भेट्रान (५० वर्ष माथि) गरि ६ विधामा ६ वटै ट्रयाकमा प्रतिस्पर्धा हुनेछ ।
 
समुन्द्री सतहबाट १३ सय ६० मिटर उचाँईमा रहेको आर्वा–बिजय डाँडामाआयोजक डन टिल डस्कले सन् २०२० देखि तयारी गर्दै उक्त क्षेत्रमा संरचना बनाइरहेको छ । यस अघि २०८० र २०८१ सालमा प्रतियोगिता सम्पन्न भइसकेको छ । यो इन्डुरो प्रतियोगिताले विश्वभर ठुलो संख्यामा रहेका माउन्टेन बाइक प्रेमी आकर्षित भई नेपालको पर्यटन प्रबर्द्धनमा सहयोग पुग्ने अपेक्षा आयोजकको छ ।

पोखरा, २७ कार्तिक ।

तीन पार्टी मिलेर नेपाली कम्युनिष्ट पार्टी बनेको समाजवादी मोर्चाबाट नेत्र विक्रम चन्द ‘विप्लव’ नेतृत्वको नेपाल कम्युनिष्ट पार्टी अलग भएको छ । पार्टी महासचिव विप्लव सीले एक विज्ञप्ति जारी गर्दै समाजवादी मोर्चाको औचित्य समाप्त भएको बताएका हुन्।

समाजवादी मोर्चामा आबद्ध तीन पार्टीहरुले एकता गरेर नेपाली कम्युनिष्ट पार्टी बनाएकाले मोर्चाको औचित्य समाप्त भएको उनको भनाई छ। मोर्चाले राष्ट्रिय स्वाधीनता, राज्यको अग्रगामी रुपान्तरण र भ्रष्टाचारका विरुद्ध संघर्षको पहल गर्ने उद्देश्यका साथ गठन गरेपनि रफ्तारमा काम अगाडि नबढेको विप्लवले बताए।

विज्ञप्तिमा भनिएको छ, ‘२०८० सालमा नेपालका चार पार्टी सहभागि समाजवादी मोर्चा निर्माण गरेका थियौं । राष्ट्रिय स्वाधीनता, राज्यको अग्रगामी रुपान्तरण र जनजिविकाको पक्षमा साथै भ्रष्टाचारका विरुद्ध संघर्षको पहल गर्ने उद्देश्यका साथ गठन गरेको मोर्चाले केही महत्वपूर्ण कार्यक्रमहरु पनि गर्‍यो । तर जुन रफ्तारमा कामहरु बढाउनु पर्ने थियो त्यो सम्भव बनेन। जेन्जी विद्रोहपछि नेपालको राजनीतिक परिवेश र धारणामै व्यापक फेरबदल भएका छन् । सबै राजनीतिक पार्टीहरु नयाँ खालका एकता र मोर्चाबन्दीमा सहभागी बन्दै छन् । व्यापकस्तरमा नयाँ बहस आवश्यक बनेका छन् । समाजवादी मोर्चामा आबद्ध तीन पार्टीहरुले एकता गरेर नेपाली कम्युनिष्ट पार्टी बनाइसकेका छन् । यस्तो स्थितिमा आजकै स्वरुपमा समाजवादी मोर्चाको औचित्य समाप्त भएको नेकपाको निष्कर्ष छ । सोही निस्कर्षका आधारमा हाम्रो जनप्रिय पार्टी नेकपा समाजवादी मोर्चाबाट अलग भएको जानकारी गराउँदछौं ।’

पोखरा, २६ कात्तिक ।
 
तेस्रो संस्करणको इन्डुरो अन्तर्राष्ट्रिय माउन्टेन बाइक प्रतियोगिताको तयारी पूरा भएको छ । आयोजक माउन्टेन बाइक कम्पनी डन टिल डस्कका अनुसार कात्तिक २७ देखी २९ गतेसम्म पोखरा महानगरपालिका वडा नम्बर १३ को आर्बा–बिजय डाँडामा हुने प्रतियोगिताको सम्पूर्ण तयारी पूरा भएको जनाएको छ ।
 
प्रतियोगितामा जर्मनी, सिंगापुर, अष्ट्रेलिया, युके, श्रीलङ्का, ओमन, अमेरिका र नेपाल गरी ८ देशका ५० खेलाडी सहभागी हुने प्रतियोगिताका रेस डाइरेक्टर सुनिलचन्द्र शर्माले जानकारी दिए । उनका अनुसार १३ बढी देशले दर्ता गरेपनि नेपालमा भएको जेन्जी आन्दोलनले परेको नकारात्मक असरका कारण अरु देशले दर्ता रद्द गरेका छन् ।
 
प्रतियोगितामा पुरुषतर्फ जुनियर (१२–१८ वर्ष), महिला खुला (१८ वर्ष माथिका), इलिट (२९ वर्ष माथिका), मास्टर्स ‘क’ (३०–३९ वर्ष), मास्टर्स ‘ख’ (४०–४९ वर्ष) र भेट्रान (५० वर्ष माथि) गरि ६ विधामा ६ वटै ट्रयाकमा प्रतिस्पर्धा हुने आयोजकले जनाएको छ ।
 
प्रतियोगिता समुन्द्री सतहबाट १३ सय ६० मिटर उचाँईमा रहेको आर्वा–बिजय डाँडामा हुनेछ । आयोजक डन टिल डस्कले सन् २०२० देखि तयारी गर्दै उक्त क्षेत्रमा संरचना बनाइरहेको छ । यस अघि २०८० र २०८१ सालमा प्रतियोगिता सम्पन्न भइसकेको छ ।
 
यो इन्डुरो प्रतियोगिताले विश्वभर ठुलो संख्यामा रहेका माउन्टेन बाइक प्रेमी आकर्षित भई नेपालको पर्यटन प्रबर्द्धनमा सहयोग पुग्ने अपेक्षा आयोजकको छ ।
 
प्रतियोगिताले खेलकुदलाई मात्र नभई खेलकुदसँगै पर्यटन प्रबर्धनलाई महत्वपूर्ण टेवा पुराउने विश्वास गरिएको छ ।
 

पोखरा, २६ कात्र्तिक ।

पोखरा महानगरपालिका वडा नं २९ मा रहेको प्रगति टोल विकास सस्था र सोही टोलमा रहेको ओमकारेश्वर शिव मन्दिर व्यवस्थापन तथा सत्सङ्ग समितिको संयुक्त  आयोजनामा तथा पतञ्जली योग पीठ गण्डकी प्रदेशको सहयोगमा १५ दिने शिविर सुरु भएको छ ।

 “योग गरौं योग, रहौं निरोग” भन्ने उद्घोषका साथ टोलवासीहरुमा योगवारे चेतना जगाउन योग शिविर  आयोजना गरिएको अध्यक्ष ललिन्द्र खड्काले वताए । ओमकारेश्वर शिव मन्दिर व्यवस्थापन तथा सत्सङ्ग समितिका अध्यक्ष समाजसेवी मोति गिरीले शिविरमा स्वागत गर्दै योग दर्शनमा यम, नियम, आसन, प्राणायम, प्रत्याहार, धारणा, ध्यान र समाधि गरी आठ महत्वपूर्ण अङ्गहरु (अष्टाङ्ग योग) को चर्चा गरिएको वताए ।

योग गुरु परमान्द भण्डारीले  तनाव व्यवस्थापनका लागि योग उपयोगी  रहेको भन्दै उच्च रक्तचाप भएका, साइटिका तथा मेरुदण्डसँग सम्बन्धित अन्य समस्याहरु भएका, वृद्ध तथा गर्भवती महिलाले पनि यसमा सावधानी अपनाउनु पर्नेमा जोड दिए ।  टोलका  उपाध्यक्षमा वीरबहादुर खत्री,सचिव विष्णुहरि पौडेल, संस्थाका निवर्तमान अध्यक्ष धर्मदत्त पौडेल लगायतले योग शिविरको सफलताको  शुभकामना दिएका थिए भने ओमकारेश्वर शिव मन्दिरका पुजारी लक्ष्मण गौतमले दीप प्रज्ज्वलन गरी  उद्घाटन गर्दै टोल विकास सस्थाले आफनो टोलको विकासका लागि नेतृत्वदायी भूमिका निभाउनु पर्ने सुझाव  राखेका थिए । टोलका ३० बढी सहभागी रहेको  शिविर मंसिर १० गतेसम्म चल्ने छ ।

पोखरा, २६ कात्र्तिक ।

महिलाहरु मात्र सेयर सदस्य रहेको पोखरा महानगरपालिका वडा नं २९ को दीपशिखा महिला कृषि सहकारी संस्थाको १२ औं साधारण सभा सम्पन्न भएको छ । साधारण सभाको ज्येष्ठ सदस्य रामकुमारी आचार्यबाट उद्घाटन गरिएको थियो ।

पोखरा महानगरपालिका कार्यपालिका सदस्य एवम् वडा नं २९ का वडासदस्य निर्मला पौडेलले महिलाहरुलाई आय आर्जनमा जोड्नु पर्छ भन्ने मान्यताका साथ दीपशिखा पुस्तकालयको संयोजनमा स्थापना भएको सहकारीले छोटो समयमा चार सय ८० सेयर सदस्यहरु मार्फत दुई करोड ४ लाख ६९ हजार सेयर पुँजी बनाउन सफल भएकामा खुशी व्यक्त गर्दै सर्वसाधारणका माझ प्राप्त गरेको विश्वासलाई आत्मसात गर्दै अघि बढ्नुपर्नेमा जोड दिईन् ।

कार्यक्रममा दीपशिखा पुस्तकालयका कोषाध्यक्ष तथा संस्थाका सल्लाहकार माधव भण्डारी,संस्थाका सल्लाहकार मेजर रामप्रसाद गुरुङ्ग, लेखनाथ उद्योग वाणिज्य संघका सहकारी समन्वय उपसमिति संयोजक कृष्णप्रसाद तिमिल्सेना, लेखनाथ उद्योग वाणिज्य संघकी उपमहासचिव गंगा मल्ल निवर्तमान अध्यक्ष गोमा कुमारी आचार्य लगायतले शुभकामना मन्तव्य दिएका थिए ।

वक्ताहरुले आर्थिक अनुशासनको माध्यमबाट सहकारीले आम सेयर सदस्यको मन जित्ने गरी सुरक्षित ऋण प्रवाह गरी नियमित रुपमा बचत गर्ने बानीको विकास गराउनु पर्ने सुझाव राखेका थिए ।

संस्थाकी अध्यक्ष शिवकुमारी सुवेदीको अध्यक्षतामा भएको कार्यक्रमको सञ्चालन सचिव कल्पना गुरुङ र स्वागत मन्तव्य व्यवस्थापक कृष्णकुमारी पोखरेलले राखेकी थिईन । कार्यक्रममा अध्यक्ष, सचिव, कोषाध्यक्ष र लेखा समितिका प्रतिवेदनहरु पारित गरिएका थिए भने बाल वचत, असल कारोवारी, कृयाशील ज्येष्ठ सदस्य लगायतका सम्मान समेत गरिएका थिए ।

 

पोखरा, २६ कार्तिक  

पोखरा महानगरपालिका–२५, बिरेठाँटीमा रहेको बिरेठाँटी माध्यमिक विद्यालयमा “WT Cares Nepal Um Hong Gil School Project 2025/26” समारोह  सम्पन्न भएको छ। 

समारोहका प्रमुख अतिथि अन्नपूर्ण गाउँपालिका, कास्कीका अध्यक्ष विष्णु बहादुर के.सी.ले WT Cares Nepal र Um Hong Gil Foundation द्वारा ग्रामिण समुदायका बालबालिकाका लागि खेल र शिक्षाको माध्यमबाट विकासका अवसर सिर्जना गरेको योगदानको प्रशंसा गर्नुभएको थियो।

उहाका अनुसार, यस्ता परियोजनाले ग्रामीण क्षेत्रमा आशा, अवसर र एकताको भावना अभिवृद्धि गर्नुका साथै अन्तर्राष्ट्रिय मैत्री सम्बन्ध बलियो बनाउन महत्त्वपूर्ण भूमिका खेलिरहेका उल्लेख गर्नुभयो ।

Um Hong Gil Human Foundation (UHGHF) का देश निर्देशक पार्क हिडोङ तथा नेपाल तेक्वान्दो संघका अध्यक्ष दीपराज गुरुङले आगामी दिनहरूमा पनि ग्रामीण बालबालिकाको सर्वांगीण विकास र युवा सशक्तिकरणका लागि प्रेरणादायी उदाहरण बनेर रहिरहने बताउनुभयो ।

कार्यक्रमका क्रममा नेपाल तेक्वान्दो संघका अध्यक्ष दीपराज गुरुङले परियोजनाको पृष्ठभूमि र उद्देश्यबारे जानकारी गराउनुभएको थियो। उहाँका अनुसार यस वर्षको परियोजना तेस्रो चरण अन्तर्गत सञ्चालन गरिएको विशेष तेक्वान्दो तालिममा ६० जना विद्यार्थी सहभागी भएका छन्।

यसअघि परियोजनाको पहिलो चरण (अगस्ट २२, २०२२ – अगस्ट २१, २०२३) मा ८७ जना विद्यार्थी, र दोस्रो चरण (अक्टोबर २०२३ – अप्रिल २०२४) मा ७४ जना विद्यार्थी सहभागी भएका थिए। प्रत्येक चरणमा युवाको सशक्तिकरण, अनुशासन र जीवन कौशल विकासमा विशेष ध्यान दिइएको बताइएको छ।

विद्यालय व्यवस्थापन समितिका अध्यक्ष दिल्लीराज जैसीको अध्यक्षतामा भएको सो समारोहमा वडाध्यक्ष विजय गुरुङ, नेपाल तेक्वान्दो संघका महासचिव हेमन्त डाँगी, संघका सल्लाहकार परिषद् सदस्य हरिश्वर पोखरेल, गण्डकी प्रदेश तेक्वान्दो संघका अध्यक्ष जगन बहादुर गुरुङ, कास्की जिल्ला तेक्वान्दो संघका अध्यक्ष कुमार गुरुङ, प्रशिक्षक कविराज खड्गीतथा बोधराज गिरी, UHGHF की कार्यक्रम प्रबन्धक निलम थापालगायतको उपस्थिति रहेको थियो।

गोरखा, २६ कात्र्तिक ।
 
गोर्खा जिल्ला, भीमसेन थापा गाउँपालिका–८ मा अवस्थित एक मात्र माध्यमिक शिक्षण संस्था श्री जागेश्वर माध्यमिक विद्यालयले आफ्नो गौरवमय ५० औँ स्थापना दिवसको अवसरमा स्वर्ण महोत्सव मनाउने भएको छ। विद्यालय व्यवस्थापन समितिका अनुसार महोत्सव यही मङ्सिर २६ गतेदेखि पुष १ गतेसम्म विविध सांस्कृतिक, शैक्षिक र खेलकुद कार्यक्रमका साथ भव्य रूपमा आयोजना गरिने तयारी भइरहेको छ।
 
विसं २०३२ सालमा स्थापना भएको श्री जागेश्वर माध्यमिक विद्यालयले स्थापनाकालदेखि नै निरन्तर रूपमा स्थानीय क्षेत्रमा गुणस्तरीय शिक्षा प्रदान गर्दै आएको छ। गोरखा र धादिङ जिल्लामा शिक्षाको विकास र विस्तारमा यो विद्यालयले पुर्‍याएको योगदान उल्लेखनीय मानिन्छ। सन् २०५४ सालदेखि एसईई तहसम्मका परीक्षामा हजारौँ विद्यार्थीहरू सफलतापूर्वक उत्तीर्ण भई देश–विदेशका विभिन्न क्षेत्रमा उत्कृष्ट योगदान दिइरहेका छन्।
 
विद्यालयका भूतपूर्व विद्यार्थी रुपक ढकालका अनुसार, पाँच दिनसम्म चल्ने स्वर्ण महोत्सवमा विद्यालयको ऐतिहासिक यात्रा झल्किने गरी विविध कार्यक्रमहरू समावेश गरिनेछ। यस अवधिमा पालिका स्तरीय खेलकुद प्रतियोगिता, विद्यार्थी प्रतिभा प्रदर्शन, सम्मान तथा स्मारिका विमोचन, सांस्कृतिक कार्यक्रम र राष्ट्रिय स्तरका ख्यातिप्राप्त कलाकारहरूको सांगितिक प्रस्तुति आयोजना गरिनेछ। यस अवसरमा विद्यालयको दीर्घकालीन योगदान सम्झँदै पूर्वप्रशासक, शिक्षक, विद्यार्थी तथा समुदायका अग्रजहरूलाई सम्मान गरिने तयारी पनि गरिएको छ।
 
विद्यालय व्यवस्थापन समितिका अध्यक्ष रिसि भट्ट र प्रधानाध्यापक यदुनाथ सापकोटाले संयुक्त रूपमा जारी अपिलमा विद्यालय समुदाय, अभिभावक, विद्यार्थी, पूर्वविद्यार्थी तथा सरोकारवालाहरुलाई महोत्सवलाई ऐतिहासिक र सभ्य बनाउने उद्देश्यले हातेमालो गर्न हार्दिक अनुरोध गर्नुभएको छ। उहाँहरूले विद्यालयको पाँच दशक लामो यात्रामा स्थानीय समुदायको साथ र सहयोग प्रमुख आधार भएको उल्लेख गर्दै स्वर्ण महोत्सव विद्यालय मात्र नभई सम्पूर्ण गाउँपालिकाको साझा उत्सव हुने विश्वास व्यक्त गर्नुभएको छ।
 
विद्यालयका तर्फबाट जारी सूचनामा आर्थिक सहयोगका लागि सबैलाई आह्वान गरिएको छ। विद्यालयका प्राध्यापक र आर्थिक स्रोत सङ्कलन उपसमितिका संयोजकको संयुक्त नाममा रहेको बैंक खातामा रकम जम्मा गर्न वा QR कोड स्क्यान गरी सहयोग गर्न सकिने व्यवस्था गरिएको छ। विद्यालयले सहयोगदाताहरूप्रति आभार प्रकट गर्दै विभिन्न स्तरका योगदानकर्ताहरूलाई सम्मान प्रदान गर्ने निर्णय गरेको छ।
 
सहयोगकर्ताहरूको योगदानअनुसार सम्मानका श्रेणीहरू यस प्रकार रहेका छन् —
रु. ५,००० सम्मका सहयोगीलाई दोसल्ला र स्मारिकामा नाम प्रकाशन, रु. ५,००१ देखि १०,००० सम्मका सहयोगीलाई दोसल्ला, सिल्भर फ्रेम र स्मारिकामा प्रकाशन, रु. १०,००१ देखि २०,००० सम्मका सहयोगीलाई दोसल्ला, गोल्डेन फ्रेम र स्मारिकामा प्रकाशन गरिनेछ। त्यस्तै रु. २०,००१ देखि ३०,००० सम्मका सहयोगीलाई दोसल्ला, गोल्डेन फ्रेम, स्मारिका र शिलापत्रमा नाम प्रकाशन गरिनेछ।
 
रु. ३०,००१ देखि ५०,००० सम्मका सहयोगकर्तालाई दोसल्ला, आँखीझ्याल फ्रेम, स्मारिका र शिलापत्रमा प्रकाशन गरिनेछ भने रु. ५०,००१ देखि १ लाखसम्म सहयोग गर्नेहरूलाई दोसल्ला, आँखीझ्याल फ्रेम, स्मारिकामा तीन पुस्ते विवरणसहित नाम र शिलापत्रमा प्रकाशन गरिनेछ। एक लाख रुपैयाँभन्दा बढी सहयोग गर्ने व्यक्तिहरूलाई दोसल्ला, आँखीझ्याल फ्रेम, ताम्रपत्र तथा स्मारिकामा तीन पुस्ते विवरणसहित सम्मान गरिने विद्यालयले जनाएको छ।
 
विद्यालयका भूतपूर्व विद्यार्थीहरू सामाजिक सञ्जालमार्फत सहयोग अभियानमा सक्रिय रहेका छन्। विद्यालयको आधिकारिक फेसबुक पेजमा सहयोगदाताहरूको नाम, रकम र तस्बिरसहित हार्दिक आभार व्यक्त गरिएको छ। विद्यालय परिवारले सबै पूर्वविद्यार्थी, अभिभावक, शिक्षक तथा शुभेच्छुकहरूलाई एकताको भावना र सहकार्यका साथ स्वर्ण महोत्सवलाई सफल बनाउन आग्रह गरेको छ।
 
पाँच दशकको गौरवमय यात्रामा प्रवेश गरेको श्री जागेश्वर माध्यमिक विद्यालयले यो स्वर्ण महोत्सवलाई विद्यालयको इतिहास, उपलब्धि र भविष्यदृष्टि समेट्ने अवसरका रूपमा लिन लागेको छ। स्थानीय समुदायको सहभागिता र सहयोगका साथ यो कार्यक्रमले विद्यालयलाई अझ सबल, सक्षम र अनुकरणीय शिक्षण संस्थाको रूपमा अघि बढाउने विश्वास विद्यालय परिवारले व्यक्त गरेको छ।

पोखरा, २५ कात्तिक ।

नेपाल चाटर्ड एकाउन्टेन्ट सस्था पोखरा शाखाको आयोजनामा पोखरामा अन्तराष्ट्रिय लेखा दिवस मनाइएको छ । प्रत्येक वर्षको नोभेम्बर १० मा अन्तराष्ट्रिय लेखा दिवस मनाउने गरिएकोमा शाखाले एकान्टिङ प्रोफेसन एण्ड एआई सम्बन्धी अन्तरक्रिया गर्दै दिवस मनाएको हो ।

अन्तरक्रियामा लेखा व्यवसायसँग सम्बन्धित चाटर्ड एकाउन्टेन्ट तथा रजिष्टर्ड अडिटर्सहरू एवम् उद्योग वाणिज्य संघका प्रतिनिधिको सहभागिता थियो ।

कार्यक्रममा पोखरा उद्योग वाणिज्य संघका अध्यक्ष गोकर्ण कार्की, लेखानाथ उद्योग वाणिज्य संघका अध्यक्ष जानुका पराजुली अधिकारी एवम् नेपाल युवा व्यवसायी मञ्च पोखरा च्याप्टर्सका अध्यक्ष सुमेज राजभण्डारी लगायतको उपस्थिति थियो ।

नेपाल लेखामान वोर्डका सदस्य चाटर्ड एकाउन्टेन्ट दुर्गाप्रसाद ज्ञवालीले एकाउन्टिङ प्रोफेसन एण्ड एआई सम्बन्धमा कार्यपत्र प्रस्तुत गर्दै यसको प्रयोगले लेखा व्यवसायमा तथ्यांकहरुको विश्लेषणमा सहजिकरण, समयको वचत का साथै विस्तृत अध्ययनमा समेत सहज हुने बताउनुभयो ।

उहाले एआईको प्रयोग गर्ने प्राविधिक पक्ष सिकाउँदै यसबाट सहि एवम् विश्वसनीय विवरण लिने सोही अनुसारको विवरण एवम् प्रश्न पेश गर्नुपर्ने जानकारी गराउनुुभयो ।

नेपाल चाटर्ट एकाउन्टेन्ड संस्था पोखरा शाखा संयोजक चाटर्ड एकाउन्टेन्ट उबेक श्रेष्ठको अध्यक्षतामा सम्पन्न कार्यक्रमको शाखा समन्वय कमिटीका सदस्य चाटर्ड एकाउन्टेन्ट सागर आचार्यले सञ्चालन गर्नुुभएको थियो भने सदस्य चाटर्ड एकाउन्टेन्ट मदन पोखरेलले स्वागत गर्नुुभएको थियो ।

कार्यक्रमका सहभागीले एआई सम्बन्धित नयाँ प्रविधिलाई आफनो पेशा तथा व्यवसायसँग कसरी जोडन सकिन्छ भन्ने सम्बन्धमा चासो व्यक्त गर्नुभएको थियो ।

कार्यक्रममा ५० जना भन्दा बढीको उत्साहपूर्ण सहभागिता रहेको शाखाका सदस्य रजिष्टर्ड अडिटर चन्द्रबहादुर सुवेदीले जानकारी दिनुुभयो ।

पोखरा, २५ कात्र्तिक ।

व्यवहारमा परीवर्तन ,कार्यसम्पादनमा सुधार मुल उद्येश्य सहित स्थापित गण्डकी प्रदेश प्रशिक्षण प्रतिष्ठानको आयोजना तथा प्रदेश तथा स्थानीय शासन सवलिकरण कार्यक्रमको समन्वयमा पोखरा -३१ पचभैयामा दुइ दिने कर्मचारीहरुको क्षमता विकास तथा गुण व्यवस्थापन प्रणालीका कार्यविधिहरुमाथि छलफल कार्यक्रम संपन्न भएको छ |

गण्डकी प्रदेश प्रशिक्षण प्रतिष्ठानका कार्यकारी निर्देशक सुरेन्द्र वाबु तिवारीको अध्यक्षतामा सुरु भएको कार्यक्रममा गण्डकी प्रदेश मुख्य मंन्त्री तथा मन्त्री परीषदको कार्यालयका सचिव ऋषिराज आचार्यको प्रमुख आतिथ्यतामा सम्पन्न भएको हो | आइएसओ ९००१:२०१५ प्राप्त प्रतिष्ठानले अर्को तिन वर्षको लागी आइएसओ नवीकरण गरेको छ ,र त्यसका कार्यविधिहरु माथि छलफल गर्ने कार्यको सहजीकरण प्रतिष्ठानका उपसचिव नारायण पौडेलले गरेका थिए भने कार्यक्रमको सहजकर्ता प्रतिष्ठानका प्रशिक्षण तथा अनुसन्धान अधिकृत इन्जिनियर मनोज पौडेल रहेका थिए |

कार्यक्रममा बोल्दै प्रमुख अतिथि आचार्यले प्रतिष्ठानले गण्डकी प्रदेश सरकारका कार्यक्रमहरुमा भएका र सेवा प्रवाहमा आएका समस्याहरुको समाधानको लागी अध्ययन तथा अनुसन्धान गर्नु जरुरी रहेको बताएका थिए |

दुइ दिन सम्म संचालित कार्यक्रममा प्रदेश तथा स्थानीय शासन सवलिकरण कार्यक्रम गण्डकी प्रदेश संयोजक प्रणय शर्मा , गण्डकी प्रदेश प्रशिक्षण प्रतिष्ठानका उपसचिव प्रभाकर घिमिरे, गण्डकी प्रदेश प्रशिक्षण प्रतिष्ठानका निर्देशक लक्ष्मण तिमिल्सिना ,गण्डकी प्रदेश मुख्य मंन्त्री तथा मन्त्री परीषदको कार्यालयका उपसचिव टिकाराम पौडेल लगाएतले आफ्नो विषयवस्तु प्रस्तुत गरेका थिए |

पोखरा, २५ कात्तिक ।

भारतको राजधानी दिल्लीमा लाल किल्ला मेट्रो स्टेसनको गेट नम्बर-१ नजिक सोमबार साँझ गुडिरहेको एक कारमा शक्तिशाली विस्फोट भएको छ। साँझ ६:५२ बजे भएको यस विस्फोटमा दुई महिलासहित नौ जनाको मृत्यु भएको दैनिक भास्करले उल्लेख गरेको छ । घटनामा २४ जना घाइते भएका छन्।

दिल्ली प्रहरीले लाल किल्ला नजिक भएको विस्फोटको सम्बन्धमा ‘गैरकानुनी गतिविधि रोकथाम ऐन’ (यूएपीए) अन्तर्गत एफआईआर दर्ता गरेको छ।

सुरक्षा एजेन्सीहरूले आत्मघाती आक्रमणको कोणबाट पनि अनुसन्धान सुरु गरेका छन्। यद्यपि, घटनास्थलबाट आरडीएक्सको कुनै प्रमाण भेटिएको छैन। 

मृत्यु हुनेहरूको उमेर २१ देखि ५८ वर्षबिच रहेको छ। मृतकहरूमध्ये दुई जनाको मात्र पहिचान हुन सकेको छ। विस्फोटमा परेका मानिसहरू नराम्ररी जलेका छन्, र केहीको शरीरका टुक्राहरू टाढासम्म छरिएका थिए।

विस्फोट कारको पछिल्लो भागमा भएको थियो, जसको आवाज करिब एक किलोमिटरसम्म सुनिएको थियो। विस्फोटका कारण घटनास्थल नजिकै पार्क गरिएका ६ वटा कार, २ वटा ई-रिक्सा र १ वटा अटो रिक्सा जलेका छन्।

प्रहरीका अनुसार जुन कारमा विस्फोट भयो, त्यसमा तीन जना सवार थिए। उक्त कार हरियाणाको गुरुग्राममा सलमानको नाममा दर्ता थियो। प्रहरीले सलमानलाई नियन्त्रणमा लिएको छ। सलमानले उक्त कार पुलवामाका तारिकलाई बेचेको बताएका छन्। प्रहरी तारिकको खोजी गरिरहेको छ।

ताजा अपडेट

Login

कृपया ध्यान दिनुहोस्:

  • अब तपाइले कमेन्ट गर्नका लागि अनिवार्य रजिस्ट्रेसन गर्नुपर्ने छ ।
  • आफ्नो इमेल वा गुगल, फेसबुक र ट्वीटरमार्फत् पनि सजिलै लगइन गर्न सकिने छ ।
  • यदि वास्तविक नामबाट कमेन्ट गर्न चाहनुहुन्न भने डिस्प्ले नेममा सुविधाअनुसारको निकनेम र प्रोफाइल फोटो परिवर्तन गर्नुहोस् अनि ढुक्कले कमेन्ट गर्नहोस्, तपाइको वास्तविक पहिचान गोप्य राखिने छ ।
  • रजिस्ट्रेसनसँगै बन्ने प्रोफाइमा तपाइले गरेका कमेन्ट, रिप्लाई, लाइक/डिसलाइकको एकमुष्ठ बिबरण हेर्नुहोस् ।