
पोखरा,२१ कात्तिक ।
नेपाल परिवार नियोजन संघ कास्की शाखाले शुक्रबार पोखरा महानगरपालिका वडा नं २ स्थित विन्ध्यवासिनी माविमा यौन तथा प्रजनन् स्वास्थ्य सचेतना अभियान संचालन गरेको छ ।
संघले किशोर किशोरी तथा युवालाई लक्षित गरी विद्यालय र कलेजमा अभियान संचालन गर्ने योजना अनुसार कार्यक्रम जारी राखेको सभापति नवीन सिग्देलले जानकारी दिनुभयो ।
कार्यक्रम पोखरा महानगरपालिका वडा नं २ का वडा अध्यक्ष दिवसमान प्रधानाङ्गले उद्घाटन गर्नुभएको थियो । कार्यक्रममा बोल्दै वडा अध्यक्ष प्रधानाङ्गले सम्वदेनशील उमेर समूह छनोट गरी कार्यक्रम संचालन गरिनु प्रशंसनीय भएको बताउनुभयो ।
वडा सदस्य गोमा सुवेदीले स्थानीय सरकारले यस्ता कार्यक्रमलाई प्राथमिकता दिनुपर्ने उल्लेख गर्नुभयो ।
विन्ध्यवासिनी माविका प्रधानध्यापक बसन्त पाण्डेले यो अभियानमा शिक्षा र स्वास्थ्य दुवै विषय जोडिएका निकै उपयोगी भएको बताउनुभयो ।
कार्यक्रममा नेपाल परिवार नियोजन संघ कास्कीका कोषाध्यक्ष विष्णु प्रसाद दाहाल, बरिष्ठ शाखा प्रवन्धक नब राज तिवारी र कर्मचारी सुरज चौधरीले सहजिकरण गर्नुभएको थियो ।
नेपाल परिवार नियोजन संघ कास्कीका सभापति नवीन सिग्देललको अध्यक्षतामा भएको कार्यक्रम बरिष्ठ शाखा प्रवन्धक नब राज तिवारीले संचालन गर्नुभएको थियो ।
पोखरा, २० कात्र्तिक ।
पर्यटकीय शहर पोखरामा केन्द्रीय कार्यालय रहेको टाईम्स एजुकेशनल कन्सल्ट्यान्सीले अव लुम्बिनी प्रदेशको बुटवलबाट पनि सेवा दिने भएको छ ।
अष्ट्रेलिया, वेलायत, अमेरिका, फ्रान्सलगायत देशका प्रख्यात विश्वविद्यालयहरुमा अध्ययनका लागि नेपाली विद्यार्थीलाई सहजीकरण गरिरहेको टाईम्सले यसअघि काठमाडौंबाटसमेत सेवा सञ्चालन गरिसकेको छ । दोस्रो शाखाको रुपमा बुटवलको ट्राफिक चोकबाट छिट्टै सेवा सञ्चालन गरिने सञ्चालक प्रेम सुवेदीले बताए ।
बुटवल तथा यस आसपासमा रहेका अध्ययनका लागि विदेश जान चाहने विद्यार्थीको सहजीकरणका लागि शाखा बिस्तार गरिएको सुवेदीको भनाई छ । शाखामा अन्यत्र जस्तै विदेश अध्ययनका लागि आवस्यक पर्ने आइएलटीस, पीटीई तथा फ्रेन्च भाषाका कक्षाहरु पनि संचालन हुने छन् । बुटवल शाखा उद्घाटन अवसरमा पहिलो हप्तामा भर्ना हुने विद्यार्थीलाई आइएलटीस, पीटिई तथा फ्रेन्च भाषाका सवै कक्षाहरु निशुल्क हुने सुवेदीले जनाए ।
बुटवल शाखाका व्यवस्थापक विशाल वरालका अनुसार विभिन्न देशहरुमा अध्यनका लागि जान चाहने विद्यार्थीलाई शैक्षिक परामर्श र सहजीकरण गरिनेछ । विद्यार्थीको चाहना र आवश्यकता अनुसार परामर्श प्रदान गरिने तथा बुटवल तथा आसपासका विद्यार्थीको सहजताका लागि कन्सल्ट्यान्सी सञ्चालन गर्न लागिएको उनको भनाई छ । विदेश अध्ययन गरेर आर्जन गरेको ज्ञान, सीप र शिक्षालाई देश विकासमा लगाउनका लागि विद्यार्थीलाई अध्ययन पश्चात नेपाल फर्कन अभियान पनि संंचालन गरिरहेको सञ्चालक सुवेदीले बताए । बुटवलमा आगामी हप्तादेखि सेवा सुरु हुनेछ ।
व्यवस्थापक वरालका अनुसार अधिकांश नेपाली विद्यार्थी लहैलहै र धेरै कुरा नबुझी विदेश जाँदा दुःख पाउने गरेकोले त्यो अवस्था नहोस् भन्ने उद्देश्य टाईम्सले राखेको छ । सबै प्रक्रिया बुझ्नु पर्ने र त्यसका लागि अभिभावकले पनि पूर्ण जानकारी लिन आवश्यक रहेको उनको भनाई छ ।
काठमाण्डौँ, २० कात्र्तिक ।
नव नियुक्त यूवा तथा खेलकुद मन्त्री बब्लु गुप्तासंग नेपाल अटोमोबाइल्स एसोसिएसनका प्रतिनिधिहरूले बिहिवार मन्त्रालयमा भेट गरी बधाइ सहितको सुझावपत्र पेश गरेका छन् ।
संघका मार्शल एण्ड ट्रेनिंग कमिसनका सचिव आशिष रौनियार र ई–स्पोर्टस कमिसनका सचिव तथा स्पोर्टस एण्ड इभेन्ट अफिसर अंकित भण्डारी सहितको टिमले संघको तर्फबाट बधाइ दिँदै नेपालमा मोटरस्पोट्र्स र साहसिक खेलकुदको विकासका लागि ठोस नीति, कार्यक्रम र संरचनागत सुधारका सुझावहरू समेटिएको पत्र बुझाएका थिए ।
सो अवसरमा संघका प्रतिनिधिहरूले युवा तथा खेलकुद मन्त्रालयले साँच्चै ‘युवा सोच र साहसिक दृष्टि’ भएको मन्त्री पाएकोमा खुशी व्यक्त गर्दै नेपालका साहसिक तथा पर्यटकीय खेलकुद क्षेत्रले ठूलो अपेक्षा गरेको बताए ।
उनीहरूले नेपाली खेलकुदलाई साँच्चिकै व्यवस्थित, व्यवसायिक र आशालाग्दो बनाउने मन्त्रालयको अभियानमा नेपाल अटोमोबाईल्स एसोसिएसनको सधैं साथ सहयोग र समर्थन प्रतिवद्धता व्यक्त गरे ।
संघको तर्फबाट सुझाब पत्र बुझ्दै मन्त्री गुप्ताले सुझाव अत्यन्त व्यवस्थित, व्यावसायिक र दूरदर्शी रहेको बताउँदै, “मन्त्रालयले यति गहिरो र व्यावहारिक सुझाव पहिलो पटक पाएको हो,” भन्दै संघ, खेलाडी र अफिसियलहरूको सुझावहरूलाई आत्मसाथ गर्ने बताउनुभयो ।
संघको तर्फबाट साच्चै युवा खेलाडी तथा अफिसियल मार्फत प्राप्त सुझावले युबा वर्गमा हौसला पुग्ने बताउनुभयो ।
पोखरा, २० कात्तिक ।
पोखराको नयाँबजारमा रहेको पोखरा बचत तथा ऋण सहकारी संस्थाको रकम हिनामिना गरेकाे आरोपमा बुधबार अध्यक्षसहित ७ जना पक्राउ परेका छन् । सहकारीको ८८ करोड ७० लाख रुपैयाँ रकम हिनामिना गरेकाे आराेपमा उनीहरुलाई कास्की प्रहरीले पक्राउ गरेकाे हाे ।
सहकारीका अध्यक्ष सुरेन्द्रबहादुर गोदार, व्यवस्थापक भीष्मप्रसाद गुरुङ, उपाध्यक्ष शम्भुराज बास्तोला, सचिव दिलबहादुर केसी खत्री, ऋण संयोजकसमेत रहेका कोषाध्यक्ष हिरामणि दाहाल, सञ्चालक समितिका पूर्वसचिव ईन्द्रप्रसाद द्वा र सञ्चालक समिति सदस्य दोर्जे तामाङ पक्राउ परेकाे प्रहरीले बताएकाे छ ।
प्रहरीले जरुरी पक्राउ पुर्जीका आधारमा उनीहरूलाई पक्राउ गरी अनुसन्धान थालेको हो । उनीलाई जिल्ला अदालत कास्कीबाट म्याद थप गरेर अनुसन्धान थालिएको छ ।
काठमाण्डौँ, १९ कात्र्तिक ।
आईसीसी पुरुष क्रिकेट विश्वकप लिग–२ अन्तर्गत युनाइटेड अरब इमिरेट्स (यूएई) मा भएको त्रिदेशीय श्रृंखलामा नेपाल जितविहीन बनेको छ। बुधबार दुबईको यूएईमा सम्पन्न अन्तिम खेलमा घरेलु टिम यूएईसँगको चार विकेटको हारसँगै नेपालको यात्रा जितविहीन हुँदै टुंगिएको हो।
नेपालले प्रस्तुत गरेको २४० रनको लक्ष्य यूएईले ४९.१ ओभरमा ६ विकेट गुमाएर पूरा गर्यो। यूएईको जितमा मुहम्मद सहदादले सर्वाधिक ९६ रन बनाए। उनले १२३ बलमा ६ चौका र तीन छक्का प्रहार गरे।
यस्तै, मुहम्मद वसिमले ७३ बलमा चार चौका र तीन छक्कासहित ७६ रन थपे। यी दुईले ६८-३ को स्थितीबाट १४७ रनको साझेदारी गर्दै यूएईलाई जितनजिक पूर्याएका थिए। सोहेब खानले २९, कप्तान आलिसान सराफुले १८ र हर्षिक कौसिकले १३ रन बनाए।
नेपालका करण केसीले तीन विकेट लिए। नन्दन यादव, ललित राजवंशी र सन्दीप लामिछानेको नाममा समान एक विकेट रह्यो। त्यसअघि टस हारेर ब्याटिङमा आएको नेपालले निर्धारित ५० ओभरमा नौ विकेट गुमाएर २३९ रनको योगफल खडा गरेको थियो।
यूएईविरुद्ध नेपालका भीम सार्कीले सर्वाधिक ४८ रन बनाए। ६८ बल खेलेका उनले सात चौका प्रहार गरे। मध्यक्रमका ब्याटर कुशल मल्लले ५१ बलमा एक चौका र तीन छक्कासहित ४६ रन बनाए।
ओपनर आसिफ सेखले ४८ बलमा चार चौकासहित ३४ रन बनाए। दीपेन्द्रसिंह ऐरीले ३७ रन थप्दा आरिफ सेखको नाममा ३० रन रह्यो। १०औँ नम्बरमा ब्याटिङका निम्ति आएका सन्दीप लामिछानले अविजित १५ रन जोडे। कुशल मल्ल र सन्दीप लामिछानले नवौँ विकेटका निम्ति ४२ रनको साझेदारी गरेका थिए।
यो श्रृंखलाको यसअघिका तीन खेलमा नेपालले अमेरिकासँग १०६, दोस्रो खेलमा यूएईविरुद्ध पाँच र तेस्रो खेलमा पुनः अमेरिकासँग चार विकेटको हार बेहोरेको थियो।
काठमाण्डौँ, १९ कात्र्तिक ।
सुडानको सेना नियन्त्रित शहर अल-ओबेद नजिकै एक अन्त्येष्टि जुलुसमा ड्रोन आक्रमण हुँदा कम्तीमा ४० जनाको मृत्यु भएको अधिकारी तथा कार्यकर्ताहरूले बताएका छन्।
यो आक्रमण अल-लुवैब गाउँमा भएको थियो, जहाँ मानिसहरू शोक समारोहको लागि पालमा भेला भएका थिए।
अधिकारीहरूले आक्रमणको लागि अर्धसैनिक र्यापिड सपोर्ट फोर्स (आरएसएसफ) लाई दोष दिएका छन्, यद्यपि आरएसएफले अहिलेसम्म कुनै टिप्पणी गरेको छैन।
राजधानी खार्तुम र डार्फर क्षेत्रलाई जोड्ने प्रमुख सहर अल-ओबेदमा अस्पताल पुग्नुअघि नै धेरैको मृत्यु भयो।
महत्वपूर्ण तेल भण्डार भएको कोर्डोफान क्षेत्रमा लडाईं बढेको छ। आरएसएफले बारा शहर कब्जा गरेपछि, गत हप्ता लगभग २०,००० मानिसहरू एल-ओबेदमा भागे।
निजी क्षेत्रका मागप्रति दुवै मन्त्री सकारात्मक
पोखरा,१९ कात्तिक ।
पोखरा उद्योग वाणिज्य संघका अध्यक्ष गोकर्ण कार्की नेतृत्वको प्रतिनिधिमण्डलले अर्थमन्त्री रामेश्वर खनाल र भूमि व्यवस्था,सहकारी तथा गरिबी निवारणमन्त्री अनिलकुमार सिन्हासमक्ष व्यावसायिक वातावरण निर्माण एवं अर्थतन्त्रलाई चलायमान बनाउन विभिन्न सुझावहरु पेश गरेको छ ।
अध्यक्ष कार्कीका अनुसार दुवै मन्त्रीसमक्ष जेन–जी आन्दोलनको क्रममा भौतिक र मानशिक क्षति व्यहोरेका व्यवसायीका निम्ति घोषित राहत प्याकेज तत्काल कार्यान्वयनमा ल्याउन, आन्दोलनको क्रममा आगजनी, लुटपाट र तोडफोडमा संलग्नहरुलाई कारवाहीको दायरामा ल्याउन विशेष जोड दिएको थियो ।
‘हामीले विशेष गरी आन्दोलनपछिको परिस्थिति, व्यवसायीहरुको गिरेको मनोवल,लगानी पलायनको चिन्ता,अर्थतन्त्र सुधारका उपायहरुबारे आफ्नोतर्फबाट सुझाव दियौँ,’अध्यक्ष कार्कीले भने,‘मन्त्रीज्यूहरु हाम्रो कुरामा सकारात्मक हुनुभयो र सरकार व्यावसायिक वातावरण निर्माणको दिशामा अगाडि बढेको जानकारी गराउनु भयो ।’
यस्तै प्रतिनिधिमण्डलले कोरोला नाकाको दीगो संचालनका निम्ति भौतिक पूर्वाधार निर्माण,पोखरा अन्तर्राष्ट्रिय विमानस्थलबाट अन्तर्राष्ट्रिय उडानका निम्ति सार्थक पहल,पोखरामा नयाँ औद्योगिक क्षेत्रको स्थापना तथा अहिलेको औद्योगिक क्षेत्रमा देखिएका समस्याको समाधानको विषयमा पनि ध्यानाकर्षण गराएको थियो ।
‘औद्योगिक क्षेत्र व्यवस्थापनमा भएको अति राजनीतिकरण र नियुक्तिबाट सिर्जित समस्याबारे पनि हामीले कुरा राख्यौँ,’अध्यक्ष कार्कीले भने,‘यस्तै न्यून बिजीकीकरण भन्सार छली,अवैध व्यापार भन्सार बिन्दुमै नियन्त्रणको कुरा पनि हामीले उठायौँ ।’
प्रतिनिधिमण्डलले कर्जा र चल्ती खाताको प्रावधानले कर्जा उपयोगमा परेको समस्याबारे पनि अवगत गराइएको थियो ।
संघकी महासचिव शोभा गौतमका अनुसार सिद्धार्थ राजमार्गको स्तरोन्नति र पोखरामा सुख्खा बन्दरगाह निर्माणबारे पनि दुवै मन्त्रीको ध्यानाकर्षण गराइएको थियो । प्रतिनिधिमण्डलमा पोखराका विभिन्न व्यावसायिक संघ÷संस्थाका प्रतिनिधिहरुको सहभागिता रहेको थियो ।
प्रतिनिधिमण्डलमा रहेका पोखरा उद्योग वाणिज्य संघका पूर्वअध्यक्ष विश्वशंकर पालिखेले यो सरकारसँग जनताले ठूलो अपेक्षा राखेको बताउँदै सुशासन र व्यावसायिक वातावरण निर्माणका निम्ति निजी क्षेत्रले सरकारलाई सदा सहयोग गर्ने धारणा राखे ।
पोखरा, १९ कात्र्तिक ।
मिति २०८२।०५।२४ गते आन्दोलन, तोडफोड तथा आगजनीको क्रममा प्रहरी कार्यालयमा राखिएका सवारी साधन चोरी गरी चलाई रहेको भन्ने सूचनाको आधारमा वडा प्रहरी कार्यालय बैदाम कास्कीबाट खटिएको प्रहरी टोलीले जिल्ला ट्राफिक प्रहरी कार्यालय कास्कीको परिसरमा अनुसन्धान तथा कारवाहीको लागि राखिएको ईन्जिन नम्बर MC20AEKGK00393, चेसिस नम्बर MBLLDU0L0KCK00274 भएको ग १६ प १४५५ नम्बरको कालो रंगको X PLUS 200 मो.सा. चोरी गरी चलाई रहेको अवस्थामाजिल्ला कास्की पोखरा महानगरपालिका वडा नं. १७ दोविल्ला बस्ने वर्ष २४ को सुवास तामाङलाई मो.सा. सहित नियन्त्रणमा लिई थप अनुसन्धान प्रकृया अगाडी बढाईएको ।
पोखरा, १९ कात्र्तिक ।
विभिन्न मिति र स्थानबाट चोरी भएका मोटरसाईकल तथा स्कुटरहरु खोजतलास तथा अनुसन्धान गर्ने क्रममा यस जिल्ला प्रहरी कार्यालय कास्की मातहत ईलाका प्रहरी कार्यालय शिशुवा कास्कीबाट खटिएको प्रहरी टोलिले चोरी भएका ग ९ प ८७६१ नं.को स्कुटर र ग १५ प ५२३७ नं.को स्कुटर सहित चोरीमा संलग्न निम्न ४ जना अभियुक्तहरु र वडा प्रहरी कार्यालय रामबजार कास्कीबाट खटिई गएको प्रहरी टोलिले ग ४ प ७६८४ नं.को चोरी भएको स्कुटर सहित १ जना मानिसलाई नियन्त्रणमा लिई थप अनुसन्धान कार्य
अगाडी बढाइएको ।
निम्न :-
1. जिल्ला कास्की पोखरा महानगरपालिका वडा नं. ३३ बस्ने वर्ष २१ को शेर बहादुर पुन
मगर,
2. जिल्ला कास्की पोखरा म.न.पा. वडा नं. ५ बस्ने वर्ष २५ को अजय नेपाली,
3. जिल्ला कास्की पोखरा म.न.पा. वडा नं.१० बस्ने वर्ष २१ को सुशिल गुरुङ,
4. जिल्ला कास्की पोखरा म.न.पा वडा नं.११ बस्ने वर्ष २० को सुदिप परियार,
5. जिल्ला कास्की पोखरा म.न.पा. वडा नं. १३ काँहुँखोला बस्ने वर्ष २७ को रोशन
परियार
पोखरा, १८ कात्र्तिक ।
पोखरा न्युरोडका ब्यवसायीहरुले एकतर्फी पार्किङका कारण व्यवसायीहरु पलायन हुने क्रम बढेको भन्दै सम्बन्धित निकायको ध्यानाकर्षण गराएका छन । पोखरा सभागृह देखि बिपी चोक सम्म पश्चिम साइडका झण्डै २ सय व्यवसायीहरुले न्युरोडमा एकतर्फी पार्किङका कारण व्यवसाय सञ्चालनमा अफठेरो परेका कारण पलायन हुने क्रम बढेको भन्दै जिल्ला प्रशासन कार्यालय कास्की, जिल्ला ट्राफिक प्रहरी कार्यालय कास्की, पोखरा महानगरपालिका वडा नं ८ र ९ का कार्यालयमा पुगी ध्यानाकर्षण सहित ज्ञापन पत्र बुझाएका छन ।
न्युरोड व्यवसायी समितिका संयोजक प्रदिप राज भण्डारीले पोखराको न्युरोडमा एकतर्फी पार्किङका कारण व्यवसाय पलायन हुने, सटर खाली हुने, सटर खाली रहने अवस्था आइपरेको बताए ।
भुकम्प, नाकाबन्दी, कोरोना महामारी पश्चातको आर्थिक मन्दीको चपेटामा परेका न्युरोडका व्यवसायीहरु एकतफी पार्किङका कारण धेरै व्यवसायीहरु पलायन हुने अवस्थामा पुगेको र त्यसलाई रोक्नका लागि सभागृह देखि बिपि चोक सम्म पश्चिम तर्फका घरबेटी र व्यवसायीको भेलाले दुवै साइड पार्किङका लागि सहज बातावरण बनाइदिन कास्कीका प्रमुख जिल्ला अधिकारी रुद्रादेवी शर्मा, जिल्ला ट्राफिक प्रहरी कार्यालय कास्कीका प्रमुख सुजित कुमार देवकोटा, पोखरा महानगरपालिका वडा नं ८ का अध्यक्ष रुद्रनाथ बराल र पोखरा महानगरपालिका वडा नं ९ का अध्यक्ष दिपेन्द्र मर्सानीलाई ज्ञापन पत्र बुझाएका हुन ।
व्यवसायीहरुले पोखरा महानगरका प्रमुख धनराज आचार्यलाई समेत ज्ञापनपत्र बुझाउने कार्यक्रम रहेको न्युरोड व्यवसायी समितिका संयोजक प्रदिप राज भण्डारीले जानकारी दिए ।





