काठमाडौं, ४ कात्तिक।
नेपाल विद्युत प्राधिकरणले तिहारको सार्वजनिक बिदाको दिन पनि उद्योगहरुले बक्यौता रकम तिर्न सक्ने जनाएको छ ।
प्राधिकरणका कार्यकारी निर्देशक मनोज सिलवालले तिहारको सार्वजनिक बिदामा पनि उद्योगको बक्यौता रकम तिर्न सक्ने गरी काउन्टरको व्यवस्था गरिएको जानकारी दिए ।
किस्ताको सुविधा लिएर पहिलो किस्ता तिरेमा जुनसकै समयमा काटिएको लाइन जोडिने उनले बताए ।
विद्युत् प्राधिकरणले दीपावली सकिएलगत्तै बिजुलीको लाइन काट्न सुरु गरिसकेको छ । डेडिकेटेड तथा ट्रंक लाइन विवाद कायमै रहेका बेला प्राधिकरणले आज बिहानै चार कम्पनीको बिजुलीको लाइन काटेको छ ।
प्राधिकरणका अनुसार घोराही सिमेन्ट (दाङ), अर्घाखाँची सिमेन्ट (लुम्बिनी), त्रिवेणी स्पिनिङ (परवानीपुर) र जगदम्बा स्टील (अमलेखगञ्ज)को बिजुलीको लाइन काटिएको हो ।
पोखरा, २ कात्तिक ।
सहारा क्लब पोखराले यस वर्ष च्यारिटी डिनर नाइट कार्यक्रम गर्ने भएको छ । क्लबद्वारा पोखरा–१७, दोबिल्लामा संचालित सूर्यबहादुर केसी स्मृति सहारा आवासीय फुटबल एकेडेमी सहयोगार्थ उक्त कार्यक्रम गर्न लागिएको क्लब अध्यक्ष केशवबहादुर थापाले जानकारी दिए ।
तिहारमा हरेक वर्ष आयोजित हुँदै आएको देउसी भैलो कार्यक्रम यसपालि स्थगित गरी च्यारिटी डिनर नाइट कार्यक्रम गर्न लागिएको उनले प्रस्ट पारे । कार्यक्रम कात्तिक १४ गते शुक्रबार पोखरा माटेपानीस्थित एस.आर.केसी ब्याङ्क्युटमा हुनेछ । जसमा स्थानीय कलाकारहरुले गायनका साथै हिमाली सांस्कृतिक परिवारले नृत्य प्रस्तुत गर्नेछ ।
एकेडेमी सहयोगार्थ भएकाले कार्यक्रममा सहभागी हुन चाहनेले जनही २५ सय बुझाउनुपर्नेछ । त्यसवापत् खाना, खाना तथा विभिन्न सांस्कृतिक कार्यक्रम अवलोकन गर्न पाइनेछ । कार्यक्रमबाट बचत हुन आएको रकम एकेडेमीमा खर्चिने क्लब अध्यक्ष थापाले बताए ।
सहारा एकेडेमीका हाल चौथो ब्याचमा १४ जिल्लाका कठिन परिस्थिति तथा विपन्न वर्गका ३० जना बालकहरु आश्रित छन् । उनीहरुलाई क्लबले निःशुल्क आवासीय सुविधासहित शिक्षादीक्षा तथा फुटबल प्रशिक्षण दिँदैआएको छ ।
पोखरा, ०२ कात्र्तिक ।
धारिलो हतियार देखाई विदेशी नागरिकलाई अभद्र व्यवहार गर्ने दुई जना युवालाई प्रहरीले पक्राउ गरेको छ । आइतबार बिहान करिब ९ः१० बजे पोखरा महानगरपालिका–२२, अनदु जंगल नजिक सार्वजनिक स्थानमा जर्मनी नागरिक ६७ वर्षीय एएनएस पिटर मार्टिनमाथि खुकुरी देखाउदै हातपात सहित दुव्यवहार गरेको आरोपमा दुई जना युवालाई पक्राउ गरिएको कास्की प्रहरीले पोखराक्लिकलाई जनाएको छ ।
पक्राउ परेकामध्ये कास्की माछापुच्छ्रे गाउँपालिका–८ का २४ वर्षीय नविन बिक र तनहुँ व्यास नगरपालिका–५ का २१ वर्षीय विशाल दर्लामी रहेका छन्। उनीहरूविरुद्ध सार्वजनिक हित, स्वास्थ्य, सुरक्षा, सुविधा र नैतिकता विरुद्धको कसुर अन्तर्गत अभद्र व्यवहार मुद्दामा जिल्ला प्रशासन कार्यालय कास्कीबाट १० दिनको म्याद थप गरी अनुसन्धान अगाडि बढाइएको प्रहरीले जनाएको छ । मार्टिन एक्लै हिँडिरहेका बेला दुई युवाले खुकुरी देखाउँदै हातपात सहित दुव्यवहार गरेको जिल्ला प्रहरी कार्यालय कास्कीका सूचना अधिकारी हरिबहादुर बस्नेतले बताए । मार्टिनले उनीहरु बिरुद्ध प्रतीकार गरी भाग्न सफल भई प्रहरीलाई खबर गरे पश्चात वडा प्रहरी कार्यालय बैदामबाट खटिएको टोलीले ती युवकहरूलाई धारिलो हतियार सहित नियन्त्रणमा लिएको बस्नेले जनाए ।
प्रहरीले आम नागरिक सहित पर्यटकको सुरक्षालाई प्राथमिकतामा राख्दै पर्यटक वा सर्वसाधारणमाथि डर, धम्की, लुटपाट वा जबरजस्ती व्यवहार देखिए तुरुन्त प्रहरीलाई जानकारी गराउन सबैलाई आग्रह गरेको छ ।
उमा आलेमगर
पोखरा, ०२ कात्र्तिक ।
पोखरा, ०२ कात्र्तिक ।
नेपाल विविधता र संस्कृतिले भरिएको देश हो। यहाँका पर्वहरूले केवल धार्मिक श्रद्धा मात्र होइन, सामाजिक एकता, पारिवारिक स्नेह र मानवीय भावनाको पनि अभिव्यक्ति गर्छन्। तीमध्ये तिहार सबैभन्दा मनमोहक, रमाइलो र अर्थपूर्ण पर्व हो। यो पर्वलाई दीपावली, यमपञ्चक वा स्वन्ती पनि भनिन्छ। हिन्दु पात्रोअनुसार कार्तिक महिनाको कृष्ण पक्षबाट सुरु हुने यो पर्व पाँच दिनसम्म मनाइन्छ।
तिहारको विशेषता के हो भने यसले मानव र जनावरबीचको सम्बन्ध, दिदीबहिनी र दाजुभाइबीचको स्नेह, र देवी लक्ष्मीप्रतिको श्रद्धा — यी सबैलाई एकैसाथ जोड्छ। तिहार उज्यालोको माध्यमबाट अन्धकारमाथि प्रकाशको विजयको प्रतीक हो।
पहिलो दिन : काग तिहार — सन्देशवाहकको सम्मानतिहारको पहिलो दिनलाई काग तिहार भनिन्छ। कागलाई सन्देशवाहकको प्रतीक मानिन्छ। प्राचीन कथनअनुसार काग मृत्यु र समाचारको दूत हो, त्यसैले यस दिन कागलाई भोजन चढाइन्छ, माला लगाइन्छ, र घरको छानामा अन्न राखिन्छ। यसरी कागलाई सम्मान गरेर हामी जीवनका सन्देश र चेतनाप्रतिको सम्मान गर्छौं।
दोस्रो दिन : कुकुर तिहार — निष्ठा र सुरक्षाको प्रतीकदोस्रो दिन कुकुर तिहार मनाइन्छ। कुकुर मानवको सबैभन्दा नजिकको र विश्वासिलो साथी हो। यस दिन कुकुरलाई टीका, माला र स्वादिष्ट भोजन दिइन्छ। यो दिवसले हामीलाई स्मरण गराउँछ कि प्राणीहरू पनि हाम्रो संसारका हिस्सा हुन्, र उनीहरूलाई माया र कदर गर्नुपर्छ। नेपाली सेनाको तालिमप्राप्त कुकुरहरूलाई पनि विशेष सम्मानका साथ पूजा गरिन्छ।
तेस्रो दिन : लक्ष्मी पूजा — धन र समृद्धिको आराधनातिहारको तेस्रो दिन सबैभन्दा झिलिमिली र रमाइलो मानिन्छ — लक्ष्मी पूजा। यो दिन घरघरमा सरसफाइ गरिन्छ, घरको ढोका, झ्याल र आँगनमा रङ्गोली बनाइन्छ, र दियो–बत्तीले घर झलमल पारिन्छ। देवी लक्ष्मीलाई घरभित्र स्वागत गर्न “आओ लक्ष्मी आओ” भन्दै प्रवेशद्वारमा तेलका दियोहरू बालिन्छ।
यस दिनको साँझ बजारहरू उज्यालोले सजिन्छन्, बालबालिकाले देउसी खेल्छन् र युवाहरूले देउसी–भैलो गाएर हर्षोल्लास प्रकट गर्छन्। आर्थिक दृष्टिले पनि यो दिन महत्वपूर्ण हुन्छ, किनकि व्यापारीहरू आफ्नो लेखापोत्रको नयाँ सुरुवात गर्छन्। लक्ष्मी पूजाले केवल धनको मात्र होइन, परिश्रम र श्रमको पनि सम्मान गर्छ।
चौथो दिन : गो पूजा, गोरू पूजा र म्ह पूजाचौथो दिन विभिन्न समुदायमा फरक–फरक रूपमा मनाइन्छ। हिन्दु परिवारमा यो दिन गाई पूजा वा गो पूजाको रूपमा मनाइन्छ। गाईलाई आमा समान मानिन्छ — किनभने उसले दूध दिन्छ, कृषिमा उपयोगी हुन्छ र धार्मिक दृष्टिले पनि पवित्र प्राणी हो। त्यसैले यस दिन गाईलाई माला लगाइन्छ, टीका लगाइन्छ र मीठा परिकार खान दिइन्छ।
कृषक समुदायमा यो दिन गोरू पूजाको रूपमा मनाइन्छ। खेत जोत्न सहयोग गर्ने गोरूलाई सम्मान गर्न यो चलन बनेको हो। यसले श्रम र कृषिप्रतिको आदरको भावना व्यक्त गर्छ।
नेवार समुदायमा भने यो दिनलाई म्ह पूजा भनिन्छ, जसको अर्थ ‘आत्माको पूजा’ हो। यस अवसरमा मानिसले आफ्नै शरीर र आत्माको आराधना गर्छन्, र आफ्नै अस्तित्वप्रति कृतज्ञता व्यक्त गर्छन्। यो दिन आत्म–पहिचान र आत्म–समर्पणको प्रतीक मानिन्छ।
पाँचौँ दिन : भाइटीका — दाजुभाइ र दिदीबहिनीको स्नेहको पर्वतिहारको अन्तिम दिन सबैभन्दा भावनात्मक र प्रतीकात्मक दिन हो — भाइटीका। यो दिन दिदीबहिनीहरूले आफ्ना दाजुभाइको दीर्घायु र सुख–समृद्धिका लागि पूजा गर्छन्। दाजुभाइको निधारमा सप्तरङ्गी टीका लगाइन्छ, माला र फूलले सजाइन्छ, र मिठा परिकार खान दिइन्छ।
कथनअनुसार, यमराजले आफ्नी बहिनी यमुनाको घरमा गएर टीका लगाएको दिनबाट नै भाइटीकाको चलन सुरु भएको हो। त्यसैले यसलाई यम द्वितीया पनि भनिन्छ। यो दिन दाजुभाइले दिदीबहिनीलाई उपहार दिन्छन् र पारिवारिक स्नेह अझ गहिरो बनाउँछन्।
देउसी–भैलो र सांस्कृतिक एकतातिहारको अर्को सुन्दर पक्ष भनेको देउसी र भैलो खेल्ने परम्परा हो। गाउँ–शहरका बालबालिका, युवायुवती समूह बनाएर घर–घरमा गएर देउसी–भैलो गाउँछन्, नाच्छन् र मनोरञ्जन गर्छन्। “भैलो भैलो रानीको भेलो” र “देउसी रे” जस्ता गीतहरूले वातावरण झनै रमाइलो बनाउँछ। यसरी देउसी–भैलोले समुदायबीच सहकार्य र एकताको सन्देश फैलाउँछ।
तिहारको सामाजिक र आध्यात्मिक सन्देशतिहार केवल धार्मिक पर्व होइन; यो मानवीय मूल्यहरूको उत्सव हो। यसले हामीलाई सफाइ, सहकार्य, प्रेम, दया र कृतज्ञता सिकाउँछ।
काग तिहारले सन्देश र चेतनाको सम्मान गर्न सिखाउँछ।
कुकुर तिहारले निष्ठा र मित्रताको महत्त्व सम्झाउँछ।
लक्ष्मी पूजाले परिश्रम र अनुशासनको मूल्य दर्शाउँछ।
गो पूजाले मातृत्व र श्रमको सम्मान गर्छ।
भाइटीकाले पारिवारिक प्रेम र एकताको भावना बलियो बनाउँछ।
तिहारको उज्यालोले हामीलाई भित्रको अन्धकार हटाएर मनमा सकारात्मकता ल्याउन प्रेरित गर्छ।
आधुनिक युगमा तिहारको रूपान्तरणआजको आधुनिक जीवनशैलीले तिहारको स्वरूप केही परिवर्तन गरेको छ। बिजुलीका बत्तीहरूले परम्परागत तेलका दियोहरूलाई विस्थापित गर्दैछन्, र डिजिटल माध्यमहरूले देउसी–भैलोको ठाउँ केही हदसम्म लिएका छन्। तर यसको मूल आत्मा — उज्यालो, स्नेह र सम्मान — अझै उस्तै छ।
आज पनि घर–घरमा दीप झलमल हुन्छ, पारिवारिक भेटघाटहरू हुन्छन्, र सामाजिक सन्देशहरू फैलाइन्छ। वातावरणमै उज्यालो, संगीत र मिठास भरिन्छ।
निष्कर्षतिहार उज्यालो मात्र होइन, सम्बन्धहरूको उज्यालो हो। यो पर्वले हामीलाई सम्झाउँछ कि साँचो समृद्धि धनमा होइन, मनको प्रकाशमा हुन्छ। परिवारको माया, साथीको साथ, प्रकृतिप्रतिको कृतज्ञता र आत्माको सम्मान — यही तिहारको साँचो सन्देश हो।
यस वर्ष पनि हामीले दियो बाल्दा केवल घर होइन, मन पनि उज्यालो बनाऔं। यही हो तिहारको वास्तविक अर्थ — अन्धकारमाथि प्रकाशको विजय, र विभाजनमाथि प्रेमको जय।
काठमाडौं, २ कात्तिक ।
नेपाली बजारमा आज आइतबार सुनको मूल्य तोलामा ४ हजार ८०० रुपैयाँ घटेको छ । सुनको मूल्य साताको कारोबारको पहिलो दिन घटेर २ लाख ५३ हजार २०० रुपैयाँ कायम भएको नेपाल सुनचाँदी व्यवसायी महासंघले जनाएको छ ।
महासंघका अनुसार शुक्रबार हालसम्मकै उच्च बिन्दुमा कारोबार भएको थियो । सो दिन छापावाल सुन तोलामा २ लाख ५८ हजार रुपैयाँ पुगेको थियो ।
यस्तै चाँदीको मूल्य पनि आइतबार घटेको छ । आइतबार तोलामा ३ हजार २७५ रुपैयाँ कायम भएको महासंघको भनाइ छ । शुक्रबार तोलामा ३ हजार ३५० रुपैयाँ कायम भएको थियो ।
पोखरा।
भदौ ,२३ र २४ गतेको जेन जी आन्दोलनमा कास्की कारागार बाट फरार रहेका थप ८१ जना फरार कैदी तथा थुनुवाहरु पक्राउ परेका छन । कास्की कारागारले फरार रहेका कैदी तथा थुनूवा लाई आश्विन २० गते भित्र स्वस्फूर्त कारागारमा फर्किन अपिल गरेको थियो ।
कारागारले जारी गरेको मिति भित्र हाजिर नभए पश्चात् जिल्ला प्रहरी कार्यालय कास्कीले खोजतलास गरी बिभिन्न मुद्दाका ८१ जना फरार कैदी तथा थुनुवाहरुलाई पक्राउ गरी कारागार कार्यालय कास्कीमा, बुझाइएको छ । अन्य फरारहरुको खोजतलास कार्य जारी रहेको प्रहरीले बताएको छ ।
पक्राउ पर्नेमा जबरजस्ती करणी मुद्दाका १६ जना, लागू औषध मुद्दाका– १६ जना, चोरी मुद्दाका २५ जना, कर्तव्य ज्यान मुद्दाका ८ जना, ज्यान मार्ने उद्योग मुद्दाका ९ जना,अभद्र व्यवहार मुद्दाका ४ जना, सवारी अंगभंग मुद्दाका १ जना, कुटपिटबाट अंगभंग मुद्दाका– १ जना र मानव वेचविखन मुद्दाका– १ जना रहेको सूचना अधिकारी प्रहरी नायब उपरीक्षक हरी बहादुर बस्नेतले जानकारी दिए ।
काठमाडौं ।
आगामी फागुन २१ गते तय भएको निर्वाचनको तयारीको विषयमा निर्वाचन आयोगले आज राजनीतिक दलका प्रतिनिधिहरुसँग छलफल गर्दैछ । छलफल बिहान साढे ११ बजे आयोगको कार्यालय कान्तिपथमा हुनेछ । निर्वाचन आयोगका प्रवक्ता नारायणप्रसाद भट्टराईका अनुसार संघ, प्रदेश र स्थानीय तहमा प्रतिनिधित्व गरेका दलहरुलाई छलफलमा बोलाइएको छ ।
२९ राजनीतिक दललाई पत्र लेखेर प्रमुख वा प्रतिनिधि पठाइदिन भनिएको छ । ‘निर्वाचन आयोगमा दर्ता भएका र कुनै पनि वडास्तरमा एक जना मात्र जनप्रतिनिधि चुनिएको भए पनि निर्वाचन आयोगमा छलफल र राय परामर्शका लागि पत्र पठाइएको छ,’ उनले भने । आजको छलफलमा आयोगको निर्वाचनको तयारीका सन्दर्भमा प्रशासनिक काम र निर्वाचन तालिकाबारे जानकारी गराउने प्रवक्ता भट्टराईले बताए । उनले भने, ‘हामीले आज हाम्रो तयारीबारे जानकारी दिने र दलहरुबाट सकेसम्म धेरै सल्लाह सुझाव लिने गरी तयारी गरेका छौं ।’ निर्वाचनमा सहभागी हुन चाहने नयाँ दललाई कात्तिक मसान्त अगावै दल दर्ता गरेर प्रमाणपत्र लिइसक्न आयोगले भनेको छ ।
काठमाडौँ।
नेपालबाट तीन महिला र एक पुरुष खेलाडीले छनोटमा प्रतिस्पर्धा गर्नेछन् । महिलातर्फ एरिकाले ६८ केजीमाथि, सविना श्रेष्ठले ५५ केजीमुनी र वर्षा बुढाले ५० केजीमुनी प्रतिस्पर्धा गर्नेछन् भने स्वनिम मानन्धरले पुरुष एकल कातामा आफ्नो कौशल प्रस्तुत गर्नेछन् ।
स्वनिमको स्पर्धामा ४९, एरिकाकोमा ३४, वर्षाकोमा ३८ र सविनाकोमा ४६ प्रतिद्वन्द्वी छन् । यस छनोट प्रतियोगिताको हरेक स्पर्धामा शीर्ष ६ स्थानमा रहने खेलाडी इजिप्टको काइरोमा नोभेम्बर २७ देखि ३० सम्म हुने विश्व कराते च्याम्पियनसिपको २७ औं संस्करणका लागि छनोट हुने छन् ।
छनोटअघि नै हरेक स्पर्धाबाट २४ खेलाडी विश्व च्याम्पियनसिपका लागि छनोट भइसकेका छन् । एक स्पर्धामा ३२ खेलाडी सहभागी हुन पाउने छन् । बाँकी २ खेलाडी विश्वविद्यालय कोटाबाट छानिने छन् । विभिन्न १२ स्पर्धा समावेश छनोटमा ५ सय ४९ खेलाडी सहभागी हुने छन् । नेपालबाट सानुमाया थिङले यसअघि नै इजिप्टमा हुने विश्व कराते च्याम्पियनसिपमा स्थान पक्का गरिसकेकी छन् । उनले महिला एकल कातामा प्रतिस्पर्धा गर्नेछन् ।
नेपाली टोलीको प्रशिक्षकमा कुशल श्रेष्ठ छन् । पेरिसमै अक्टोबर १६ मा हुने प्रशिक्षक परिक्षामा सहभागी हुन अमिर राना पनि टोलीसँगै जाने छन् । उनले टोली व्यवस्थापकको भूमिका पनि निर्वाह गर्ने बताइएको छ । टोलीलाई राष्ट्रिय खेलकुद परिषद् (राखेप) का सदस्य सचिव टंकलाल घिसिङ, राखेपका सदस्य प्रकाशकुमार कुसारी, राष्ट्रिय टिम तयारीका निर्देशक दीपक विष्ट र उप निर्देशक दीपक श्रेष्ठले मंगलबार एक कार्यक्रमबीच बिदाइ गरे ।
काठमाडौँ । सुमन श्रेष्ठले आत्मघाती गोल गरेपछि नेपाल एसिया कप छनोट तेस्रो चरणको मंगलबारको खेलमा भियतनामसँग १–० ले पराजित भएको छ । हो चि मिनको थोङ न्हाट स्टेडियममा भएको खेलमा सुमनले बललाई पाँचौं मिनेटमा आफ्नो पोस्टको दिशा दिएका थिए ।दशरथ रंगशाला फिफा र एएफसीका खेलका लागि अयोग्य भएपछि नेपालले आफ्नो घरको खेलमा भियतनाममा खेलेको हो । छनोटको समूह ‘एफ’ मा नेपालको यो लगातार चौथो हार हो र शून्य अंकमा चार टिममध्ये सबैभन्दा पुछारमा छ । यस नतिजासँगै छनोटमा नेपालको चुनौती समाप्त भएको छ ।
यही समूहको अर्को खेलमा मलेसियाले लाओसलाई ५–१ ले हरायो । मलेसियाको भने यो लगातार चौथो जित हो र टिम १२ अंकसहित समूहको शीर्ष स्थानमा छ । त्यसपछि भियतनाम नौ अंकमा दोस्रो स्थानमा छ । लाओस तीन अंकमा तेस्रो स्थानमा रहेको छ ।
काठमाडौँ । नेकपा एमालेको केन्द्रीय कमिटी बैठक आजदेखि सुरु हुने भएको छ । एमाले प्रचार विभाग प्रमुख राजेन्द्र गौतमका अनुसार बिहान ११ बजे ललितपुरको जावलाखेलमा बैठक सुरु हुनेछ ।
बैठकमा पार्टी अध्यक्ष केपी शर्मा ओलीको समसामयिक राजनीतिक घटनाक्रम समेटिएको राजनीतिक प्रतिवेदन, राजनीतिक प्रस्ताव र विविध विषयमा छलफल गर्ने कार्यसूची छ । आसन्न पार्टीको राष्ट्रिय महाधिवेशनको बारेमा पनि छलफल हुने प्रमुख गौतमले बताए । यसअघि आइतबार भक्तपुरको गुण्डुमा बसेको एमाले सचिवालय बैठकले केन्द्रीय कमिटी बैठक असोज २९, ३० र ३१ गते बस्ने निर्णय गरेको थियो ।बैठकले पार्टीको ११ औँ महाधिवेशन मंसिर अन्तिम साता गर्ने निर्णय गरे पनि मिति र स्थान केन्द्रीय कमिटी बैठकले तय गर्ने बताइएको छ ।
