
पोखरा, २९ भदौ ।
प्राज्ञ नगेन सिंहले २१ वर्ष अघि बनाएको ‘नेपालमा नारीको शासन’ नामको कलाकृतिले यतिखेर चासो र चर्चा कमाएको छ । २०६१ सालमा काठमाडौंको ललितकला क्याम्पसमा बिएफए कम्पोजिसन कक्षामा पानी रङमा बनाइएको यो चित्रले बर्तमानको राजनीतिक परिवेशलाई जीवन्त चित्रण गरेको हो ।यस चित्रलाई तत्कालीन समयमा ठूलो क्यान्भासमा बनाउन प्राज्ञ सिंहलाई गुरु गोविन्दलाल डंगोलले भनेसँगै उहाँले तयार गर्नुभएको हो ।
“राजाको सक्रिय शासनकाल तत्कालीन समयमा दिनदिनै जस्तो आन्दोलनहरू भईराख्थ्यो”, उहाँले भन्नुुभयो, “रत्नपार्कमा त्यो आन्दोलनहरूको क्षणहरू हेर्दा कताकता मेरो मनमा यदी पुरुषहरु शान्त भएर सुत्ने र नारीको नेतृत्वमा शासन भयो भने यो सुन्दर शान्त नेपाल हुन्छ भन्ने मनमा लाग्यो र यो कलाकृति तयार बनाए । ”जम्मा २ फिट ४ इन्च बाइ ५ फिट १० इन्चमा ऐकलेरिक रंगले आँफूले कलाकृति बनाएको बताउँदै उहाँले यसलाई आफ्नो चौथो एकल प्रदर्शनी “माई रिजेक्टेड आर्ट” मा प्रदर्शन गरिएको जानकारी दिनुुभयो ।
तत्कालीन समयमा नेपालमा पहिलो पटक टिकट सिस्टममा रु ५ को टिकेट किनेपछि मात्रै हेर्न पाइने त्यस प्रदर्शनीको स्मरण गर्दै उहाँले ‘नेपालमा नारीको शासन’ शीर्षकमा यो कलाकृतिलाई प्रदर्शनमा राखिएको अनुभव सुनाउनुभयो । त्यस समयमा चित्र हेर्ने साथीभाइ, पत्रकार, कलाकार एवम् दर्शकहरुले यो सम्भव होला र भन्दै आँफूँलाई के हाइपोथेटिक काम गरेको भनेर भनेको आजै जस्तो लागिरहेको बताउँदै उहाँले २०६१ सालमा बनाएको यो कलाकृति २०८२ सालमा आएर सार्थक बनेकोमा आफैं दंग परेको अनुभव सुनाउनुुभयो ।
“भनिन्छ नि कलाकार अघोषित सांसद हो भनेर, हामी कलाकारको दृष्टि पनि साँच्चै नै हुने रहेछ भन्ने यो ज्वलन्त उदाहरण हो.”, उहाँले थप्नुुभयो, “ भएको दृष्यहरू मात्र होइन भविष्यमा हुने दृष्यहरूको पनि क्यानभासमा उतार्न सकिँदो रहेछ र त्यसैले अन्ततः पूर्णता पनि पाउँदो रहेछ भन्ने कुरा यो कलाकृतिले छर्लङ्ग पारेको छ, मैले यसबाट आफूँप्रति पनि गौरव महसुस गरेको छु ।”
‘जय कला क्रान्ति !!! विश्वमा छाओस् शान्ति !!!’ भन्ने आदर्श वाक्यका साथ विश्वको उत्कृष्ट गन्तव्य नेपाल बनाउने महा अभियानमा ‘नेपाल यात्रा पुस्तक’ प्रकाशन गरी २०८७ सालमा देशमा एक करोड विदेशी पर्यटक भित्र्याउने लक्ष्यका साथ सिंह निरन्तर लागिरहनुभएको छ ।उहाँको यो ‘नेपालमा नारीको शासन’ शीर्षकको कलाकृति हाल विश्वको उत्कृष्ट गन्तव्य नेपाल बनाउने महा अभियानको सम्पर्क कार्यलय पोखरा महानगरपालिका वडा नं ८ न्यूरोड मा अवलोकन गर्न सकिने व्यवस्था मिलाइएको छ
पोखरा, २८ भदौ ।
दोस्रो पुम्दी–भुम्दी पर्वतीय दौड प्रतियोगिता निर्धारित मिति भन्दा एक साता पछि सरेको छ । अब सो प्रतियोगिता विश्व पर्यटन दिवसकै दिन असोज ११ गते शनिबार हुनेछ ।
जेन–जीको आन्दोलनसँगै मुलुकमा उत्पन्न पछिल्लो परिस्थितिका कारण आयोजकले उक्त निर्णय गरेको प्रतियोगिता संयोजक दीननाथ बरालले बताए । खेल पर्यटन प्रवद्र्धन गर्ने उद्देश्यले पोखरा प्रवर्धन केन्द्र र पोखरा क्लिक प्रालिको संयुक्त आयोजनामा असोज ४ गते प्रतियोगिताको तयारी गरिएको थियो । मिति सार्नुपरेकोमा यसबाट पर्न गएको असुविधाप्रति आयोजकले सम्पूर्ण खेलाडी, खेलकुदकर्मी, उद्योगी व्यवसाय, अतिथि महानुभावसहित शुभेच्छुकमा क्षमायाचना गरेको छ । साथै, गत भदौ २३ र २४ गते जेन–जीको आन्दोलनका क्रममा सहादतप्राप्त गर्नेहरुप्रति हार्दिक श्रद्धाञ्जली व्यक्त गर्दै घाइतेहरुको शीघ्र स्वास्थ्य लाभको कामना गरिएको छ । साथै नेपालका ऐतिहासि र महत्पूर्ण कागजात सहितका महत्वपूर्ण सरकारी तथा गैर सरकारी कार्यालय एवं विभिन्न भौतिक संरचनामा भएको आगजनीको बिरोध गर्दछौं ।
पोखरा–२२ स्थित विश्व शान्ति स्तुपदेखि कालाबाङ घरेडी बुद्धपार्कसम्मको ८ किमी दूरीमा विभिन्न ६ इभेन्टमा प्रतियोगिता हुनेछ । हालसम्म ७५ जना धावकले दौडमा भाग लिन अनलाइन फर्म भरेका छन् । आयोजकले २५० जनासम्म धावकलाई व्यवस्थापन गर्ने भएको र फस्ट कम फस्ट सर्भिसका आधारमा २५० संख्या नपुग्दासम्म पुनः फर्म खोलिएको केन्द्रका उपाध्यक्ष असफल गौतमले जानकारी दिए ।
नेपाल पर्यटन बोर्ड र पोखरा महानगरपालिकाले प्रवद्र्धन रहेको प्रतियोगिता सफल पार्न विश्व शान्ति स्तुप समिति, पुम्दीकोट कोट विकास समिति, कालाबाङ घरेडी बुद्धपार्क समिति, गण्डकी प्रदेश सामाजिक विकास युवा तथा खेलकुद मन्त्रालय, पोखरा लेकसाइडको मजेष्टिक लेक फ्रण्ट होटल एण्ड सुइट्स, हिमश्री फुड्स प्रा.लि.÷केसी ग्रुप, होटल बाराही, सिटिजन्स फर्निचर, पोखरा पर्यटन परिषद्, होटल मुस्ताङ लेते एण्ड थकाली किचन, टान गण्डकी, अटोवेज प्रा.लि., पोखरा महानगरपालिका २२ को वडा युवा परिषद्, पोखरा भ्रमण वर्ष २०२५, परिचय एड्भरटाइजिङ, होटल संघ पोखरा नेपाल, ईजि ग्रुप, अन्नपूर्ण केवलकार लगायतको सहयोग छ ।
प्रदेश खेलकुद परिषद् गण्डकी समन्वय र पोखरा महानगरपालिका २२ वडा कार्यालयको सहकार्य रहेको प्रतियोगिताको मेडिकल पार्टनरमा नेलम्बो नेपाल, हस्पिटल पार्टनरमा नमस्ते हस्पिटल, अफिसियल टेलिभिजनमा सिटीवान टेलिभिजन, अफिसियल रेडियोमा रेडियो सफलता जोडिएको छ । आधिकारिक ड्रिङ्किङ वाटरका रूपमा ग्लेज नेचुरल स्प्रिङ वाटरले साथ दिएको छ ।
प्रतियोगितामा खुलातर्फ प्रथम पुरस्कार अन्तर्राष्ट्रिय ख्यातिप्राप्त खेलाडी लेफ्टिनेन्ट कुसाङ गुरुङले प्रायोजन गरेका छन् । यस्तै, नेलम्बो नेपालले तेस्रो पुरस्कार प्रायोजन गरेको छ । सहारा क्लब पोखरा, सिटिजन्स फर्निचर, नेपाल टुरिजम एण्ड होटल म्यानेजमेन्ट कलेजले १६ वर्षमुनिको विधामा, पर्यटक दौडको प्रोत्साहन पुरस्कार, महिलातर्फको खुला विधामा प्रदान गरिने जनही १५ हजार सहयोग गर्ने भएका छन् । प्रतियोगितामा करिब १६ लाख ९१ हजार रूपैयाँ खर्च हुने अनुमान रहेको पोखरा क्लिकका व्यवस्थापक सागर सुनारले बताए ।
पोखरा, २८ भदौँ ।
हामी बनाउछौं हाम्रो देश भन्ने मुल नाराका साथ लायन्स क्लब अफ इन्फरमेशन टेक्नोलोजीले आन्दोलनको क्रममा आगलागीबाट क्षती पुगेको जिल्ला प्रहरी कार्यालय कास्कीमा सिसिटीभी क्यामेरा जडान गरेको छ ।
गत भदौ २४ गतेको जेन्जीको आन्दोलनका क्रममा जिल्ला प्रहरी कार्यालय कास्कीमा जडान गरिएका सम्पूर्ण सिसिटीभि क्यामेराहरु आगलागीका कारण पूर्ण रुपमा जलेर नष्ट भएपछि लायन्स क्लब अफ इन्फर्मेशन टेक्नोलोजीले प्रहरीको काम कारबाहीमा सहयोग पुगोस भन्ने उद्देश्य अनुरुप शनिवार सिसिटीभी क्यामेरा मर्मत संगै नयाँ सिसिटीभी जडान गरेको लायन्स क्लब अफ इन्फर्मेशन टेक्नोलोजीका अध्यक्ष राबत गोम्जा तामाङले बताए ।
गोम्जाका अनुसार जिल्ला प्रहरी कार्यालय हामी सबैको लागि सुरक्षा प्रदान गर्ने स्थान भएकाले आन्दोलनको क्रममा आगलागीबाट क्षती भएको सिसिटीभी क्यामेराहरुले काम नगर्ने भएकाले आफुहरुले मर्मत र नयाँ सिसिटीभी क्यामेरा जडान गरेको बताए ।
सिसिटीभी जडान कार्यक्रमका संयोजक स्वयंभु कुँवरका अनुसार जिल्ला प्रहरी कार्यालयमा १६ थान सिसिटीभी क्यामेरा जडान गरिएको छ । जस मध्ये ९ वटा सिसिटीभी क्यामेरा नयाँ जडान गरिएको हो । शनिवार जडान सम्पन्न गरी हस्तान्तरण गरिएको उक्त क्यामेराहरुको मर्मत संभार समेत लायन्स क्लब अफ इन्फर्मेशन टेक्नोलोजीले नै गरिदिने र आगामी दिनमा पनि थप सहयोगलाई निरन्तरता दिने समेत कुँवरले जानकारी दिए ।
यस अघि पार्दी माविमा समेत लायन्स क्लव अफ इन्फर्मेशन टेक्नोलोजीले सिसिटीभी क्यामेरा जडान गरेको बताउदै आफुहरुले पोखरा ८ का केही सामुदायिक विद्यालयहरुमा सिसिटीभी क्यामेरा जडान गर्ने योजनाका साथ अगाडी बढिरहदा जेन्जीको आन्दोलनका कारण आगलागीबाट क्षती पुगेको जिल्ला प्रहरी कार्यालयमा सिसिटीभी क्यामेरा जडान गरिएको अध्यक्ष गोम्जाले जानकारी दिए ।
पोखरा, २८ भदौ ।
पोखरा महानगरपालिकाका मेयर धनराज आचार्यले हालैको जेनजी आन्दोलनका क्रममा भएको जनधनको क्षतिप्रति गहिरो दुःख प्रकट गरेका छन् । सामाजिक सञ्जालमा स्टाटस लेख्दै उनले दिवंगत युवाप्रति श्रद्धाञ्जली अर्पण गर्दै घाइतेको शीघ्र स्वास्थ्य लाभको कामना गरेका छन् ।
आन्दोलनका बेला दुबईमा रहेका आचार्यले पोखरा फर्केर भनेका छन्, ‘देशले आफ्ना सपना बोकेका असंख्य आँखाहरू गुमाएको यो पीडामा मेरो मन असाध्यै भारी भएको छ । साथै आन्दोलनका क्रममा घाइते भएका व्यक्तिहरूको शीघ्र स्वास्थ्यलाभको कामना गर्दछु ।’
आचार्यले पोखरामा सरकारी कार्यालयमा भएको आगजनी, तोडफोड र क्षति बाहिरी तत्वको षड्यन्त्र भएको दाबी गरेका छन् । उनका अनुसार प्रशासनतर्फबाट सम्पूर्ण क्षतिको विवरण संकलन भइरहेको छ । उनले भने, ‘जनताको नजिकको सरकारका रूपमा रहेका कार्यालयहरूमा भएको विनाश आन्दोलनकारी युवाभन्दा बाहिरी तत्वहरूको षड्यन्त्रपूर्ण गतिविधि हो भन्ने स्पष्ट तथ्य हामीसँग छ ।’
आज कार्यपालिका बैठक बसेर नगरवासीलाई अत्यावश्यक सेवाहरू निरन्तरता दिने उपायबारे निर्णय भइरहेको बताउँदै उनले सबै नगरवासीलाई धैर्यपूर्वक साथ दिन आग्रह गरेका छन् ।
काठमाडौं , २८ भदौ ।
नेपालमा नयाँ सरकार गठनको संयुक्त अधिराज्य बेलायतले स्वागत गरेको छ । पूर्वप्रधानन्यायाधीश सुशीला कार्कीले शुक्रबार अन्तरिम प्रधानमन्त्रीको जिम्मेवारी सम्हालेलगत्तै बेलायतले स्वागत गरेको हो ।
कार्कीले शुक्रबार अन्तरिम प्रधानमन्त्रीको जिम्मेवारी सम्हालेलगत्तै यहाँस्थित बेलायती दूतावासले सामाजिक सञ्जाल फेसबुकमार्फत गत हप्ताको घटनाक्रमपछि नेपालले महत्वपूर्ण कदम लिएकाे उल्लेख गरेको छ ।
साथै बेलायतले नेपाल सबैभन्दा पुरानो मित्रको रूपमा आगामी चुनौतीहरूलाई स्वीकार गर्दै जवाफदेहीता र समावेशी शासनका लागि नेपाली आकांक्षालाई समर्थन गर्ने जनाएको छ ।
काठमाडौं , २८ भदौ ।
नेपालमा नयाँ सरकार गठनको भारतले स्वागत गरेको छ । पूर्वप्रधानन्यायाधीश सुशीला कार्कीले शुक्रबार अन्तरिम प्रधानमन्त्रीको जिम्मेवारी सम्हालेलगत्तै भारतले स्वागत गरेको हो ।
भारतीय विदेश मन्त्रालयले निकालेकाे विज्ञप्तिमा भनिएकाे छ ,“हामी सुशीला कार्कीको नेतृत्वमा नेपालमा नयाँ अन्तरिम सरकार गठनको स्वागत गर्दछौँ । हामीलाई आशा छ, यसले शान्ति र स्थिरतालाई प्रवर्द्धन गर्न मद्दत गर्नेछ ।”
साथै भारतले नजिकको छिमेकी, लोकतान्त्रिक मित्र र दीर्घकालीन विकास साझेदारको रूपमा दुई देश र जनतको हित र समृद्धिका लागि नेपालसँग मिलेर निरन्तर काम गरिरहने जनाएको छ ।
काठमाडौं , २८ भदौ ।
नवनियुक्त अन्तरिम सरकारका प्रधानमन्त्री सुशीला कार्कीले आइतबार मात्रै पदभार ग्रहण गर्ने भएकी छन् । हिजाे शपथग्रहण कार्यक्रम सकिएपछि तत्कालै पदभार ग्रहण गर्ने तयारी भए पनि ढिलो गरेर शपथग्रहण सम्पन्न भएकाले सोही दिन पदभार ग्रहण गर्न नसकिएको हो ।
शुक्रबार राति शपथपछि प्रधानमन्त्री कार्की आफ्नै निजी निवास गएकी छन् । जेनजी आन्दोलनकारीले प्रधानमन्त्रीको सरकारी निवास बालुवाटारमा क्षति पुर्याएपछि तत्काल बस्न सक्ने अवस्था नभएकाले उनी निजी निवासमै बसिरहेकी हुन् ।
सरकारी निवासको व्यवस्थापन नहुँदासम्म कार्की निजी निवासमै बस्ने छन् ।
पोखरा, २८ भदौ ।
आज भदौ २८ गते बिहान ९:०० बजे देखि कास्की जिल्लामा निषेधाज्ञा र कर्फ्यु हटाइएको छ । जिल्ला सुरक्षा समितिले निर्णय गरेर आज बिहान ९ बजेदेखि लागू हुनेगरि कफ्र्यू तथा निषेधाज्ञा हटाइएको कास्कीका प्रमुख जिल्ला अधिकारी रुद्रादेवी शर्माले जानकारी दिइन् ।
नयाँ सरकार गठन भएसँगै देशैभर जनजीवन सामान्य बन्न थालेको छ । भदाै २३ काे आन्दोलनपछि मुलुकका विभिन्न क्षेत्रमा केही दिनअघिदेखि लगाइको कर्फ्यु र निषेधाज्ञा पनि हटेको छ । ललितपुर र भक्तपुरमा भने कायमै छ ।
भ्रष्टाचारविरुद्ध र सुशासन प्रवर्द्धनको नाराकासाथ अघि बढेको जेनजी पुस्ताको मागअनुरूप पूर्वप्रधानन्यायाधीश सुशीला कार्कीका नेतृत्वमा नयाँ सरकार गठन भएको छ । कार्कीलाई प्रधानमन्त्रीमा नियुक्त गर्दै आगामी ६ महिनाभित्र प्रतिनिधिसभाको निर्वाचन सम्पन्न गर्न जिम्मेवारी समेत दिइएकाे छ ।
उनको नेतृत्वमा गठिन सरकारले आगामी फागुन महिनाभित्र नयाँ जनादेशका लागि निर्वाचन सम्पन्न गराउनेछ।
काठमाडौं । पूर्वप्रधानन्यायाधीश सुशिला कार्की अन्तरिम सरकारको प्रधानमन्त्री नियुक्त भएकी छन् । उनलाई राष्ट्रपति रामचन्द्र पौडेलले प्रधानमन्त्री नियुक्त गरेका हुन् । त्यस्तै, उनको शपथ ग्रहण आजै बेलुका ९ बजे हुने भएको छ ।
उमा आलेमगर
पोखरा, २६ भदौँ ।
“स्वतन्त्रता भनेको जिम्मेवारी हो, जिम्मेवारीविहीन स्वतन्त्रता केवल विनाश हो।”
हालैको Gen Z आन्दोलनले नेपालको सामाजिक, राजनीतिक र सांस्कृतिक संरचनालाई गहिरो प्रश्न गरेको छ। युवा पुस्ताले आफ्नो आवाज बुलन्द गर्नु लोकतन्त्रको सौन्दर्य हो। किनकि आन्दोलन लोकतन्त्रको मुटु हो, र विरोध अभिव्यक्तिको अधिकार त्यसको स्वास। तर, यही आन्दोलनबीच राष्ट्रिय सम्पदामा आगलागी हुँदा भएको क्षति भने हाम्रो विवेकका लागि गम्भीर प्रश्न बनेको छ।

आन्दोलनको सार र औचित्य
नेल्सन मन्डेलाले भनेका थिए: “युवाले यदि अन्याय देखे, त्यसविरुद्ध बोल्नु नै सबैभन्दा ठूलो साहस हो।” नेपालका युवाले सामाजिक असमानता, बेरोजगारी, अवसरको कमी र राज्यप्रतिको निराशा देख्दा सडकमा ओर्लिनु स्वाभाविक हो।
Gen Z भनिने यो पुस्ता प्रविधि–मैत्री, तीब्र गतिमा सोच्ने र तत्कालीन परिणाम खोज्ने पुस्ता हो। उनीहरूले आफ्नो आवाज उठाउनु अपरिहार्य छ। तर, आन्दोलन केवल आक्रोशले होइन, विवेक र दूरदृष्टिले निर्देशित हुनुपर्छ। किनकि “क्रोधले जलाएको दियो केवल धुवाँ फ्याँक्छ, प्रकाश दिँदैन।”

राष्ट्रिय सम्पदा : हाम्रो पहिचान
राष्ट्रिय सम्पदा भनेको केवल काठका मूर्ति वा ढुंगाका स्तम्भ मात्र होइन। ती हाम्रो इतिहास, सभ्यता र संस्कृतिको जीवित प्रतीक हुन्।
नेपालमा ४ वटा युनेस्को विश्व सम्पदा क्षेत्र छन्—काठमाडौं उपत्यकाका सात समूह सम्पदा, लुम्बिनी, चितवन राष्ट्रिय निकुञ्ज र सगरमाथा राष्ट्रिय निकुञ्ज। यी सम्पदाले नेपाललाई विश्व मानचित्रमा अद्वितीय बनाएका छन्।
सन् २०१५ (२०७२) को भूकम्पले मात्र काठमाडौं उपत्यकाका ७५ प्रतिशत सम्पदा भत्कायो वा क्षति पुर्यायो। विश्व बैंकको प्रतिवेदन अनुसार त्यसबेला सांस्कृतिक सम्पदामा मात्र करिब ७ अर्ब अमेरिकी डलर बराबरको क्षति भएको थियो। त्यो घाउ अझै निको भएको छैन।
त्यसैले, जब आन्दोलनकै नाममा आगलागी हुन्छ, तब जल्ने केवल ढुंगा वा काठ होइन—पुस्तौँले बोकेको स्मृति, आस्था र पहिचान हो।
“सम्पदा हराउँदा इँटा र काठ मात्र खरानी हुँदैन, आत्मा र विश्वास पनि खरानी हुन्छ।”

आगलागीको क्षति र त्यसका परिणाम
राष्ट्रिय सम्पदामा आगलागी वा तोडफोड हुँदा त्यसका असर बहुआयामिक हुन्छन्—
1. ऐतिहासिक स्मृति नष्ट हुन्छ
– कोत पर्व (१८४६) पछि दरबारहरू र अभिलेखहरूमा भएको आगलागीका कारण हाम्रो इतिहासका महत्वपूर्ण कागजातहरू सदाका लागि हराए।
2. आर्थिक घाटा बढ्छ
– नेपालमा पर्यटनले १० लाखभन्दा बढी रोजगारी दिएको छ। आगलागी वा तोडफोडले सम्पदा नष्ट हुँदा पर्यटक घट्छन्, जसले सीधा अर्थतन्त्रमा प्रहार गर्छ।
3. सांस्कृतिक विखण्डन हुन्छ
– सम्पदा भनेको समुदायको साझा आस्था हो। जब त्यो हराउँछ, समुदायबीचको बन्धन कमजोर हुन्छ।
4. अन्तर्राष्ट्रिय छवि धुमिल हुन्छ
– सम्पदा नजोगाउने राष्ट्रलाई विश्वले असक्षम ठान्छ। यसले नेपालमा विदेशी लगानी र सहयोग आउन पनि अवरोध पुर्याउँछ।

आन्दोलन र जिम्मेवारी
लोकतन्त्रले आन्दोलनको अधिकार दिन्छ। तर अधिकारसँगै जिम्मेवारी पनि हुन्छ। यदि आन्दोलनकै नाममा आफ्नै सम्पदा जलाइन्छ भने त्यो आन्दोलनले खोजेको उज्यालो भविष्य पनि खरानीमा परिणत हुन्छ।
महात्मा गान्धीले भनेका थिए: “तपाईँले परिवर्तन चाहनुहुन्छ भने, त्यसलाई हिंसामुक्त साधनबाट नै खोज्नुपर्छ, किनकि हिंसाले केवल हिंसा जन्माउँछ।”
Gen Z ले बुझ्नुपर्ने कुरा के हो भने, आन्दोलनको आत्मा भनेकै निर्माण हो। ध्वंस केवल क्षणिक सन्तुष्टि दिन्छ, तर दीर्घकालीन पीडा बोकेर आउँछ।

विकल्प र समाधान
यदि सचेत ढंगले आन्दोलन गर्न सकियो भने सम्पदा जोगाउँदै पनि परिवर्तन सम्भव छ। केही सुझाव—
1 सचेत आन्दोलन : तोडफोड होइन, सिर्जनात्मक दबाब सिर्जना गर्ने (कला प्रदर्शन, शान्तिपूर्ण मार्च, डिजिटल अभियान)।
2 सम्पदा सुरक्षा टोली : आन्दोलनका बेला प्रहरी वा स्वयंसेवकबाट सम्पदा क्षेत्र विशेष सुरक्षा।
3 शिक्षा र सचेतना : विद्यालयदेखि विश्वविद्यालयसम्म सम्पदा संरक्षणलाई पाठ्यक्रममा समावेश गर्ने।
4 सम्वाद संस्कृति : आन्दोलनकारी र राज्यबीच निरन्तर संवादको पुल बनाउन आवश्यक।
अन्तिम सन्देश
Gen Z को आन्दोलनले देखाएको असन्तुष्टि जायज छ। तर आन्दोलनलाई विवेकपूर्ण बाटोमा हिँडाउन सकिएन भने, जल्ने केवल सम्पदा होइन, हाम्रो भविष्य पनि हुन्छ।
“आन्दोलनले शासनलाई चुनौती दिन्छ, तर सम्पदा जोगाउनु भनेको भविष्यलाई सुरक्षित राख्नु हो।”
आजको आगलागीले हामीलाई चेतावनी दिएको छ—सम्पदा बचाउनु भनेको केवल ढुंगा वा काठ जोगाउनु होइन, हाम्रो पहिचान, संस्कृतिको आत्मा र भावी पुस्ताको सपना जोगाउनु हो।





