काठमाडौं। 

नेपाली राष्ट्रिय क्रिकेट टोली आइतबार बिहान सम्पन्न सेमिफाइनलमा ओमानलाई ८ विकेटले हराउँदै एसियाली खेलकुद छनोटको फाइनलमा प्रवेश गरेको छ।सिंगापुरमा टस जितेर पहिले ब्याटिङ गरेको ओमान १९.४ ओभरमा अलआउट हुँदै ९४ रनमा समेटिएको थियो। जवाफमा नेपालले उक्त लक्ष्य सहज तरिकाले पुरा गर्यो। नेपालले ओमानले दिउको लक्ष्य ९.२ ओभरमा २ विकेट गुमाएर पुरा गर्दै फराकिलो जित निकाल्यो।

नेपालको जितमा लोकेश बमले २६ बलमा ७ चौका र १ छक्काको सहयोगमा ४४ रनको अविजित इनिङ खेलेका थिए। त्यस्तै ओपनर कुशल भुर्तेलले २० रन बनाउँदा रोहित पौडेलले २१ रनको अविजित इनिङ खेले।

त्यसअघि पहिले ब्याटिङ गरेको ओमानका लागि कप्तान सुफ्यन महमुदले ३८ रन बनाउँदा अब्दुलजलिल खानले १६ तथा जुबाइर अली अकबरले २२ रन बनाएका थिए। नेपालका लागि करण केसीले ३ विकेट लिंदा सोमपाल कामी र सन्दीप लामिछानेले २-२ विकेट लिए। त्यस्तै साहब आलम, कुशल मल्ल र दिपेन्द्र सिंह ऐरीले १-१ विकेट हात पारेका थिए।

नेपालले अब सोमबार हङकङ र मलेसियाबीच खेलको विजेतासँग उपाधिका लागि प्रतिस्पर्धा गर्ने छ। यसअघिनै सेमिफाइनल पुग्ने चार टोली एसियाली खेलकुदमा छनोट भइसकेका छन् ।

काठमाडौं ।
राष्ट्रिय स्वतन्त्र पार्टी रास्वपाले बागमती र कोशी प्रदेशका विभिन्न जिल्लाको अधिवेशनहरू सम्पन्न गरेको छ। दुवै प्रदेशहरुमा नयाँ नेतृत्व चयन प्रक्रिया अधिंकासमा सकिंदा केहीमा आज हुँदै छ।

बागमती प्रदेशका १३ मध्ये ९ जिल्लामा अधिवेशन सकिएर नयाँ कार्यसमिति बनिसकेका छन्। काठमाडौंमा राजा शाक्य, भक्तपुरमा रामेश्वर बस्नेत, काभ्रेपलाञ्चोकमा प्रबिन ढकाल र सिन्धुलीमा अविनाश बस्नेत सभापति छानिएका छन्।

चितवन, रसुवा र ललितपुरमा आज अधिवेशनको कार्यतालिका रहेको छ भने सिन्धुपाल्चोकमा हिजो सुरु भएको अधिवेशन केही समयका लागि स्थगित गरिएको छ।कोशी प्रदेशका १४ मध्ये ९ जिल्लामा पनि नयाँ जिल्ला कार्यसमिति चयन भएका छन्। बाँकी रहेका धनकुटा, उदयपुर, सोलुखुम्बु, खोटाङ र इलाममा पनि आजै अधिवेशन सम्पन्न गर्ने गरी प्रक्रिया अगाडि बढिरहेको रास्वपाले जनाएको छ।

काठमाडौं। 

घरेलु कामदारका रुपमा महिलालाई अवैध रुपमा खाडी मुलुक पठाउने आधा दर्जन व्यक्ति पक्राउ परेका छन् ।

पक्राउ पर्नेहरुमा काठमाडौंको सिनामंगल बस्ने संखुवासभाका ४६ वर्षीय आशिष भन्ने केदारबहादुर खड्का, गुहेश्वरी बस्ने सिन्धुपाल्चोकका ४५ वर्षीय ईश्वर न्यौपाने, जोरपाटी बस्ने गुल्मीका ४४ वर्षीय रामबहादुर क्षेत्री, भिमसेनगोला बस्ने खोटाङका ४७ वर्षीय पशुपति राई, कागेश्वरी मनोहरा–७, बस्ने मोरङका ५३ वर्षीय कुमार उराउ र भक्तपुरको दधिकोट बस्ने सप्तरीका ४२ वर्षीय प्रकाश साह छन् ।  महिलाहरुलाई ललाईफकाई कुवेत, ओमान, युएईजस्ता देशमा घरेलु कामदारको रुपमा पठाउने गिरोहहरु सिनामंगलमा जम्मा भई विशेष योजना बनाइरहेको सूचना प्रहरीले पाएको थियो । 

सोही आधारमा पुगेको प्रहरीले उनीहरुलाई घेरा हालेर समातेको हो । त्यसक्रममा उनीहरुले प्रहरीलाई गालीगलौज गर्नुका साथै हातपातको प्रयाससमेत गरेको जनाइएको छ । पक्राउ परेकामध्ये केदारबहादुरको घर तलासी गर्दा स्रोत नखुलेको ३१ लाख ८० हजार रुपैयाँसमेत बरामद गरिएको प्रहरीले बताएको छ ।