पोखरा, ०८ फागुन ।
तपाईँ टिकटक कत्तिको चलाउनुहुन्छ ? टिकटकबाट राष्ट्रिय रूपमा योगदान पनि गर्न सक्नुहुन्छ । आसन्न निर्वाचनलाई टिकटक बनाएरै सहयोग गर्न सक्नुहुनेछ ।
मतदाता शिक्षासम्बन्धी टिकटक बनाएर आकर्षक पुरस्कारसमेत प्राप्त गर्न सक्नुहुने छ । जसका लागि तपाईंले मतदाता शिक्षासम्बन्धी टिकटक बनाएर निर्वाचनको माहौल बनाउन, प्रचारप्रसार गर्ने र मतदाता शिक्षा प्रदान गर्न सकिनेछ । जसबाट तपाईले ५० हजार जित्नुहुनेछ । युवामाझ लोकप्रिय रहेको सामाजिक सञ्जाललाई आयोगले निर्वाचन प्रचारप्रसारका लागि प्रयोग गर्न लागेको छ ।
निर्वाचन आचारसंहिता तथा मतदाता शिक्षाजस्ता विषयमा आधारित भएर एक मिनेट बराबरको टिकटक भिडियो बनाई आफ्नो सामाजिक सञ्जालमा राख्नुपर्ने छ । यही फागुन १७ गतेसम्म आयोगको इमेलमा समेत टिकटक पठाउनुपर्नेछ ।
आयोगमा प्राप्त भएका सबै टिकटक भिडियोमा सबैभन्दा बढी भ्युअर्स भएका टिकटकलाई आयोगले निश्चित रकम प्रदान गर्नेछ । आयोगले त्यस्ता टिकटकलाई धेरै भ्युअर्स भएका पहिलो टिकटकलाई रु ५० हजार, दोस्रोलाई रु ३० हजार र तेस्रोलाई रु २० हजारका दरले पुरस्कृत गरी प्रमाणपत्र प्रदान गर्नेछ ।
