पोखरा, २४ माघ ।
पोखरामा सम्पन्न साफ यू १९ महिला च्याम्पियनसिपको उपाधि भारतले जितेको छ । पोखरा रंगशालामा आज शनिबार भएको फाइनलमा भारतले साबिक विजेता बंगलादेशलाई ४–० गोल अन्तरले पराजित गर्दै उपाधि जितेको हो ।
बंगलादेशमाथि भारतले सहज जित निकाल्दै ट्रफी उचाल्यो ।
पहिलो हाफमा एक गोलले अग्रता बनाएको भारतले दोस्रो हाफमा ३ गोल थप्दै गोल अन्तर फराकिलो बनायो । भारतको जितमा ४२ औं मिनेटमा जुलान नोङमाइथेमले सुरुआती गोल गरेकी थिइन् । ६३ औं मिनेटमा एलिजावेथ लर्काले पेनाल्टी मार्फत गोल गर्दै अग्रता दोब्बर बनाइन् । त्यसको ५ मिनेटमै पर्ल फर्नान्डेजले तेस्रो गोल गरिन् । खेलको ८३ औं मिनेटमा अन्विता रघुरामानले चौथो गोल गर्दै गोल अन्तर फराकिलो बनाईन ।
बंगलादेशले लिग चरणमा भुटानलाई १२–०, भारतलाई २–० र नेपाललाई ४–० ले हराएर ९ अंक जोड्दै अंक तालिकाको शीर्ष स्थानमा रहँदै फाइनल प्रवेश गरेको थियो । यता भारतले नेपाललाई १–० र भुटानलाई ८–० ले हराएर ६ अंक जोड्दै अंक तालिकाको दोस्रो स्थानमा रहँदै फाइनल प्रवेश गरेको थियो ।
यसअघि बंगलादेश तीनपल्ट च्याम्पियन बनेको छ । भारतले पनि यो सँगै ३ पटक उपाधि माथि कब्जा जमाएको छ । यसअघि दुईपल्ट फाइनल प्रवेश गरेको नेपाल यसपल्ट भने लिग चरणबाटै बाहिरिएको थियो ।
अखिल नेपाल फुटबल संघ (एन्फा) को व्यवस्थापन तथा कास्की जिल्ला फुटबल संघ, जिल्ला खेलकुद विकास समिति र पोखरा महानगरपालिकाको समन्वयमा आयोजित च्याम्पियनसिपमा भारतले ‘अनुशासित टोली’ को पुरस्कार जित्यो । प्रतियोगिताको उत्कृष्ट गोलकिपरको पुरस्कार भारतकी मुन्नीले हात पारिन् । सर्वाधिक गोलकर्ता तथा मोस्ट भ्यालुएबल खेलाडीको उपाधि भने बंगलादेशकी अल्पी अख्तरले उचालिन ।
