पोखरा, १५ मंसिर ।
अपांगता भएका व्यक्तिहरुको ३४ औं अन्तराष्ट्रिय दिवसको अवसरमा पोखरामा सरोकारवालाहरुसँग अन्तरक्रिया भएको छ । अपांग महिला सशक्तिकरण केन्द्र कास्कीको आयोजनामा र सञ्चारिका समुह गण्डकीको सहआयोजनामा कार्यक्रम गरिएको हो ।
सशक्तिकरण केन्द्र कास्कीका अध्यक्ष अञ्जना केसीले अपांगता भएका व्यक्तिका लागि बनाइएको योजना कार्यान्वयन नहुनु चुनौतीको रुपमा रहेको बताइन् । अधिकार सुनिश्चितताका लागि आफै अग्रसर हुनुपर्नेमा उनको जोड छ ।
स्वावलम्बन जीवन पद्धति केन्द्रका कार्यक्रम संयोजक दिनेश अधिकारीले अपांगता भएका व्यक्तिलाई समाजको मूलधारमा ल्याउन सरकार, सामाजिक संस्था र निजी क्षेत्रबीचको सहकार्य आवश्यकता रहेको बताए ।
सञ्चारिका समुहकी अध्यक्ष कविता श्रेष्ठले अपांगता भएकारुको समावेशी र पहुँचयुक्त वातावरण सृजना गर्न सञ्चारमाध्यमको महत्वपूर्ण भूमिका हुने बताइन् ।
कार्यक्रममा सहभागीले अपांगता भएका व्यक्तिले पाउने सेवा सुविधा समान वितरण नहुने भन्दै गुनासाे गरेका थिए ।
